ಗರ್ಭಿಣಿ, ಬಾಣಂತಿಗೆ ‘ಮಾತೃವಂದನೆ’ ನೆರವು

ಪ್ರಸವ ಹಾಗೂ ಗರ್ಭಾವಸ್ಥೆಯಲ್ಲಿ ತಾಯಿ ಹಾಗೂ ಮಗುವಿನ ರಕ್ಷಣೆಗೆ ಮೊದಲ ಆದ್ಯತೆ ನೀಡಲಾಗುವುದು. ಪೌಷ್ಟಿಕ ಆಹಾರ ಒದಗಿಸಲು ಪ್ರೋತ್ಸಾಹಧನದ ರೂಪದಲ್ಲಿ ನೆರವು ಒದಗಿಸಲಾಗುವುದು.

‘2017ರ ಜನವರಿ 1ರ ನಂತರ ಮೊದಲ ಬಾರಿ ಗರ್ಭಿಣಿಯಾದವರು ಯೋಜನೆ ವ್ಯಾಪ್ತಿಗೆ ಬರುತ್ತಾರೆ. ಯೋಜನೆಯಡಿ ಒಟ್ಟು ಮೂರು ಕಂತುಗಳಲ್ಲಿ ₹5 ಸಾವಿರ ಪ್ರೋತ್ಸಾಹಧನವನ್ನು ಫಲಾನುಭವಿಗಳ ಬ್ಯಾಂಕ್‌ ಖಾತೆಗೆ ನೇರವಾಗಿ ಜಮೆ ಮಾಡಲಾಗುವುದು. ಗರ್ಭಿಣಿಯರು ಅಂಗನವಾಡಿ ಕೇಂದ್ರಗಳಲ್ಲಿ ಹೆಸರು ನೋಂದಣಿ ಮಾಡಿಸಿಕೊಂಡ ನಂತರ ಯೋಜನೆಯ ಮೊದಲನೇ ಕಂತಿನ ಹಣ ಖಾತೆಗೆ ಜಮೆಯಾಗಲಿದೆ’ ಎಂದು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಅಧಿಕಾರಿ ಎಚ್‌.ಬಿ.ಬೈಲಪತ್ತಾರ್‌ ಹೇಳಿದರು.

ತಾಲ್ಲೂಕಿನಲ್ಲಿ ಈವರೆಗೆ ಒಟ್ಟು 725 ಫಲಾನುಭವಿಗಳು ಅರ್ಜಿ ಸಲ್ಲಿಸಿದ್ದು, 691 ಮಹಿಳೆಯರು ಮೊದಲ ಹಾಗೂ ಎರಡನೇ ಕಂತಿನ ಹಣ ಪಡೆದಿದ್ದಾರೆ. ಉಳಿದ ಫಲಾನುಭವಿಗಳ ಹಣ ಕೆಲವೇ ದಿನಗಳಲ್ಲಿ ಮಂಜೂರಾಗಲಿದೆ. ತಾಯಿ ಕಾರ್ಡ್‌ ಜತೆಗೆ ಅಂಗನವಾಡಿ ಕೇಂದ್ರದಲ್ಲಿ ನೋಂದಣಿಯಾದ ಮೂರೇ ದಿನದಲ್ಲಿ ಮೊದಲ ಕಂತಿನ ₹1ಸಾವಿರ ಫಲಾನುಭವಿ ಖಾತೆಗೆ ಜಮೆಯಾಗಲಿದೆ ಎಂದು ಅವರು ವಿವರಿಸಿದರು.

ಗರ್ಭಿಣಿಯಾಗಿ ಆರು ತಿಂಗಳ ನಂತರ ಎರಡನೇ ಕಂತಿನ ಎರಡು ಸಾವಿರ ಹಾಗೂ ಮಗು ಜನನವಾದ ನಂತರ ಚುಚ್ಚುಮದ್ದು ಹಾಕಿಸುವ ಸಮಯದಲ್ಲಿ ಮೂರನೇ ಕಂತಿನ ₹2 ಸಾವಿರ ಹಣ ಫಲಾನುಭವಿ ಖಾತೆಗೆ ಜಮೆಯಾಗಲಿದೆ. ಜೊತೆಗೆ ರಾಜ್ಯ ಸರ್ಕಾರದ ಜನನಿ ಸುರಕ್ಷಾ ಯೋಜನೆಯಡಿ ₹1ಸಾವಿರ ಫಲಾನುಭವಿ ಪಡೆಯಬಹುದು.

‘ಮಾತೃವಂದನಾ ಯೋಜನೆಯ ಕುರಿತು ಅಂಗನವಾಡಿ ಕಾರ್ಯಕರ್ತೆಯರು ತಮ್ಮ ವ್ಯಾಪ್ತಿಯ ಗ್ರಾಮಗಳಲ್ಲಿ ತಾಯಂದಿರು, ಬಾಣಂತಿಯರ ಸಭೆ ನಡೆಸಬೇಕು. ಯೋಜನೆಯ ಬಗ್ಗೆ ಮಾಹಿತಿ ನೀಡಿ, ಫಲಾನುಭವಿಗಳಿದ್ದರೆ ಅವರ ಸಂಪೂರ್ಣ ಮಾಹಿತಿಯೊಂದಿಗೆ ದಾಖಲಾತಿಗಳನ್ನು ಕಚೇರಿಗೆ ಕಳುಹಿಸಬೇಕು. ಆನ್‌ಲೈನ್‌ನಲ್ಲಿ ಸೂಕ್ತ ದಾಖಲೆಗಳನ್ನು ಕಳುಹಿಸಿದ ಮೂರು ದಿನಗಳಲ್ಲಿ ಯೋಜನೆಯ ಮೊದಲ ಕಂತಿನ ಹಣ ಮಂಜೂರಾಗುತ್ತದೆ’ ಎಂದು ಎಚ್‌.ಬಿ.ಬೈಲಪತ್ತಾರ್‌ ಹೇಳಿದರು.

–ಶಾಂತೇಶ ಬೆನಕನಕೊಪ್ಪ