ಕೊರೊನಾ: ವಿಶ್ವಕ್ಕೆ ಆರ್ಥಿಕ ಆಘಾತ ಖಚಿತ, ಭಾರತ-ಚೀನಾ ಪಾರು: ವಿಶ್ವಸಂಸ್ಥೆ ವರದಿ

ಅಭಿವೃದ್ಧಿ ಹೊಂದುತ್ತಿರುವ ದೇಶಗಳಲ್ಲಿ ವಿಶ್ವದ ಮೂರನೇ ಎರಡರಷ್ಟು ಮಂದಿ ಇದ್ದು, ಕೊರೊನಾ ಬಿಕ್ಕಟ್ಟಿನ ಪರಿಣಾಮ ಎದುರಿಸುತ್ತಿದ್ದಾರೆ. ಈ ರಾಷ್ಟ್ರಗಳ ಆರ್ಥಿಕತೆಯ ಚೇತರಿಕೆಗಾಗಿ₹ 187 ಲಕ್ಷ ಕೋಟಿ (2.5 ಟ್ರಿಲಿಯನ್ ಡಾಲರ್) ಪ್ಯಾಕೇಜ್‌ಗಾಗಿ ವಿಶ್ವಸಂಸ್ಥೆ ಕರೆ ನೀಡಿದೆ.

ವಿಶ್ವಸಂಸ್ಥೆಯ ವ್ಯಾಪಾರ ಮತ್ತು ಅಭಿವೃದ್ಧಿ ಸಮಾವೇಶದ (UNCTAD) ವಿಶ್ಲೇಷಣೆ ಪ್ರಕಾರ, ಕೋವಿಡ್–19ರ ಪರಿಣಾಮವಾಗಿ ಸರಕು ಶ್ರೀಮಂತಿಕೆ ಹೊಂದಿರುವ ರಫ್ತು ಮಾಡುವ ರಾಷ್ಟ್ರಗಳಲ್ಲಿ ಮುಂದಿನ ಎರಡು ವರ್ಷಗಳಲ್ಲಿ ₹ 150–225 ಲಕ್ಷ ಕೋಟಿ (2–3 ಟ್ರಿಲಿಯನ್ ಡಾಲರ್‌ವರೆಗೆ) ಹೂಡಿಕೆ ಕಡಿತವಾಗಲಿದೆ.

ಇತ್ತೀಚಿನ ದಿನಗಳಲ್ಲಿ ಮುಂದುವರಿದ ಆರ್ಥಿಕತೆಗಳು ಮತ್ತು ಚೀನಾ ಬೃಹತ್ ಸರ್ಕಾರಿ ಪ್ಯಾಕೇಜ್‌ಗಳನ್ನು ಒಟ್ಟುಗೂಡಿಸಿವೆ. ಜಿ20 ರಾಷ್ಟ್ರಗಳೂ ₹ 375 ಲಕ್ಷ ಕೋಟಿಗೆ (5 ಟ್ರಿಲಿಯನ್ ಡಾಲರ್‌) ಆರ್ಥಿಕ ಸಹಕಾರ ವಿಸ್ತರಿಸಲಿವೆ ಎಂದು ಯುಎನ್‌ಸಿಟಿಎಡಿ ವರದಿ ಹೇಳಿದೆ.

ಇದು ಹಠಾತ್ ಸಂಭವಿಸಿದ ಬಿಕ್ಕಟ್ಟಿಗೆ ಅಭೂತಪೂರ್ವ ಪ್ರತಿಕ್ರಿಯೆಯಾಗಿದೆ. ಈ ಕ್ರಮವುಬಿಕ್ಕಟ್ಟಿನಿಂದ ಉಂಟಾದಆರ್ಥಿಕ, ದೈಹಿಕ ಮತ್ತು ಮಾನಸಿಕ ಆಘಾತವನ್ನು ಕಡಿಮೆ ಮಾಡಬಲ್ಲದು ಎಂದು ವರದಿಅಭಿಪ್ರಾಯಪಟ್ಟಿದೆ.

ಆರ್ಥಿಕ ಪ್ಯಾಕೇಜ್‌ಗಳ ಪೂರ್ತಿ ವಿವರ ಇನ್ನೂ ಬಹಿರಂಗವಾಗಿಲ್ಲ. ಆದರೂ ಆರಂಬಿಕ ಹಂತದಲ್ಲಿ ಜಿ20 ಆರ್ಥಿಕತೆಯ ಬೇಡಿಕೆಗೆ ಅನುಗುಣವಾಗಿ ₹ 75–150 ಲಕ್ಷ ಕೋಟಿ (1 –2 ಟ್ರಿಲಿಯನ್ ಡಾಲರ್‌) ವರೆಗೆ ಘೋಷಣೆಯಾಗಬಹುದೆಂದು ಅಂದಾಜಿಸಲಾಗಿದೆ ಎಂಬುದಾಗಿ ವರದಿ ತಿಳಿಸಿದೆ.

‘ಆದಾಗ್ಯೂ ವಿಶ್ವವು ಈ ವರ್ಷ ಆರ್ಥಿಕ ಹಿಂಜರಿತಕ್ಕೆ ಒಳಗಾಗಲಿದೆ. ಜಾಗತಿಕ ಆದಾಯದಲ್ಲಿ ಲಕ್ಷಾಂತರ ಕೋಟಿ ಡಾಲರ್‌ ನಷ್ಟವಾಗಲಿದೆ. ಇದು ಅಭಿವೃದ್ಧಿ ಹೊಂದುತ್ತಿರುವ ದೇಶಗಳಿಗೆ ಮಾರಕವಾಗಲಿದೆ. ಭಾರತ ಮತ್ತು ಚೀನಾ ಇದಕ್ಕೆ ಹೊರತಾಗುವ ಸಾಧ್ಯತೆ ಇದೆ’ ಎಂದು ವರದಿ ಉಲ್ಲೇಖಿಸಿದೆ.

ಆದರೆ, ಭಾರತ ಮತ್ತು ಚೀನಾ ಯಾಕೆ ಜಾಗತಿಕ ಆರ್ಥಿಕ ಹಿಂಜರಿತದಿಂದ ಹೊರತಾಗಿರಲಿವೆ ಎಂಬುದಕ್ಕೆ ಹೆಚ್ಚಿನ ವಿವರಣೆವರದಿಯಲ್ಲಿ ಇಲ್ಲ.