ಪ್ರಶ್ನೋತ್ತರ: ಹಣಕಾಸು, ತೆರಿಗೆ ಸಮಸ್ಯೆಗೆ ಪರಿಹಾರ

ನೀವು ನೀಡಿರುವ ಮಾಹಿತಿಯಂತೆ ನಿಮಗೆ ನಿವೃತ್ತಿ ವೇತನ ಹಾಗೂ ಪ್ರಸ್ತುತ ಉದ್ಯೋಗದಲ್ಲಿರುವ ಖಾಸಗಿ ಕಂಪನಿಯಿಂದಲೂ ವೇತನ ಬರುತ್ತಿದೆ. ಇದಲ್ಲದೆ, ಮಾಸಿಕ ಬಾಡಿಗೆ ಆದಾಯವೂ ಬರುತ್ತಿದೆ. ವೇತನ ಆದಾಯಕ್ಕೆ ಸಂಬಂಧಿಸಿ ನಿಮ್ಮ ಆಯ್ಕೆ ಹಳೆಯ ತೆರಿಗೆ ಪದ್ಧತಿಯಾಗಿದ್ದರೆ, ವೇತನದ ವಿವಿಧ ಅಂಶಗಳಿಗೆ ಸಂಬಂಧಿಸಿ ಸಂಸ್ಥೆ ಎಲ್ಲರಿಗೂ ಅನ್ವಯವಾಗುವ ರಿಯಾಯಿತಿಗಳನ್ನು (ಸೆಕ್ಷನ್ 10) ನಿಮಗೂ ನೀಡಿರುತ್ತದೆ. ಉದಾಹರಣೆಗೆ ರಜಾ ಬಾಕಿಯ ನಗದೀಕರಣ ಇತ್ಯಾದಿ. ಉಳಿದಂತೆ ಸೆಕ್ಷನ್ 80ಸಿ ವಿನಾಯಿತಿಗೆ ಸಂಬಂಧಿಸಿ ಈಗಾಗಲೇ ನೀವು ಗರಿಷ್ಠ ಹೂಡಿಕೆ ಮಾಡಿದ್ದೀರಿ. ಯಾವುದೇ ತೆರಿಗೆ ಪದ್ಧತಿಯನ್ನು ಆಯ್ಕೆ ಮಾಡಿದರೂ ನಿಮಗೆ ಒಟ್ಟಾರೆ ₹50 ಸಾವಿರದ ಸ್ಟ್ಯಾಂಡರ್ಡ್ ಡಿಡಕ್ಷನ್ ವಿನಾಯಿತಿ ಇದೆ.  

ಸೆಕ್ಷನ್ 80ಸಿಸಿಡಿ (1ಬಿ) ಇದರಡಿ ಯಾವುದೇ ತೆರಿಗೆ ಪದ್ಧತಿಯನ್ನು ಆಯ್ಕೆ ಮಾಡಿದರೂ ಹೆಚ್ಚುವರಿ ₹50 ಸಾವಿರ ವಿನಾಯಿತಿ ಪಡೆಯುವುದಕ್ಕೆ ಇನ್ನೂ ಅವಕಾಶವಿದೆ. ಇದಕ್ಕೆ ಅರ್ಜಿ ಸಲ್ಲಿಸುವ ಸಂದರ್ಭದಲ್ಲಿ ಹೂಡಿಕೆದಾರ ವಯಸ್ಸು 18ರಿಂದ 70 ವರ್ಷದ ಒಳಗಿರಬೇಕು. ಇನ್ನು ನೀವು ಪಡೆದ ವಾಹನ ಸಾಲಕ್ಕೆ ಪ್ರಸ್ತುತ ಯಾವುದೇ ರಿಯಾಯಿತಿ ಇರುವುದಿಲ್ಲ.

ನನ್ನ ಪ್ರಶ್ನೆ ಏನೆಂದರೆ, ನನ್ನ ತಂಗಿಯ ವೈದ್ಯಕೀಯ ವೆಚ್ಚಕ್ಕೆ ನಾನು ಯಾವುದಾದರೂ ಆದಾಯ ತೆರಿಗೆಯ ಸೌಲಭ್ಯ ಪಡೆಯಬಹುದೇ? ಇದಕ್ಕೆ ಏನೆಲ್ಲಾ ಷರತ್ತುಗಳಿವೆ. ತೆರಿಗೆ ವಿನಾಯಿತಿಯನ್ನು ಕೇವಲ ಸ್ವತಃ ಸಮಸ್ಯೆ ಇದ್ದ ಸಂದರ್ಭದಲ್ಲಿ ಮಾತ್ರ ಪಡೆಯಬಹುದೇ ಅಥವಾ ನಮ್ಮ ಕುಟುಂಬದ ಮಂದಿಯ ಸಮಸ್ಯೆಗೂ ಅನ್ವಯಿಸುತ್ತದೆಯೇ? ಖರ್ಚು ಮಾಡಿದ ಬಗ್ಗೆ ಯಾವುದಾದರೂ ಬಿಲ್, ವರದಿ ಇತ್ಯಾದಿ ಇಟ್ಟುಕೊಳ್ಳಬೇಕೇ. ಈ ಬಗ್ಗೆ ತಿಳಿಸಿ.
 
ಉತ್ತರ: ಕೆಲವು ನಿರ್ದಿಷ್ಟ ಆರೋಗ್ಯ ಸಮಸ್ಯೆಗಳಿದ್ದ ಸಂದರ್ಭದಲ್ಲಿ ಆದಾಯ ತೆರಿಗೆ ಕಾನೂನಿನಡಿ ವಿನಾಯಿತಿ ಕಲ್ಪಿಸಲಾಗಿದೆ. ಇದು ಸ್ವತಃ ತೆರಿಗೆದಾರನಿಗೆ ಇರುವ ಆರೋಗ್ಯ ಸಮಸ್ಯೆ ಆಗಿರಬಹುದು ಅಥವಾ ಕುಟುಂಬದ ಸದಸ್ಯರಿಗೆ ಇರಬಹುದು. ಒಂದು ವೇಳೆ ಕುಟುಂಬದ ಮಂದಿಗೆ ಇರುವ ಆರೋಗ್ಯ ಸಮಸ್ಯೆಗೆ ತೆರಿಗೆ ವಿನಾಯಿತಿ ಪಡೆಯಲು ಅಂತಹ ವ್ಯಕ್ತಿಯನ್ನು ತೆರಿಗೆದಾರ ನೋಡಿಕೊಳ್ಳುತ್ತಿರಬೇಕು. ಈ ಎರಡೂ ಸೌಲಭ್ಯಗಳು ಕ್ರಮಾಗತವಾಗಿ ಸೆಕ್ಷನ್ 80ಯು ಹಾಗೂ ಸೆಕ್ಷನ್ 80ಡಿಡಿ ಇದರಡಿ ಲಭ್ಯವಿವೆ. ನಿಮಗೆ ಸಂಬಂಧಿಸಿದಂತೆ ಸೆಕ್ಷನ್ 80ಡಿಡಿ ಇದರಡಿ ತೆರಿಗೆ ಸೌಲಭ್ಯ ಸಿಗುತ್ತದೆ.  

ನಿವಾಸಿ ಭಾರತೀಯನಾಗಿರುವ ಯಾವುದೇ ವ್ಯಕ್ತಿ ನಿರ್ದಿಷ್ಟ ಆರೋಗ್ಯ ಸಮಸ್ಯೆ ಇರುವ ತನ್ನ ಕುಟುಂಬದ ವ್ಯಕ್ತಿಗಳ ಆರೈಕೆ, ತಪಾಸಣೆ, ತರಬೇತಿ, ಪುನರ್ವಸತಿ ಇತ್ಯಾದಿಗೆ ಸಂಬಂಧಿಸಿ ವೆಚ್ಚ ಭರಿಸಿರಬೇಕು. ಆಥವಾ ಭಾರತೀಯ ವಿಮಾ ನಿಗಮ ಅಥವಾ ಇತರೆ ಮಾನ್ಯತೆ ಪಡೆದ ವಿಮಾ ಕಂಪನಿಗಳಲ್ಲಿ ಹಣ ನಿಕ್ಷೇಪಿಸಿ ಕುಟುಂಬದ ಸದಸ್ಯರನ್ನು ಮುಂದೆ ನೋಡಿಕೊಳ್ಳಲು ಯಾವುದೇ ಪಾವತಿ ಮಾಡಿದ್ದರೂ ಅಂತಹ ಮೊತ್ತಕ್ಕೆ ತೆರಿಗೆ ರಿಯಾಯಿತಿ ಇದೆ.

ಒಬ್ಬ ವ್ಯಕ್ತಿಗೆ ಸಂಬಂಧಪಟ್ಟಂತೆ ಇಲ್ಲಿ ಹೇಳಿರುವ ಕುಟುಂಬದ ಸದಸ್ಯರೆಂದರೆ ಪತಿ–ಪತ್ನಿ, ಮಕ್ಕಳು, ಪೋಷಕರು, ವ್ಯಕ್ತಿಯ ಸಹೋದರರು ಮತ್ತು ಸಹೋದರಿಯರು ಒಳಗೊಳ್ಳುತ್ತಾರೆ. ನಿಮ್ಮ ಸನ್ನಿವೇಶದಲ್ಲಿ ನಿಮ್ಮ ತಂಗಿಯ ಶ್ರವಣದೋಷದ ನಿವಾರಣೆ ಬಗ್ಗೆ ಮಾಡುವ ವೆಚ್ಚಕ್ಕೆ ಈ ತೆರಿಗೆ ರಿಯಾಯಿತಿ ಸಿಗುತ್ತದೆ. ಅಂಗವೈಕಲ್ಯ ಶೇ 80ಕ್ಕಿಂತ ಹೆಚ್ಚಿದ್ದರೆ ₹1.25 ಲಕ್ಷದ ತನಕ ಆದಾಯದಲ್ಲಿ ವಿನಾಯಿತಿ ಲಭ್ಯ. ಈ ಪ್ರಮಾಣವು ಶೇ 40ಕ್ಕಿಂತ ಹೆಚ್ಚು ಇದ್ದ ಸಂದರ್ಭದಲ್ಲಿ ₹75 ಸಾವಿರ ವಿನಾಯಿತಿ ಪಡೆಯಬಹುದು. ಆದಾಯ ತೆರಿಗೆ ರಿಟರ್ನ್ಸ್‌ ಸಲ್ಲಿಸುವಾಗ ನೀವು ನಿಗದಿತ ಫಾರಂ (ಫಾರಂ 10ಐಎ) ಭರ್ತಿ ಮಾಡಿರಬೇಕು. ಇಂತಹ ಸಮಸ್ಯೆ ಇರುವುದನ್ನು ಖಚಿತಪಡಿಸಿ ದೃಢೀಕರಿಸಿರುವ ವೈದ್ಯಕೀಯ ಪ್ರಮಾಣ ಪತ್ರದ ಪ್ರತಿಯನ್ನೂ ಹೊಂದಿರಬೇಕು.

ಇಲ್ಲಿ ಗಮನಿಸಬೇಕಾದ ಇನ್ನೊಂದು ಅಂಶವೆಂದರೆ, ಸಮಸ್ಯೆಯ ಪ್ರಮಾಣಕ್ಕೆ ಅನುಗುಣವಾಗಿ ನಿಶ್ಚಿತ ರಿಯಾಯಿತಿ ಸಿಗುತ್ತದೆ. ಹಾಗಾಗಿ, ವೆಚ್ಚಕ್ಕೆ ನೇರ ಸಂಬಂಧ ಕಲ್ಪಿಸದೆ ಆರೋಗ್ಯ ಸಮಸ್ಯೆ ಮುಂದುವರಿಯುತ್ತಿರುವ ಹಿನ್ನೆಲೆ ಹಾಗೂ ಊರ್ಜಿತದಲ್ಲಿರುವ ವೈದ್ಯಕೀಯ ಪ್ರಮಾಣ ಪತ್ರದ ಆಧಾರದ ಮೇಲೆ ತೆರಿಗೆದಾರರಿಗೆ ರಿಯಾಯಿತಿ ಲಭ್ಯವಾಗುತ್ತದೆ. ನೀವು ಹೊಸ ತೆರಿಗೆ ಪದ್ಧತಿ ಅನುಸರಿಸುತ್ತಿದ್ದರೆ ಈ ತೆರಿಗೆ ಸೌಲಭ್ಯ ನಿಮಗೆ ಸಿಗುವುದಿಲ್ಲ ಎಂಬುದು ಗಮನದಲ್ಲಿ ಇರಲಿ.