ನವದೆಹಲಿ: ದೇಶದಲ್ಲಿ ನಗದುರಹಿತ ವಹಿವಾಟಿಗೆ ಉತ್ತೇಜನ ನೀಡಲು ಕೇಂದ್ರ ಸರ್ಕಾರ ಹಲವು ಕ್ರಮಗಳನ್ನು ಕೈಗೊಂಡಿದ್ದರೂ ನಗದು ಚಲಾವಣೆ ಹೆಚ್ಚಾಗುತ್ತಲೇ ಇದೆ.
‘2019ರ ಮಾರ್ಚ್‌ ಅಂತ್ಯಕ್ಕೆ ₹ 21.10 ಲಕ್ಷ ಕೋಟಿ ಮೊತ್ತದ ನಗದು ಚಲಾವಣೆಯಲ್ಲಿದ್ದವು. 2016–17ರಲ್ಲಿ ₹ 13 ಲಕ್ಷ ಕೋಟಿ ಮತ್ತು 2017–18ರಲ್ಲಿ ₹ 18 ಲಕ್ಷ ಕೋಟಿ ಮೊತ್ತದ ನಗದು ಚಲಾವಣೆಯಲ್ಲಿ ಇತ್ತು’ ಎಂದು ಹಣಕಾಸು ರಾಜ್ಯ ಸಚಿವ ಅನುರಾಗ್‌ ಸಿಂಗ್‌ ಠಾಕೂರ್‌ ಅವರು ಲೋಕಸಭೆಗೆ ಲಿಖಿತ ಉತ್ತರ ನೀಡಿದ್ದಾರೆ.
‘ದೇಶದಲ್ಲಿ ನಗದು ವಹಿವಾಟನ್ನು ಸಂಪೂರ್ಣವಾಗಿ ತೆಗೆದುಹಾಕುವ ಯಾವುದೇ ಆಲೋಚನೆಯೂ ಸರ್ಕಾರಕ್ಕೆ ಇಲ್ಲ’ ಎಂದು ಅವರು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯೆ ನೀಡಿದ್ದಾರೆ.
ಕಪ್ಪುಹಣದ ಚಲಾವಣೆ ತಡೆಯಲು ಮತ್ತು ಡಿಜಿಟಲ್‌ ಆರ್ಥಿಕತೆಗೆ ಉತ್ತೇಜನ ನೀಡುವ ಉದ್ದೇಶದಿಂದ2016ರ ನವೆಂಬರ್‌ 8ರಂದು ₹ 500 ಮತ್ತು ₹ 1,000 ಮುಖಬೆಲೆಯ ನೋಟುಗಳ ಚಲಾವಣೆ ರದ್ದು ಮಾಡಲಾಗಿತ್ತು.
