ಜಿಲ್ಲಾ ಬಿಜೆಪಿ ಕಾರ್ಯವೈಖರಿ ಶೋಚನೀಯ: ಸ್ಥಳೀಯ ಮುಖಂಡರ ಅಸಮಾಧಾನ

7
ಯಾವೊಬ್ಬ ವರಿಷ್ಠರು ಕೇಳ್ತಿಲ್ಲ; ನಾವೇ ಹೇಳ್ಬೇಕೋ ಗೊತ್ತಾಗ್ತಿಲ್ಲ

ಜಿಲ್ಲಾ ಬಿಜೆಪಿ ಕಾರ್ಯವೈಖರಿ ಶೋಚನೀಯ: ಸ್ಥಳೀಯ ಮುಖಂಡರ ಅಸಮಾಧಾನ

Published:
Updated:

ವಿಜಯಪುರ: ‘ಮೂವರು ಶಾಸಕರು, ಒಬ್ಬರು ವಿಧಾನ ಪರಿಷತ್‌ ಸದಸ್ಯರು, ಜಿಲ್ಲಾ ಪಂಚಾಯ್ತಿಯ ಇಪ್ಪತ್ತು ಸದಸ್ಯರ ಬಲದ ಜತೆಗೆ ಕೇಂದ್ರ ಸಚಿವರು, ಸಾಕಷ್ಟು ಸಂಖ್ಯೆಯ ತಾಲ್ಲೂಕು ಪಂಚಾಯ್ತಿ, ಪಟ್ಟಣ ಪಂಚಾಯ್ತಿ ಸದಸ್ಯರು ಸೇರಿದಂತೆ ಮಾಜಿ ಶಾಸಕ–ಸಚಿವರನ್ನು ಹೊಂದಿರುವ ವಿಜಯಪುರ ಜಿಲ್ಲಾ ಬಿಜೆಪಿ ಘಟಕ ಶೋಚನೀಯ ಸ್ಥಿತಿಯಲ್ಲಿದೆ...

ಪಕ್ಷದ ಚುಕ್ಕಾಣಿ ಹಿಡಿದಿದ್ದ ಸಾರಥಿಯೇ ‘ಕೈ’ ವಶವಾದ ಬಳಿಕ ಮತ್ತೊಬ್ಬ ಸಮರ್ಥ ಸಾರಥಿ ನೇಮಿಸದಿದ್ದರಿಂದ ಜಿಲ್ಲೆಯಲ್ಲಿ ಪಕ್ಷದ ಸಂಘಟನೆಗೆ ತೀವ್ರ ಹೊಡೆತ ಬಿದ್ದಿದೆ... ಇದರ ಪರಿಣಾಮವೇ ಈಚೆಗೆ ನಡೆದ ವಿಧಾನ ಪರಿಷತ್ ಚುನಾವಣೆಯಲ್ಲಿ ತೀವ್ರ ಮುಖಭಂಗ ಅನುಭವಿಸಿದ್ದೇವೆ...’ ಜಿಲ್ಲಾ ಬಿಜೆಪಿ ಘಟಕದ ಪ್ರಮುಖ ಮುಖಂಡರ ನುಡಿಗಳಿವು.

ವಿಜಯಪುರ, ಬಾಗಲಕೋಟೆ ಜಿಲ್ಲೆಯ ವ್ಯಾಪ್ತಿಯಲ್ಲಿ ಸಾಕಷ್ಟು ಸಂಖ್ಯಾ ಬಲ ಹೊಂದಿದ್ದರೂ; ಸ್ಥಳೀಯ ಸಂಸ್ಥೆಗಳಿಂದ ವಿಧಾನ ಪರಿಷತ್‌ನ ತೆರವಾದ ಒಂದು ಸ್ಥಾನಕ್ಕೆ ನಡೆದ ಚುನಾವಣೆಯಲ್ಲಿ ಭಾರಿ ಮುಖಭಂಗ ಅನುಭವಿಸಿದರೂ ಯಾರೊಬ್ಬರೂ ಅವಳಿ ಜಿಲ್ಲಾ ರಾಜಕಾರಣದ ಚಿತ್ರಣದ ಮಾಹಿತಿ ಪಡೆಯದಿರುವುದು ಜಿಲ್ಲಾ ಬಿಜೆಪಿ ಮುಖಂಡರಲ್ಲೇ ಬೇಸರ ಮೂಡಿಸಿದೆ.

‘ಪ್ರತಿ ಚುನಾವಣೆಯ ಫಲಿತಾಂಶ ಪ್ರಕಟಗೊಂಡ ಎರಡ್ಮೂರು ದಿನಗಳಲ್ಲೇ ರಾಜ್ಯದ ವರಿಷ್ಠರು ಮಾಹಿತಿ ಪಡೆಯುತ್ತಿದ್ದರು. ಸೋತರೆ ಆತ್ಮಾವಲೋಕನ ಮಾಡಿಕೊಳ್ಳುತ್ತಿದ್ದರು. ವರಿಷ್ಠರೇ ಜಿಲ್ಲೆಗೆ ಭೇಟಿ ನೀಡಿ ಎಲ್ಲಿ ? ಏನಾಗಿದೆ ? ಸೋಲು ಏಕಾಯ್ತು ಎಂಬುದರ ಸವಿಸ್ತಾರ ಚಿತ್ರಣದ ವರದಿ ಕೇಳುತ್ತಿದ್ದರು.

ಸ್ಥಳೀಯ ಸಂಸ್ಥೆಗಳಿಂದ ವಿಧಾನ ಪರಿಷತ್‌ಗೆ ನಡೆದ ಚುನಾವಣೆಯಲ್ಲಿ ಭಾರಿ ಮುಖಭಂಗ ಅನುಭವಿಸಿದ ಬಳಿಕ ಈ ಕುರಿತಂತೆ ಯಾರೊಬ್ಬರೂ ಈ ವಿಷಯ ಪ್ರಸ್ತಾಪಿಸುತ್ತಿಲ್ಲ. ಏಕೆ ಎಂದು ಕೇಳುತ್ತಿಲ್ಲ. ಯಾವ ಆತ್ಮಾವಲೋಕನವೂ ನಡೆದಿಲ್ಲ. ಇದನ್ನು ಗಮನಿಸಿದರೆ ಪೂರ್ವ ನಿಯೋಜಿತ ಕೊಲೆ ನಡೆದ ಚಿತ್ರಣ ಭಾಸವಾದಂತಾಗಿದೆ. ಅದಕ್ಕೆ ವರಿಷ್ಠರು ಸಹ ಈ ವಿಷಯದಲ್ಲಿ ಏನನ್ನು ಕೇಳದೆ ಮೌನಕ್ಕೆ ಶರಣಾಗಿದ್ದಾರೆ’ ಎಂದು ಜಿಲ್ಲಾ ಬಿಜೆಪಿ ಮುಖಂಡರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದರು.

ಹರಕೆಯ ಕುರಿಯೇ ?

‘ಚುನಾವಣೆಯನ್ನು ವರಿಷ್ಠರು ಗಂಭೀರವಾಗಿ ಪರಿಗಣಿಸಿದ್ದರು. ರಾಜ್ಯ ಪ್ರಧಾನ ಕಾರ್ಯದರ್ಶಿಯೇ ವಿಜಯಪುರ ಜಿಲ್ಲೆಯಲ್ಲೇ ಮತದಾನಕ್ಕೂ ಮೂರ್ನಾಲ್ಕು ದಿನ ಮುಂಚಿತವಾಗಿಯೇ ಠಿಕಾಣಿ ಹೂಡಿದ್ದರು.

ಬಬಲೇಶ್ವರ ಶಾಸಕ, ಕಾಂಗ್ರೆಸ್‌ನ ಪ್ರಭಾವಿ ಮುಖಂಡ ಎಂ.ಬಿ.ಪಾಟೀಲ ಜತೆಗೆ ಜಿಲ್ಲಾ ಬಿಜೆಪಿ ಹೊಂದಿದ್ದ ಆತ್ಮೀಯ ಸಖ್ಯದ ಅರಿವಿದ್ದೇ ಎಲ್ಲರನ್ನೂ ಒಂದೇ ವೇದಿಕೆಗೆ ಕರೆ ತಂದು ಗೆಲುವಿನ ರೂಪುರೇಷೆ ರೂಪಿಸಿದ್ದರು. ಮತದಾನದ ಬಳಿಕವೇ ಇಲ್ಲಿಂದ ಕದಲಿದ್ದರು.

ಚುನಾವಣೆ ಆರಂಭದಿಂದಲೇ ಕಮಲ ಪಾಳೆಯ ಸೇರಿದಂತೆ ಕೈ ಪಡೆಯಲ್ಲೂ ಗೂಳಪ್ಪ ಶಟಗಾರ ಡಮ್ಮಿ ಅಭ್ಯರ್ಥಿ ಎಂಬ ಚರ್ಚೆಯೇ ನಡೆದಿತ್ತು. ಚುನಾವಣೆ ನಂತರದ ಚಿತ್ರಣವನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಇದೀಗ ನಿಜ ಅನಿಸಲಾರಂಭಿಸಿದೆ. ಗೂಳಪ್ಪ ಹರಕೆಯ ಕುರಿಯಾದರು’ ಎಂದು ಸಂಘ ಪರಿವಾರ ಮೂಲದ ಬಿಜೆಪಿ ಮುಖಂಡರೊಬ್ಬರು ‘ಪ್ರಜಾವಾಣಿ’ ಬಳಿ ಬೇಸರ ವ್ಯಕ್ತಪಡಿಸಿದರು.

‘ವರಿಷ್ಠರು ರಾಜ್ಯದಲ್ಲಿ ಸರ್ಕಾರ ರಚನೆಯ ಕಸರತ್ತಿನಲ್ಲಿ ತೊಡಗಿದ್ದಾರೆ. ಇದಕ್ಕೆ ನಮ್ಮ ಆಕ್ಷೇಪವಿಲ್ಲ. ಚುನಾವಣೆಯ ಉಸ್ತುವಾರಿ ಹೊತ್ತಿದ್ದ ರವಿಕುಮಾರ್‌ ಇದೂವರೆಗೂ ನಮ್ಮೊಟ್ಟಿಗೆ ಫಲಿತಾಂಶದ ಬಳಿಕ ಒಮ್ಮೆಯೂ ಚರ್ಚಿಸಿಲ್ಲ. ನಮ್ಮಲ್ಲೇ ಎಲ್ಲರನ್ನೂ ಈ ಬಗ್ಗೆ ಪ್ರಶ್ನಿಸಿದಾಗ ನಮಗೂ ಕೇಳಿಲ್ಲ ಎಂಬ ಉತ್ತರವೇ ಸಿಕ್ಕಿದೆ.

ವಿಜಯಪುರ ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳರಿಂದ ವರದಿ ಪಡೆದಿದ್ದಾರೋ ?, ಕೇಂದ್ರ ಸಚಿವ ರಮೇಶ ಜಿಗಜಿಣಗಿ ಅವರಿಂದ ವರದಿ ಪಡೆದಿದ್ದಾರೋ ತಿಳಿಯದಾಗಿದೆ. ಇಬ್ಬರೂ ನಾಯಕರ ಆಪ್ತ ವಲಯ ಸಹ ಈ ವಿಷಯದಲ್ಲಿ ಏನನ್ನೂ ಚರ್ಚಿಸಿಲ್ಲ. ಅಕ್ಷರಶಃ ಈ ಎಲ್ಲವನ್ನೂ ಗಮನಿಸಿದರೆ ಜಿಲ್ಲಾ ಬಿಜೆಪಿ ಶೋಚನೀಯ ಸ್ಥಿತಿ ಎದುರಿಸುತ್ತಿದೆ’ ಎಂದು ಅವರು ಹೇಳಿದರು.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !