ಮುಂಬೈ: 2019–20ರಲ್ಲಿ ಉದಾರವಾಗಿ ದಾನ ನೀಡಿದವರ ಸಾಲಿನಲ್ಲಿ ವಿಪ್ರೊ ಕಂಪನಿಯ ಅಜೀಮ್ ಪ್ರೇಮ್ಜಿ ಅವರು ಮುಂಚೂಣಿಯಲ್ಲಿದ್ದಾರೆ.
ಪ್ರೇಮ್ಜಿ ಅವರು ದಿನಕ್ಕೆ ₹ 22 ಕೋಟಿ (ವಾರ್ಷಿಕ ₹7,904 ಕೋಟಿ) ದಾನ ನೀಡಿದ್ದಾರೆ. ಈ ಮೂಲಕ 2018–19ರಲ್ಲಿ ಅತಿ ಹೆಚ್ಚು ದಾನ ಮಾಡಿದ್ದ ಎಚ್ಸಿಎಲ್ ಟೆಕ್ನಾಲಜೀಸ್ನ ಸ್ಥಾಪಕ ಶಿವ ನಾಡರ್ ಅವರನ್ನು ಹಿಂದಿಕ್ಕಿದ್ದಾರೆ ಎಂದು ಹುರುನ್ ಇಂಡಿಯಾ ಮತ್ತು ಎಡೆಲ್ಗಿವ್ ಫೌಂಡೇಷನ್ ವರದಿ ತಿಳಿಸಿದೆ.
ನಾಡರ್ ಅವರು ವಾರ್ಷಿಕ ₹ 795 ಕೋಟಿ ದಾನ ಮಾಡಿದ್ದು ಎರಡನೇ ಸ್ಥಾನದಲ್ಲಿದ್ದಾರೆ. ಹಿಂದಿನ ಬಾರಿ ₹ 826 ಕೋಟಿ ದಾನ ಮಾಡಿದ್ದರು. ಆಗ ಪ್ರೇಮ್ಜಿ ಮಾಡಿದ್ದ ದಾನದ ಮೊತ್ತ ₹ 426 ಕೋಟಿಗಳಷ್ಟಿತ್ತು.
ದೇಶದ ಅತ್ಯಂತ ಸಿರಿವಂತ ಉದ್ಯಮಿ ಮುಕೇಶ್ ಅಂಬಾನಿ ಅವರು ವಾರ್ಷಿಕ ₹458 ಕೋಟಿ ದಾನ ನೀಡುವ ಮೂಲಕ ಮೂರನೇ ಸ್ಥಾನದಲ್ಲಿದ್ದಾರೆ. ಕಳೆದ ಬಾರಿ ಅವರು ₹ 402 ಕೋಟಿ ದಾನ ನೀಡಿದ್ದರು.
ಕೊರೊನಾ ನಿಯಂತ್ರಿಸಲು ದಾನ ನೀಡಿರುವ ಉದ್ಯಮಿಗಳ ಪಟ್ಟಿಯಲ್ಲಿ ಟಾಟಾ ಸನ್ಸ್ ₹ 1,500 ಕೋಟಿ ಯೊಂದಿಗೆ ಮುಂಚೂಣಿಯಲ್ಲಿ ಇದ್ದರೆ, ಪ್ರೇಮ್ ಜೀ ಅವರು ₹ 1,125 ಕೋಟಿ ಹಾಗೂ ಅಂಬಾನಿ ₹ 510 ಕೋಟಿ ನೀಡುವ ಮೂಲಕ ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನದಲ್ಲಿದ್ದಾರೆ.