ಬಾಗಲಕೋಟೆ: ಕೋವಿಡ್ ದೃಢಪಟ್ಟಿರುವ ಮಾಹಿತಿ ಮುಚ್ಚಿಟ್ಟು ಉಳಿದ ಸಿಬ್ಬಂದಿಯ ಜೊತೆ ಬೆರೆತು ಕೆಲಸ ಮಾಡಿದ್ದ ಮುಧೋಳ ತಾಲ್ಲೂಕು ಆಸ್ಪತ್ರೆ ಫಾರ್ಮಾಸಿಸ್ಟ್ ಅವರನ್ನು ಜಿಲ್ಲಾಧಿಕಾರಿ ಗುರುವಾರ ಅಮಾನತು ಮಾಡಿದ್ದಾರೆ.
ಫಾರ್ಮಾಸಿಸ್ಟ್ಗೆ ಎರಡು ದಿನಗಳ ಹಿಂದೆ ಕೋವಿಡ್ ಪಾಸಿಟಿವ್ ವರದಿ ಬಂದಿದೆ. ಆ ಮಾಹಿತಿ ಮುಚ್ಚಿಟ್ಟು ಎಲ್ಲರೊಂದಿಗೆ ಬೆರೆತಿದ್ದಾರೆ.
ಆಸ್ಪತ್ರೆಯಲ್ಲಿ ಓಡಾಡಿ ಎರಡು ದಿನ ಕೆಲಸ ಮಾಡಿದ್ದಾರೆ. ತನಗೆ ಸೋಂಕು ದೃಢಪಟ್ಟಿರುವ ವಿಚಾರ ಯಾರಿಗೂ ಹೇಳದಂತೆ ವಿಷಯ ಗೊತ್ತಿದ್ದ ಅಧೀನ ಸಿಬ್ಬಂದಿಗೂ ತಾಕೀತು ಮಾಡಿದ್ದರು ಎನ್ನಲಾಗಿದೆ.
ವಿಷಯ ಬಹಿರಂಗವಾಗುತ್ಯಿದ್ದಂತೆಯೇ ಆಸ್ಪತ್ರೆಯಲ್ಲಿ ಆತಂಕದ ವಾತಾವರಣ ಸೃಷ್ಟಿಯಾಗಿದೆ. ಫಾರ್ಮಾಸಿಸ್ಟ್ ಸಂಪರ್ಕಕ್ಕೆ ಬಂದ ಎಲ್ಲರನ್ನೂ ಕೋವಿಡ್ ತಪಾಸಣೆಗೆ ಒಳಪಡಿಸಲಾಗುತ್ತಿದೆ ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ಡಾ.ಅನಂತ ದೇಸಾಯಿ ತಿಳಿಸಿದ್ದಾರೆ.
