5ನೇ ದಿನವೂ ಷೇರುಪೇಟೆ ಕುಸಿತ

ಮುಂಬೈ : ‘ಕೋವಿಡ್‌–19’ ಪ್ರಭಾವಕ್ಕೆ ಸಿಲುಕಿ ದೇಶದ ಷೇರುಪೇಟೆಗಳು ಸತತ ಐದನೇ ದಿನವೂ ಕುಸಿತ ಕಂಡಿವೆ.

ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕವು ದಿನದ ವಹಿವಾಟಿನಲ್ಲಿ 466 ಅಂಶಗಳವರೆಗೂ ಕುಸಿತ ಕಂಡಿತ್ತು. ನಂತರ ವಹಿವಾಟು ತುಸು ಚೇತರಿಕೆ ಕಂಡಿದ್ದರಿಂದ 143 ಅಂಶ ಇಳಿಕೆಯೊಂದಿಗೆ 39,746 ಅಂಶಗಳಲ್ಲಿ ವಹಿವಾಟು ಅಂತ್ಯವಾಗಿದೆ.

ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ ನಿಫ್ಟಿ 45 ಅಂಶ ಇಳಿಕೆಕಂಡು 11,634 ಅಂಶಗಳಲ್ಲಿ ವಹಿವಾಟು ಅಂತ್ಯಗೊಂಡಿದೆ.

ಸರ್ಕಾರಿ ಬಾಂಡ್‌ಗಳ ಫೆಬ್ರುವರಿ ತಿಂಗಳ ವಾಯಿದಾ ವಹಿವಾಟು ಗುರುವಾರ ಮುಕ್ತಾಯವಾಗಿರುವುದು ಸಹ ಚಂಚಲ ವಹಿವಾಟಿಗೆ ಕಾರಣವಾಯಿತು. ಮೂರನೇ ತ್ರೈಮಾಸಿಕದಲ್ಲಿ ಜಿಡಿಪಿ ಬೆಳವಣಿಗೆ ದರ ಶೇ 4.5ರಷ್ಟರುವ ಅಂದಾಜು ಮಾಡಿರುವುದು ಸಹ ನಕಾರಾತ್ಮಕ ಚಲನೆಯನ್ನು ಹೆಚ್ಚಿಸಿತು ಎಂದು ತಜ್ಞರು ವಿಶ್ಲೇಷಣೆ ಮಾಡಿದ್ದಾರೆ.

ವಿದೇಶಿ ಬಂಡವಾಳ ಹೊರಹರಿವು: ವಿದೇಶಿ ಹೂಡಿಕೆದಾರರು (ಎಫ್‌ಪಿಐ) ಮಾರಾಟಕ್ಕೆ ಹೆಚ್ಚಿನ ಗಮನ ನೀಡಿದ್ದಾರೆ. ವಾರದ ವಹಿವಾಟಿನಲ್ಲಿ ಇದುವರೆಗೆ ₹ 6,812 ಕೋಟಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ.

ವಹಿವಾಟಿನ ವಿವರ

₹ 6.1 ಲಕ್ಷ ಕೋಟಿ - ನಾಲ್ಕು ದಿನಗಳಲ್ಲಿ ಕರಗಿರುವ ಸಂಪತ್ತು

1,424 ಅಂಶ - 5 ದಿನಗಳಲ್ಲಿ ಬಿಎಸ್‌ಇ ಇಳಿಕೆ

447 ಅಂಶ - 5 ದಿನಗಳಲ್ಲಿ ನಿಫ್ಟಿ ಇಳಿಕೆ