ಮುಂಬೈ: ದೇಶದಲ್ಲಿ ಚಾಲ್ತಿ ಖಾತೆ ಕೊರತೆಯು (ಸಿಎಡಿ) ಪ್ರಸಕ್ತ ಹಣಕಾಸು ವರ್ಷದ ಜೂನ್‌ ತ್ರೈಮಾಸಿಕದಲ್ಲಿ ಒಟ್ಟು ಜಿಡಿಪಿಯ ಶೇ 1.1ಕ್ಕೆ (₹81,287 ಕೋಟಿ) ಏರಿಕೆ ಆಗಿದೆ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ ತಿಳಿಸಿದೆ.
ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ₹74,586 ಕೋಟಿಯಷ್ಟಾಗಿತ್ತು. ಸರಕುಗಳ ವ್ಯಾಪಾರ ಅಂತರವು ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ₹4.75 ಲಕ್ಷ ಕೋಟಿ ಆಗಿತ್ತು. ಅದು ಈ ಬಾರಿ ₹5.45 ಲಕ್ಷ ಕೋಟಿಗೆ ಹೆಚ್ಚಳ ಆಗಿದೆ.
ಸೇವಾ ವಲಯದ ನಿವ್ವಳ ಮೊತ್ತವು ₹3.32 ಲಕ್ಷ ಕೋಟಿಯಾಗಿದೆ. ದೇಶದಲ್ಲಿ ಕಂಪ್ಯೂಟರ್‌, ವ್ಯಾಪಾರ, ಪ್ರವಾಸಿ ಮತ್ತು ಪ್ರಯಾಣ ಸೇವೆಗಳು ಏರಿಕೆ ಕಂಡಿವೆ. ಆದರೆ, ನಿವ್ವಳ ವಿದೇಶಿ ಬಂಡವಾಳ ಹೂಡಿಕೆಯಲ್ಲಿ ₹7,543 ಕೋಟಿ ಇಳಿಕೆಯಾಗಿದೆ ಎಂದು ತಿಳಿಸಿದೆ.
ಅನಿವಾಸಿ ಭಾರತೀಯರ ಠೇವಣಿಗಳು ₹33,527 ಕೋಟಿ, ನಿವ್ವಳ ವಿದೇಶಿ ನೇರ ಹೂಡಿಕೆಯ ಹರಿವು ₹52,803 ಕೋಟಿಯಾಗಿದೆ ಎಂದು ಆರ್‌ಬಿಐ ಹೇಳಿದೆ.
