ಬೆಂಗಳೂರಿನಲ್ಲೊಂದು ಪುಟ್ಟ ಜಪಾನ್

ಎಂಭತ್ತರ ದಶಕದಲ್ಲಿ ಇರಾನ್‌ನಿಂದ ಸಾವಿರಾರು ವಿದ್ಯಾರ್ಥಿಗಳು ಬೆಂಗಳೂರಿಗೆ ಓದಲು ಬಂದಿದ್ದರು. ಬೈಕ್ ಹತ್ತಿಕೊಂಡು ಬೀದಿ ಬೀದಿ ಸುತ್ತುತ್ತಿದರು. ಹೆಚ್ಚು ಬಾಡಿಗೆ ಕೊಟ್ಟು ಮನೆಗಳನ್ನು ಪಡೆಯುತ್ತಿದ್ದರು. ಅಲ್ಲೊಂದು ಇಲ್ಲೊಂದು ಜಗಳವನ್ನೂ ಆಡುತ್ತಿದ್ದರು. ಹಾಗಾಗಿ ಅವರು ಬೆಂಗಳೂರಿನಲ್ಲಿದ್ದದ್ದು ಎಲ್ಲರಿಗೂ ಗೊತ್ತಿತ್ತು. ಅವರ ಬಗ್ಗೆ ಜನ ಮಾತಾಡಿಕೊಳ್ಳುತ್ತಿದ್ದರು.

ಇರಾನಿ ಹುಡುಗರಲ್ಲಿ ಕೆಲವರು ಮಾಡುತ್ತಿದ್ದ ಧಾಮ್ ಧೂಮ್ ಸ್ಥಳೀಯರಲ್ಲಿ ಸಿಟ್ಟು, ಅಸೂಯೆ ಹುಟ್ಟಿಸುತ್ತಿತ್ತು. ಆದರೆ ಎಲ್ಲ ವಿದೇಶಿಯರೂ ಹಾಗಿರುವುದಿಲ್ಲ. ಇಂದು ಜಪಾನ್ ದೇಶದ ಹಲವರು ಬೆಂಗಳೂರಿಗೆ ಬಂದು ನೆಲೆಸಿದ್ದಾರೆ. ಆದರೆ ಅವರ ಬಗ್ಗೆ ಕಂಡು ಕೇಳಿದವರು ವಿರಳ. ಅವರ ಜೊತೆ ಕೆಲಸ ಮಾಡುವವರನ್ನು ಬಿಟ್ಟರೆ ಬೇರೆಯವರಿಗೆ ಅವರ ಪರಿಚಯವಿಲ್ಲ.

ಬೆಂಗಳೂರಿನಲ್ಲಿನ ಜಪಾನೀಯರ ಬಗ್ಗೆ ಮಾರ್ಗೋ ಕೋಹೆನ್ ಎಂಬ ಪತ್ರಕರ್ತೆ ಒಂದಷ್ಟು ಮಾಹಿತಿ ಹೊರತೆಗೆದಿದ್ದಾರೆ. ಪ್ರತಿ ವರ್ಷ ಸುಮಾರು 18,000 ಜನ ಆ ದೇಶದಿಂದ ಬೆಂಗಳೂರಿಗೆ ಉದ್ಯೋಗದ ಮೇಲೆ ಪ್ರಯಾಣ ಬೆಳೆಸುತ್ತಾರೆ. ಅವರಿಗೆ ಅನುಕೂಲವಾಗುವಂತೆ ರೆಸಿಡೆನ್ಸಿ ರಸ್ತೆಯ ಒಂದು ಹೋಟೆಲ್ ತನ್ನ ಫರ್ನಿಚರ್ ಮತ್ತು ಬಾತ್ ಟಬ್ ಗಳನ್ನು ಬದಲಾಯಿಸುತ್ತಿದೆ. ಹೊಸ ವಿನ್ಯಾಸಗಾರರು ಕೆಲಸದಲ್ಲಿ ತೊಡಗಿದ್ದಾರೆ. ಯುರೋಪಿಯನ್ ಶೈಲಿ ಹೋಗಿ ಜಪಾನಿ ಶೈಲಿ ಅಲ್ಲಿ ಬೇರೂರುತ್ತಿದೆ. ಟೊಯೋಟಾ ಸಂಸ್ಥೆಯ ಹಿರಿಯ ಉದ್ಯೋಗಿಗಳಿಗಾಗಿಯೇ ಜಪಾನೀ ಮಸಾಜ್ ತಜ್ಞೆಯೊಬ್ಬರು ಬಂದಿದ್ದಾರೆ.

ಭಾರತದಲ್ಲಿ ಇಂದು ಡೆಲ್ಲಿ ಬಿಟ್ಟರೆ ಬೆಂಗಳೂರಿನಲ್ಲಿಯೇ ಹೆಚ್ಚು ಜಪಾನ್ ಪ್ರಜೆಗಳು ಇರುವುದು. ಅವರು ಇತರ ನಗರಗಳಿಗಿಂತ ಬೆಂಗಳೂರನ್ನು ಇಷ್ಟ ಪಡುವುದಕ್ಕೆ ಒಂದು ಕಾರಣ ಗಾಲ್ಫ್ ಕೋರ್ಸ್ ಗಳಂತೆ. ಮೈಸೂರ್ ರಸ್ತೆಯ ಗಾಲ್ಫ್ ಕೋರ್ಸ್ ಒಂದರಲ್ಲಿ ಜಪಾನೀ ಭಾಷೆ ಮಾತಾಡುವ ಸಹಾಯಕರೂ ಇದ್ದಾರೆ.

ಇನ್ನು ಇಲ್ಲಿ ಕಟ್ಟುತ್ತಿರುವ ಮೆಟ್ರೋ ಸುರಂಗಗಳ ಮೇಲ್ವಿಚಾರಣೆ ಮಾಡುತ್ತಿರುವುದು ರೆಯ್ಕೋ ಅಬೆ ಎಂಬ ಮಹಿಳ ಇಂಜಿನಿಯರ್. ಬಿಡುವಿನಲ್ಲಿ ಕಾದಂಬರಿ ಬರೆಯುವ ಈಕೆ ಇನ್ನೊಂದು ವರ್ಷ ಇಲ್ಲಿದ್ದು, ಕೆಲಸ ಮುಗಿದ ಮೇಲೆ ಬಾಂಗ್ಲಾದೇಶಕ್ಕೆ ಹೊರಡಲು ಅಣಿಯಾಗಿದ್ದಾರೆ. ಕಜೂಮ ಕುಬೋಕಿ ಎಂಬ ಹಾಡುಗಾರ 2003 ರಿಂದ ಬೆಂಗಳೂರಿನಲ್ಲಿ ಇದ್ದಾರೆ. ಕನ್ನಡ ಕಲಿತಿದ್ದಾರೆ. ಗಂಧದ ಗುಡಿ, ಆಕಸ್ಮಿಕ ಮತ್ತು ಮುಂಗಾರು ಮಳೆ ಚಿತ್ರಗಳ ಹಾಡನ್ನು ಅಭ್ಯಾಸ ಮಾಡಿದ್ದಾರೆ. ಮೆಗುಮಿ ಸಕಕಿದ ಎಂಬ ಚಿತ್ರಕಲಾ ಪರಿಷತ್ ವಿದ್ಯಾರ್ಥಿ ಕುಂದಾಪುರವನ್ನು ತುಂಬ ಹಚ್ಚಿಕೊಂಡಿದ್ದಾರೆ.  ಕನ್ನಡ ಸಾಹಿತ್ಯವನ್ನೂ ಅಭ್ಯಾಸ ಮಾಡುತ್ತಿದ್ದಾರೆ.

ಬೆಂಗಳೂರಿನಲ್ಲಿರುವ ಜಪಾನೀ ಕಂಪನಿಗಳ ಸಂಖ್ಯೆ 229. ಇಲ್ಲೆೀ ನೆಲೆಸಿರುವ ಜಪಾನೀ ಪ್ರಜೆಗಳ ಸಂಖ್ಯೆ 886. ಇದು ಅಂತ ದೊಡ್ಡ ಸಂಖ್ಯೆ ಅನಿಸದಿದ್ದರೂ, ಜಪಾನಿಯರಿಗೆ ಬೆಂಗಳೂರು ಪ್ರಿಯವಾಗಿದೆ. ಬರುವ ವರ್ಷಗಳಲ್ಲಿ ಇನ್ನೂ ಹೆಚ್ಚು ಹೆಚ್ಚು ಇಲ್ಲಿಗೆ ಬರುವುದರಲ್ಲಿ ಸಂಶಯವಿಲ್ಲ. ಅವರನ್ನೇ ಮನಸಿನಲ್ಲಿಟ್ಟುಕೊಂಡು ಒಂದು ಟ್ರಾವೆಲ್ ಏಜನ್ಸಿ ಕೂಡ ಶುರುವಾಗಿದೆ.

ಜಪಾನಿಯರು ಶೋ ಆಫ್ ಮಾಡುವುದಿಲ್ಲ. ಕೆಲಸ ಕಟ್ಟುನಿಟ್ಟಾಗಿ ಮಾಡುವ ಖ್ಯಾತಿ ಅವರದು. ಕೆಲವು ವಿಷಯಗಳಲ್ಲಿ ಅತಿಯೆನಿಸುವ ಧೋರಣೆ ಅವರದು ಎಂದು ಸಹೋದ್ಯೋಗಿಗಳು ಒಮ್ಮಮ್ಮೆ ದೂರುತ್ತಾರೆ. ಕೆಲಸದ ಸ್ಥಳದಲ್ಲಿ ಅವರಿಗೂ ಭಾರತೀಯರಿಗೂ ಹೊಂದಾಣಿಕೆಯಾಗದ ಪ್ರಸಂಗಗಳ ಬಗ್ಗೆಯೂ ಒಂದೆರಡು ಬಾರಿ ನನ್ನ ಕಿವಿಗೆ ಬಿದ್ದಿದೆ. ಆದರೆ ಇಲ್ಲಿಯ ಜನರೊಂದಿಗೆ ಸ್ನೇಹದಿಂದ ಬೆರೆಯುವ ಮನಸು ಅವರಲ್ಲಿ ಹಲವರದು. ಹಾಗಾಗಿ ಇಲ್ಲಿ ಇರಾನಿಯರಿಗೂ ಸ್ಥಳೀಯರಿಗೂ ಇದ್ದ ವೈಮನಸ್ಯ ನನಗಂತೂ ಕಾಣುತ್ತಿಲ್ಲ. ಆದರೆ ಅವರು ಯಾರ ಕಣ್ಣಿಗೂ ಅಷ್ಟಾಗಿ ಬೀಳುವುದಿಲ್ಲ.

ಮರೆಯಾದ ಸಂಗೀತ ದಿಗ್ಗಜರು