ನವದೆಹಲಿ: ಭಾರತೀಯ ರಿಸರ್ವ್‌ ಬ್ಯಾಂಕ್ ನಿರ್ಬಂಧ ಹೇರಿರುವ ಬೆನ್ನಲ್ಲೇ ಕೋಟಕ್‌ ಮಹೀಂದ್ರ ಬ್ಯಾಂಕ್‌ನ ಷೇರಿನ ಮೌಲ್ಯವು ಗುರುವಾರ ಶೇ 12ರಷ್ಟು ಕುಸಿದಿದೆ.
ಒಂದೇ ದಿನ ಕಂಪನಿಯ ಮಾರುಕಟ್ಟೆ ಮೌಲ್ಯವು ₹39,768 ಕೋಟಿಯಷ್ಟು ಕರಗಿದೆ.
ಬಿಎಸ್‌ಇಯಲ್ಲಿ ಷೇರಿನ ಮೌಲ್ಯವು ಶೇ 10.85ರಷ್ಟು ಕುಸಿತ ಕಂಡಿದ್ದು, ಪ್ರತಿ ಷೇರಿನ ಬೆಲೆ ₹1,643 ಆಗಿದೆ. ದಿನದ ವಹಿವಾಟಿನ ಒಂದು ಸಂದರ್ಭದಲ್ಲಿ ಶೇ 12.10ರಷ್ಟು ಕುಸಿತ ಕಂಡಿತ್ತು.
ಎನ್‌ಎಸ್ಇಯಲ್ಲಿ ಷೇರಿನ ಮೌಲ್ಯವು ಶೇ 10.73ರಷ್ಟು ಕುಸಿತ ಕಂಡಿದ್ದು, ಪ್ರತಿ ಷೇರಿನ ಬೆಲೆಯು ₹1,645 ಆಗಿದೆ. ಒಂದು ಹಂತದಲ್ಲಿ ಶೇ 13ರಷ್ಟು ಕುಸಿತ ಕಂಡಿತ್ತು. ಸದ್ಯ ಕಂಪನಿಯ ಒಟ್ಟು ಎಂ–ಕ್ಯಾಪ್‌ ₹3.26 ಲಕ್ಷ ಕೋಟಿ ಆಗಿದೆ.
4ನೇ ಸ್ಥಾನಕ್ಕೆ ಜಿಗಿದ ಎಕ್ಸಿಸ್‌ ಬ್ಯಾಂಕ್:
ಕೋಟಕ್‌ ಬ್ಯಾಂಕ್‌ನ ಷೇರುಗಳ ಕುಸಿತವು ಎಕ್ಸಿಕ್‌ ಬ್ಯಾಂಕ್ ಪಾಲಿಗೆ ವರದಾನವಾಗಿದ್ದು, ದೇಶದಲ್ಲಿ ಅತಿಹೆಚ್ಚು ಎಂ–ಕ್ಯಾಪ್‌ ಹೊಂದಿದ ನಾಲ್ಕನೇ ಬ್ಯಾಂಕ್ ಆಗಿ ಹೊರಹೊಮ್ಮಿದೆ. ಎಕ್ಸಿಸ್‌ ಬ್ಯಾಂಕ್‌ನ ಒಟ್ಟು ಎಂ–ಕ್ಯಾಪ್‌ ₹3.38 ಲಕ್ಷ ಕೋಟಿ ಆಗಿದೆ.
ಎಚ್‌ಡಿಎಫ್‌ಸಿ ಬ್ಯಾಂಕ್ ಅತಿಹೆಚ್ಚು ಮಾರುಕಟ್ಟೆ ಮೌಲ್ಯ ಹೊಂದಿದ್ದು, ಪ್ರಥಮ ಸ್ಥಾನದಲ್ಲಿದೆ. ಐಸಿಐಸಿಐ ಬ್ಯಾಂಕ್ ದ್ವಿತೀಯ ಹಾಗೂ ಸ್ಟೇಟ್‌ ಬ್ಯಾಂಕ್ ಆಫ್‌ ಇಂಡಿಯಾವು ಮೂರನೇ ಸ್ಥಾನದಲ್ಲಿದೆ.
