ತೇರದಾಳ: ಆರೋಗ್ಯ ಇಲಾಖೆ, ತೇರದಾಳ ಪ್ರಾಥಮಿಕ ಆರೋಗ್ಯ ಕೇಂದ್ರದ ಮೂಲಕ ಸಮೀಪದ ಸಸಾಲಟ್ಟಿಯಲ್ಲಿ`ಲಸಿಕಾ ಮೇಳ' ನಡೆಸಿದ್ದು, ಕೋವಿಡ್ ಲಸಿಕೆ ಪಡೆಯಲು ಆಗಮಿಸಿದ ಸಂದರ್ಭದಲ್ಲಿ ನೂಕುನುಗ್ಗಲಾದ ಘಟನೆ ಸೋಮವಾರ ನಡೆದಿದೆ.
`ಲಸಿಕೆ ಮೇಳ' ನಡೆಸಲು ಸರ್ಕಾರದಿಂದ 250 ಡೋಸ್‌ ಲಸಿಕೆ ಗ್ರಾಮಕ್ಕೆ ಬರುವ ಸುದ್ದಿ ಭಾನುವಾರ ಹರಡಿತ್ತು. ಸೋಮವಾರ ಬೆಳಗಾಗುತ್ತಿದ್ದಂತೆ ಜನರ ದಂಡು ಲಸಿಕಾ ಕೇಂದ್ರದ ಮುಂದೆ ಜಮಾಯಿಸಿತು. ಜನರ ನೂಕಾಟ ಆರಂಭವಾಗಿದೆ.
ಗ್ರಾಮ ಪಂಚಾಯ್ತಿ ಜನರ ಗದ್ದಲ ತಡೆಯುವಲ್ಲಿ ವಿಫಲಾವಾಗಿದ್ದು, ಪೊಲೀಸರು ಬಂದ ನಂತರ ಪರಿಸ್ಥಿತಿ ಹತೋಟಿಗೆ ಬಂತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು.
ಲಸಿಕೆ ಪಡೆಯಲು 18 ವಯಸ್ಸಿಗಿಂತ ಮೇಲ್ಪಟ್ಟವರು ಹಾಗೂ 45 ವಯಸ್ಸಿಗಿಂತ ಮೇಲ್ಪಟ್ಟವರು ಸರದಿಯಲ್ಲಿದ್ದರು. ಲಸಿಕಾ ಮೇಳಕ್ಕೆ 500 ಡೋಸ್‌ ಲಸಿಕೆ ಕೊಡಬೇಕೆಂದು ಆದೇಶವಿದ್ದರೂ, ಸಿಬ್ಬಂದಿ ಹಾಗೂ ಲಸಿಕೆ ಕೊರತೆ ಇದ್ದಿದ್ದರಿಂದ ಕೇವಲ 256 ಡೋಸ್‌ ಲಸಿಕೆ ನೀಡಲಾಯಿತು ಎಂದು ಅಲ್ಲಿನ ಸಿಬ್ಬಂದಿ ತಿಳಿಸಿದರು.
ಲಸಿಕೆ ಪಡೆಯಲು ಮಹಿಳೆಯರು ಸೇರಿದಂತೆ ನಾಲ್ಕು ನೂರರಷ್ಟು ಜನ ಸೇರಿದ್ದು, ಅದರಲ್ಲಿ ಕೆಲವರು ಮೊದಲ ಹಾಗೂ ಕೆಲವರು ಎರಡನೇ ಲಸಿಕೆ ಪಡೆಯಲು ಬಂದಿದ್ದರು. ಲಸಿಕೆ ದೊರೆಯದೆ ಕೆಲವರು ನಿರಾಸೆಯಿಂದ ತೆರಳಬೇಕಾಯಿತು.
ಗ್ರಾಮ ಪಂಚಾಯ್ತಿ ಪಿಡಿಒ ಸಂತೋಷ ಪೂಜೇರಿ, ಆರೋಗ್ಯ ಇಲಾಖೆ ಸಿಬ್ಬಂದಿ ಅಣ್ಣಪ್ಪ ಕೋಳಿ, ಅಂಜನಾ ಹೂಗಾರ ಇದ್ದರು.
