ಮಹೀಂದ್ರ ಲಾಭದಲ್ಲಿ ಶೇ 94ರಷ್ಟು ಇಳಿಕೆ

ನವದೆಹಲಿ: ಮಹೀಂದ್ರ ಆ್ಯಂಡ್ ಮಹೀಂದ್ರ ಕಂಪನಿಯು ಮೊದಲ ತ್ರೈಮಾಸಿಕದ ಲಾಭದಲ್ಲಿ ಶೇಕಡ 94ರಷ್ಟು ಕುಸಿತ ದಾಖಲಿಸಿದೆ. ಹಿಂದಿನ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹ 894.11 ಕೋಟಿ ಲಾಭ ಕಂಡಿದ್ದ ಕಂಪನಿಯು, ಈ ತ್ರೈಮಾಸಿಕದಲ್ಲಿ ₹ 54.64 ಕೋಟಿ ಲಾಭ ಕಂಡಿದೆ.

ಈ ತ್ರೈಮಾಸಿಕದಲ್ಲಿ ಕಂಪನಿಯು ₹16,321 ಕೋಟಿ ಆದಾಯ ಕಂಡಿದೆ. ಕಳೆದ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕಂಪನಿಯ ಆದಾಯ ₹ 26,041 ಕೋಟಿ ಆಗಿತ್ತು. ಲಾಕ್‌ಡೌನ್‌ ಕಾರಣದಿಂದಾಗಿ ಕಂಪನಿಯ ಹಣಕಾಸಿನ ಫಲಿತಾಂಶದ ಮೇಲೆ ನಕಾರಾತ್ಮಕ ‍ಪರಿಣಾಮ ಉಂಟಾಗಿದೆ.

‘ಕೃಷಿ ಚಟುವಟಿಕೆಗಳಿಗೆ ಲಾಕ್‌ಡೌನ್‌ನಿಂದ ಸಕಾಲದಲ್ಲಿ ವಿನಾಯಿತಿ ನೀಡಿದ ಪರಿಣಾಮವಾಗಿ, ಟ್ರ್ಯಾಕ್ಟರ್‌ಗಳ ಮಾರಾಟದಲ್ಲಿ ಒಳ್ಳೆಯ ಮಾರಾಟ ಕಂಡುಬಂದಿದೆ’ ಎಂದು ಕಂಪನಿ ಹೇಳಿದೆ. ಮೊದಲ ತ್ರೈಮಾಸಿಕದಲ್ಲಿ ಭಾರತದ ಆಟೊಮೊಬೈಲ್‌ ಕ್ಷೇತ್ರವು (ದ್ವಿಚಕ್ರ ವಾಹನ ಮಾರಾಟ ಹೊರತುಪಡಿಸಿ) ಹಿಂದಿನ ವರ್ಷದ ತ್ರೈಮಾಸಿಕಕ್ಕೆ ಹೋಲಿಸಿದರೆ ಶೇಕಡ 81.5ರಷ್ಟು ಇಳಿಕೆ ದಾಖಲಿಸಿದೆ.