ಮುಂಬೈ: ದೇಶದ ಷೇರುಪೇಟೆಗಳು ನಾಲ್ಕು ದಿನಗಳ ನಕಾರಾತ್ಮಕ ವಹಿವಾಟಿನಿಂದ ಬುಧವಾರ ಹೊರಬಂದಿವೆ. ಹೂಡಿಕೆ ಚಟುವಟಿಕೆ ಹೆಚ್ಚಾಗಿ ಸೂಚ್ಯಂಕಗಳು ಏರಿಕೆ ಕಂಡಿವೆ.
‘ಕೋವಿಡ್–19’ ವೈರಸ್ ಸೋಂಕಿಗೆ ತುತ್ತಾಗುತ್ತಿರುವ ಹೊಸ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗಿದೆ. ಇದರ ಜತೆಗೆ ದೇಶಿ ಉದ್ಯಮದ ಮೇಲೆ ವೈರಸ್ನಿಂದ ಆಗಬಹುದಾದ ಪರಿಣಾಮ ತಡೆಯಲು ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳುವುದಾಗಿ ಸರ್ಕಾರ ಭರವಸೆ ನೀಡಿದೆ. ಈ ಅಂಶಗಳು ಸೂಚ್ಯಂಕದ ಏರಿಕೆಗೆ ನೆರವಾದವು.
ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ 429 ಅಂಶ ಜಿಗಿತ ಕಂಡು 41,323 ಅಂಶಗಳಲ್ಲಿ ವಹಿವಾಟು ಅಂತ್ಯಗೊಂಡಿದೆ.ಹೂಡಿಕೆದಾರರ ಸಂಪತ್ತು ₹ 2.06 ಲಕ್ಷ ಕೋಟಿಗಳಷ್ಟು ವೃದ್ಧಿಯಾಗಿದೆ. ಷೇರುಪೇಟೆಯ ಬಂಡವಾಳ ಮೌಲ್ಯ ₹ 156.65 ಲಕ್ಷ ಕೋಟಿಗಳಿಂದ ₹ 158.71 ಲಕ್ಷ ಕೋಟಿಗಳಿಗೆ ಏರಿಕೆಯಾಗಿದೆ.