7
ರೈತರ ಉತ್ಪನ್ನಗಳಿಗೆ ಬೆಂಬಲ ಬೆಲೆ ಘೋಷಿಸಲು ಎಸ್‌.ಕೆ. ಬೆಳ್ಳುಬ್ಬಿ ಆಗ್ರಹ

ಆರು ತಿಂಗಳಿಗೊಮ್ಮೆ ಲೆಕ್ಕ ಕೇಳುವೆ

Published:
Updated:

ವಿಜಯಪುರ: ‘ವಿಜಯಪುರ ನಗರ, ಜಿಲ್ಲೆಯ ಅಭಿವೃದ್ಧಿಗಾಗಿ ಹಾಲಿ ಶಾಸಕರು, ಸಂಸದರು ಏನು ಮಾಡಿದ್ದಾರೆ ? ಎಂಬುದರ ಜತೆಗೆ ಕೇಂದ್ರದ ಬಿಜೆಪಿ ನೇತೃತ್ವದ ಸರ್ಕಾರಕ್ಕೂ ಇನ್ಮುಂದೆ ಪ್ರತಿ ಆರು ತಿಂಗಳಿಗೊಮ್ಮೆ ಲೆಕ್ಕ ಕೇಳುವೆ’ ಎಂದು ಮಾಜಿ ಸಚಿವ ಎಸ್‌.ಕೆ.ಬೆಳ್ಳುಬ್ಬಿ ತಿಳಿಸಿದರು.

‘ನಗರ ಶಾಸಕ, ಸಂಸದ ಜಂಟಿಯಾಗಿ ವಿಜಯಪುರವನ್ನು ಸ್ಮಾರ್ಟ್‌ ಸಿಟಿಯನ್ನಾಗಿ ಘೋಷಿಸಲು ಕೇಂದ್ರ ಸರ್ಕಾರದ ಮೇಲೆ ಒತ್ತಡ ಹಾಕಬೇಕು. ವಿಮಾನ ನಿಲ್ದಾಣ ನಿರ್ಮಿಸಬೇಕು. ಸ್ಮಾರಕಗಳನ್ನು ಸಂರಕ್ಷಿಸುವ ಜತೆಗೆ, ಅಭಿವೃದ್ಧಿಗೊಳಿಸಬೇಕು. ಈ ಕೆಲಸ ನಡೆಯದಿದ್ದರೇ ಎಲ್ಲರನ್ನೂ ಲೆಕ್ಕ ಕೇಳುವೆ’ ಎಂದು ಮಂಗಳವಾರ ಇಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

‘ಅಭಿವೃದ್ಧಿಯ ವಿಷಯದಲ್ಲಿ ರಾಜಿಯೇ ಇಲ್ಲ. ಚುನಾವಣೆಯಲ್ಲಿ ಸೋತರೂ ನನಗೆ ಸಂಬಂಧವೇ ಇಲ್ಲ ಎಂದು ಕೂರಲ್ಲ. ವಿವಿಧ ವಿಷಯಗಳನ್ನು ಕೇಂದ್ರೀಕರಿಸಿಕೊಂಡು ಆರು ತಿಂಗಳಿಗೊಮ್ಮೆ ಇನ್ಮುಂದೆ ಲೆಕ್ಕ ಕೇಳುವೆ’ ಎಂದು ಬೆಳ್ಳುಬ್ಬಿ ತಿಳಿಸಿದರು.

‘ವಿಜಯಪುರದಲ್ಲಿ ಸ್ಲಂ ಇಲ್ಲ. ಸ್ಲಂನೊಳಗೆ ವಿಜಯಪುರವಿದೆ. ಒಂದೊಂದು ಮಾರಿನಷ್ಟೇ ಮನೆಯಿವೆ. ಕೇಂದ್ರದಲ್ಲಿ ಮೋದಿ ನೇತೃತ್ವದ ಸರ್ಕಾರ ಅಸ್ತಿತ್ವಕ್ಕೆ ಬಂದ ಮೇಲೆ ಮನೆಗಳನ್ನೇ ವಿಜಯಪುರ ನಗರಕ್ಕೆ ಮಂಜೂರು ಮಾಡಿಲ್ಲ. ಮೋದಿ, ಮೋದಿ ಎಂದು ಕೂಗಿದ ಯುವಕರ ಕೈಗೆ ಕೆಲಸವನ್ನೇ ನೀಡಿಲ್ಲ’ ಎಂದು ಬೆಳ್ಳುಬ್ಬಿ ವಾಗ್ದಾಳಿ ನಡೆಸಿದರು.

15 ದಿನದ ಗಡುವು: ‘ಉಳ್ಳಾಗಡ್ಡಿ ಧಾರಣೆ ಮಾರುಕಟ್ಟೆಯಲ್ಲಿ ತೀವ್ರ ಕುಸಿದಿದೆ. ಬೆಳೆಗಾರರು ಕಣ್ಣೀರಿಡುತ್ತಿದ್ದಾರೆ. ರೈತರು ಬೆಳೆದ ಉತ್ಪನ್ನಗಳಿಗೆ ಕೇಂದ್ರದಲ್ಲಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರ ಅಸ್ತಿತ್ವಕ್ಕೆ ಬಂದ ಬಳಿಕ ಸೂಕ್ತ ಬೆಲೆಯೇ ಸಿಗದಾಗಿದೆ. ಒಳ್ಳೆಯ ದಿನಗಳ ಬದಲು ಕರಾಳ ದಿನ ಎದುರಾಗುತ್ತಿದೆ’ ಎಂದು ಮಾಜಿ ಸಚಿವರು ಆಕ್ರೋಶ ವ್ಯಕ್ತಪಡಿಸಿದರು.

‘ರೈತರಿಗೆ ಉಚಿತ ಗ್ಯಾಸ್ ಬೇಕಿಲ್ಲ. ತಾವು ಬೆಳೆದ ಉತ್ಪನ್ನಕ್ಕೆ ನ್ಯಾಯೋಚಿತ ಬೆಲೆ ಸಿಕ್ಕರಷ್ಟೇ ಸಾಕು. ಆದರೆ ಕಳೆದ ನಾಲ್ಕು ವರ್ಷಗಳಿಂದ ರಾಜ್ಯವೂ ಸೇರಿದಂತೆ ದೇಶದ ರೈತರ ಸ್ಥಿತಿ ಕಷ್ಟಕ್ಕೆ ಸಿಲುಕಿದೆ. ಯಾವೊಂದು ಉತ್ಪನ್ನಕ್ಕೂ ನ್ಯಾಯೋಚಿತ ಧಾರಣೆ ಸಿಗದಾಗಿದೆ.

15 ದಿನದ ಗಡುವು ನೀಡಲಾಗುವುದು. ಅಷ್ಟರೊಳಗೆ ಬೆಂಬಲ ಬೆಲೆ ಘೋಷಿಸಿ, ಉಳ್ಳಾಗಡ್ಡಿ ಖರೀದಿಸದಿದ್ದರೇ ಉಗ್ರ ಸ್ವರೂಪದ ಹೋರಾಟ ಹಮ್ಮಿಕೊಳ್ಳಲಾಗುವುದು. ಆದಷ್ಟು ಶೀಘ್ರದಲ್ಲೇ ತೊಗರಿ, ಕಡಲೆ ಬೆಳೆಗಾರರ ಬ್ಯಾಂಕ್‌ ಖಾತೆಗೂ ತಕ್ಷಣವೇ ಹಣ ಜಮೆ ಮಾಡಬೇಕು’

ಎಂದು ಬೆಳ್ಳುಬ್ಬಿ ಇದೇ ಸಂದರ್ಭ ಆಗ್ರಹಿಸಿದರು.

ಜೆಡಿಎಸ್‌ ಬೆಳೆಸುವೆ...: ‘ವಿಜಯಪುರ ಜಿಲ್ಲೆ ಸೇರಿದಂತೆ ಉತ್ತರ ಕರ್ನಾಟಕದಲ್ಲಿ ಜೆಡಿಎಸ್‌ ಬಲವರ್ಧನೆಗೆ ನನ್ನ ರಾಜಕೀಯ ಜೀವನ ಮೀಸಲಿಡುವೆ. ವರಿಷ್ಠರು ನೀಡಿದ ಕೆಲಸ ಮಾಡಿಕೊಂಡಿರುವೆ’ ಎಂದು ಬೆಳ್ಳುಬ್ಬಿ ಹೇಳಿದರು.

ಈ ಹಿಂದೆಯೂ ಇದೇ ರೀತಿ ಜಿಲ್ಲೆಯ ಇಬ್ಬರೂ ನಾಯಕರು ಹೇಳಿ, ಇದೀಗ ಬಿಜೆಪಿ ತೆಕ್ಕೆಯಲ್ಲಿದ್ದಾರೆ. ನೀವು ಅದೇ ಹಾದಿ ತುಳಿಯುತ್ತೀರಾ ಎಂಬ ಪ್ರಶ್ನೆಗೆ ‘ನಾನೊಬ್ಬ ರೈತ. ಬಡವ. ಹೋರಾಟಗಾರ. ನುಡಿದಂಗೆ ನಡೆಯುತ್ತೇನೆ. ಪಕ್ಷವನ್ನು ದಂಡೆಗೆ ಹಚ್ತೇನೆ. ಕೆಲ ದಿನಗಳು ಗಮನಿಸಿ. ಜೆಡಿಎಸ್‌ ಎಷ್ಟು ಬಲವರ್ಧನೆಯಾಗಲಿದೆ ಎಂಬುದು ನಿಮಗೆ ತಿಳಿಯಲಿದೆ. ಜಿಲ್ಲೆಯ ಜನ ಪಕ್ಷಕ್ಕೆ ಲಕ್ಷ, ಲಕ್ಷ ಸಂಖ್ಯೆಯಲ್ಲಿ ಮತ ನೀಡಿದ್ದಾರೆ. ಇದನ್ನು ಮತ್ತಷ್ಟು ಹೆಚ್ಚಿಸಿಕೊಳ್ತೇವೆ’ ಎಂದು ಪ್ರತಿಕ್ರಿಯಿಸಿದರು.

**

ದುಡ್ಡು ತೆಗೆದುಕೊಂಡು ರಾಜಕಾರಣ ಮಾಡುವವ ನಾನಲ್ಲ. ನನಗೊಬ್ಬರೇ ತಂದೆ. ಸೂಟ್‌ಕೇಸ್‌ ಮುತ್ಯಾ ಎಂದವರು.. ಸಾಬೀತುಪಡಿಸಲಿ – ಎಸ್‌.ಕೆ.ಬೆಳ್ಳುಬ್ಬಿ, ಮಾಜಿ ಸಚಿವ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry