ಕಿರಣ್‌ ಶಾಗೆ ‘ಇವೈ’ ಜಾಗತಿಕ ಉದ್ಯಮಿ ಪ್ರಶಸ್ತಿ

41 ದೇಶಗಳ 46 ‘ಇವೈ’ ವರ್ಷದ ಉದ್ಯಮಿ ಪ್ರಶಸ್ತಿ ಪುರಸ್ಕೃತರ ಪೈಕಿ ಇವರಿಗೆ ಜಾಗತಿಕ ಪ್ರಶಸ್ತಿ ಒಲಿದಿದೆ.

ಈ ಪ್ರಶಸ್ತಿಯ 20 ವರ್ಷಗಳ ಇತಿಹಾಸದಲ್ಲಿ ಈ ಗೌರವಕ್ಕೆ ಪಾತ್ರರಾದ ದೇಶದ ಮೊದಲ ಮತ್ತು ವಿಶ್ವದ ಎರಡನೇ ಮಹಿಳೆ ಇವರಾಗಿದ್ದಾರೆ. ಪ್ರಶಸ್ತಿ ಪಡೆದ ಮೂರನೇ ಭಾರತೀಯರು ಇವರಾಗಿದ್ದಾರೆ. ಕೋಟಕ್‌ ಮಹೀಂದ್ರಾದ ಉದಯ್‌ ಕೋಟಕ್‌ (2014) ಮತ್ತು ಇನ್ಫೊಸಿಸ್‌ನ ಸಹ ಸ್ಥಾಪಕ ಎನ್‌. ಆರ್‌. ನಾರಾಯಣಮೂರ್ತಿ ಅವರು 2005ರಲ್ಲಿ ಈ ಗೌರವ ಪಡೆದಿದ್ದಾರೆ.

ಸಿಂಗಪುರದ ಹೈಫ್ಲಕ್ಸ್‌ ಲಿಮಿಟೆಡ್‌ನ ಒಲಿವಿಯಾ ಲಮ್‌ ಅವರು 2011ರಲ್ಲಿ ಈ ಗೌರವಕ್ಕೆ ಪಾತ್ರರಾಗಿದ್ದರು. ಗುರುವಾರ ರಾತ್ರಿ ವರ್ಚುವಲ್‌ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆದಿತ್ತು.

2019ರ ಸಾಲಿನ ದೇಶದ ‘ಇವೈ’ ವರ್ಷದ ಉದ್ಯಮಿ ಪ್ರಶಸ್ತಿಗೆ ಕಿರಣ್‌ ಅವರು ಈ ವರ್ಷದ ಫೆಬ್ರುವರಿಯಲ್ಲಿ ಭಾಜನರಾಗಿದ್ದರು. ‘ಇವೈ’ ಜಾಗತಿಕ ಉದ್ಯಮಿ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು.

‘ಬಯೊಕಾನ್‌ ವಹಿವಾಟಿನಲ್ಲಿ ಜಾಗತಿಕ ಆರೋಗ್ಯ ರಕ್ಷಣೆಗೆ ಒತ್ತು ನೀಡಲಾಗಿದೆ. ಜೀವ ರಕ್ಷಕ ಔಷಧಿಗಳು ಎಲ್ಲೆಡೆ ದೊರೆಯಬೇಕು ಎನ್ನುವುದು ಕಂಪನಿಯ ಧ್ಯೇಯವಾಗಿದೆ. ಉದ್ಯಮಿಯಾಗಿ ಷೇರುದಾರರ ಸಂಪತ್ತು ಹೆಚ್ಚಿಸುವುದಕ್ಕಿಂತ ನನ್ನ ಜವಾಬ್ದಾರಿ ಹೆಚ್ಚಿಗೆ ಇದೆ’ ಎಂದು ಕಿರಣ್‌ ಮಜುಂದಾರ್ ಶಾ ಹೇಳಿದ್ದಾರೆ.