ಡಿಸೆಂಬರ್ ತ್ರೈಮಾಸಿಕ: ಒಎನ್‌ಜಿಸಿ ನಿವ್ವಳ ಲಾಭ ₹ 8,764 ಕೋಟಿಗೆ ಏರಿಕೆ

ಹಿಂದಿನ ಹಣಕಾಸು ವರ್ಷ ಇದೇ ಅವಧಿಯಲ್ಲಿ ಇದ್ದ ₹1,258 ಕೋಟಿ ನಿವ್ವಳ ಲಾಭಕ್ಕೆ ಹೋಲಿಸಿದರೆ ಈ ಬಾರಿ ಲಾಭವು ಶೇ 596.7ರಷ್ಟು ಏರಿಕೆ ಆಗಿದೆ ಎಂದು ಕಂಪನಿಯು ಪ್ರಕಟಣೆಯಲ್ಲಿ ತಿಳಿಸಿದೆ.

ತೈಲ ಮತ್ತು ಅನಿಲ ದರಗಳಲ್ಲಿ ಆಗಿರುವ ಹೆಚ್ಚಳವನ್ನು ಉತ್ಪಾದನೆಯಲ್ಲಿ ಆಗಿರುವ ಕುಸಿತದೊಂದಿಗೆ ಸರಿದೂಗಿಸಿದ ಬಳಿಕ ಈ ಪ್ರಮಾಣದ ಲಾಭ ಆಗಿದೆ ಎಂದು ಕಂಪನಿಯು ಹೇಳಿದೆ.

ಕಂಪನಿಯ ವರಮಾನ ಶೇ 67.3ರಷ್ಟು ಹೆಚ್ಚಾಗಿದ್ದು ₹ 28,474 ಕೋಟಿಗಳಿಗೆ ತಲುಪಿದೆ. ಪ್ರಸಕ್ತ ಹಣಕಾಸು ವರ್ಷದ ಮೊದಲ ಒಂಭತ್ತು ತಿಂಗಳುಗಳಲ್ಲಿ ನಿವ್ವಳ ಲಾಭವು ₹ 4,512 ಕೋಟಿಗಳಿಂದ ₹ 31,446 ಕೋಟಿಗಳಿಗೆ ಏರಿಕೆ ಕಂಡಿದೆ. ಇದೇ ಅವಧಿಯಲ್ಲಿ ವರಮಾನವು ಶೇ 61.5ರಷ್ಟು ಹೆಚ್ಚಾಗಿ ₹ 75,849 ಕೋಟಿಗಳಿಗೆ ತಲುಪಿದೆ.

ಪ್ರತಿ ಷೇರಿಗೆ ₹ 1.75ರಷ್ಟು ಎರಡನೇ ಮಧ್ಯಂತರ ಲಾಭಾಂಶ ನೀಡಲು ಆಡಳಿತ ಮಂಡಳಿಯು ಒಪ್ಪಿಗೆ ನೀಡಿದೆ ಎಂದು ಕಂಪನಿಯು ಹೇಳಿದೆ. ಮೊದಲ ಮಧ್ಯಂತರ ಲಾಭಾಂಶವಾಗಿ ಪ್ರತಿ ಷೇರಿಗೆ ₹ 5.50 ರಷ್ಟು ನೀಡುವುದಾಗಿ ಕಂಪನಿಯು 2021ರ ನವೆಂಬರ್‌ನಲ್ಲಿ ಘೋಷಿಸಿತ್ತು.