ಕಡಿಮೆ ಬೆಲೆಗೆ ಗೃಹ ಬಳಕೆ ವಸ್ತು ಆಮಿಷ: ಲಕ್ಷಾಂತರ ರೂಪಾಯಿ ವಂಚನೆ

ತಮಿಳುನಾಡು ಮೂಲದ ಆರ್ಮುಗಂ ಎಂಬ ವ್ಯಕ್ತಿ ತಿಂಗಳ ಹಿಂದೆ ನೆರಳೂರಿನಲ್ಲಿ ರಾಬಿನ್‌ ಹೋಮ್‌ ನೀಡ್ಸ್‌ ಹೆಸರಿನ ಗೃಹೋಪಯೋಗಿ ವಸ್ತುಗಳ ಮಳಿಗೆ ತೆರೆದಿದ್ದ. ಟಿವಿ, ಸೋಫಾ, ಫ್ರಿಡ್ಜ್‌, ವಾಷಿಂಗ್‌ ಮೆಷಿನ್‌, ಮಿಕ್ಸಿ ಸೇರಿದಂತೆ ಗೃಹ ಬಳಕೆಯ ಸಾಮಗ್ರಿಗಳನ್ನು ಕಡಿಮೆ ಬೆಲೆಗೆ ಮಾರಾಟ ಮಾಡುವ ಮೂಲಕ ಈ ಭಾಗದ ಜನರ ವಿಶ್ವಾಸ ಗಳಿಸಿದ್ದ.

ಹಣ ಪಾವತಿಸಿದ ತಿಂಗಳ ನಂತರ ಕಡಿಮೆ ಬೆಲೆಗೆ ವಸ್ತುಗಳನ್ನು ನೀಡುವುದಾಗಿ ಹೇಳಿ ನೆರಳೂರು, ಹೆನ್ನಾಗರ, ಚಂದಾಪುರ ಭಾಗಗಳಲ್ಲಿ ಭಾರಿ ಪ್ರಚಾರ ನಡೆಸಿದ್ದ ಆತ ಒಂದು ತಿಂಗಳಲ್ಲಿ ಅನೇಕರಿಗೆ ಗೃಹ ಬಳಕೆ ವಸ್ತುಗಳನ್ನು ಮಾರಾಟ ಕೂಡ ಮಾಡಿದ್ದ.

ಕಡಿಮೆ ಬೆಲೆಗೆ ವಸ್ತುಗಳು ಸಿಗುವುದು ಖಾತ್ರಿಯಾಗುತ್ತಲೇ ಮುಗಿಬಿದ್ದ ಗ್ರಾಹಕರು ಮುಂಗಡವಾಗಿ ಹಣ ಪಾವತಿಸಿದ್ದರು. ಲಕ್ಷಾಂತರ ರೂಪಾಯಿ ಸಂಗ್ರಹವಾಗುತ್ತಲೇ ಆರ್ಮುಗಂ ಬುಧವಾರ ರಾತ್ರಿ ಅಂಗಡಿ ಮತ್ತು ಮನೆ ಖಾಲಿ ಮಾಡಿ ತನ್ನ ತಂಡದೊಂದಿಗೆ ಪರಾರಿಯಾಗಿದ್ದಾನೆ.  

ಗುರುವಾರ ಅಂಗಡಿ ತೆರೆಯದಿದ್ದರಿಂದ ಆತಂಕಗೊಂಡ ಜನರು ಮಳಿಗೆಯ ಮುಂದೆ ಜಮಾಯಿಸಿದ್ದರು. ಹಣ ಕಳೆದುಕೊಂಡ ಹಲವಾರು ಮಹಿಳೆಯರು ಅಂಗಡಿಯ ಮುಂದೆ ಪ್ರತಿಭಟನೆ ನಡೆಸಿದರು. 

ಅಂದಾಜು 500-600 ಮಹಿಳೆಯರು ಮುಂಗಡ ಹಣ ಪಾವತಿಸಿದ್ದು, ಒಂದು ಅಂದಾಜಿನ ಪ್ರಕಾರ ಆರ್ಮುಗಂ ₹50 ಲಕ್ಷಕ್ಕೂ ಹೆಚ್ಚು ಹಣ ಸಂಗ್ರಹಿಸಿರುವ ಮಾಹಿತಿ ಇದೆ. ಅತ್ತಿಬೆಲೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ, ಮಳಿಗೆ ಬಾಡಿಗೆ ನೀಡಿದ್ದ ಮಾಲೀಕನಿಂದ ಮಾಹಿತಿ ಸಂಗ್ರಹಿಸಿದ್ದಾರೆ.