₹ 47,000 ದಾಟಿದ ಅಡಿಕೆ ಧಾರಣೆ

ವಾರದಿಂದ ಅಡಿಕೆ ಧಾರಣೆ ಅಲ್ಪ ಪ್ರಮಾಣದಲ್ಲಿ ಏರಿಕೆ ಕಂಡು ಜನವರಿ 23ರಂದು ₹ 47,000ದ ಗಡಿ ದಾಟಿದೆ. ಹೀಗಾಗಿ ಬೆಳೆಗಾರರು ಅಡಿಕೆ ಮಾರಲು ಮುಂದಾಗುತ್ತಿದ್ದಾರೆ.

‘ಡಿಸೆಂಬರ್‌ನಲ್ಲಿ ಅಡಿಕೆ ಧಾರಣೆ ಕುಸಿದಾಗ, ಜನವರಿಯಲ್ಲಿ ಏರಿಕೆಯಾಗಬಹುದು ಎಂದು ಧೈರ್ಯ ತುಂಬಿದ್ದೆ.
ಜ. 23ರಂದು ರಾಶಿ ಅಡಿಕೆ ಕ್ವಿಂಟಲ್‌ಗೆ ಗರಿಷ್ಠ ಬೆಲೆ ₹47,659ಕ್ಕೆ ಮಾರಾಟವಾಗಿದೆ. ಕನಿಷ್ಠ ಬೆಲೆ ₹45,912 ಇತ್ತು. ಸರಾಸರಿ ₹47,005ಕ್ಕೆ ಮಾರಾಟವಾಗಿದೆ. ಬೆಟ್ಟೆ (ಸೆಕೆಂಡ್ಸ್‌) ಅಡಿಕೆ ಗರಿಷ್ಠ ₹34,789, ಕನಿಷ್ಠ ಬೆಲೆ ₹34,779 ಇದೆ. ಇನ್ನು ಸ್ವಲ್ಪ ದಿನ ಅಡಿಕೆ ಧಾರಣೆ ಯಥಾಸ್ಥಿತಿಯಲ್ಲಿ ಮುಂದುವರಿಯಲಿದೆ’ ಎಂದು ತುಮ್ಕೋಸ್ ಅಧ್ಯಕ್ಷ ಆರ್.ಎಂ. ರವಿ ಹೇಳಿದರು.

‘ಅಧಿಕ ಮಳೆಯಿಂದಾಗಿ ಇಳುವರಿ ಜೊತೆಗೆ ಧಾರಣೆಯೂ ಕುಸಿದು ಆತಂಕವಾಗಿತ್ತು. ಈಗ ಧಾರಣೆ ಹೆಚ್ಚಾಗಿದ್ದರಿಂದ ನಿಶ್ಚಿಂತೆಯಿಂದ ಅಡಿಕೆ ಮಾರಾಟ ಮಾಡುತ್ತಿದ್ದೇನೆ’ ಎಂದು ‌ತಾಲ್ಲೂಕಿನ ಗುಳ್ಳೇಹಳ್ಳಿ ಗ್ರಾಮದ ಅಡಿಕೆ ಬೆಳೆಗಾರ ಎಂ.ಎಸ್. ಷಣ್ಮುಖ ತಿಳಿಸಿದರು.