ದೇವನಹಳ್ಳಿ | ಪುನರ್ವಸತಿ ಕೇಂದ್ರ: ವಿಶೇಷ ಮಕ್ಕಳ ಆಶಾಕಿರಣ

ನನ್ನ  ಮಗಳಿಗೆ 5 ವರ್ಷ ಮಾತನಾಡಲು ಆಗುತ್ತಿರಲಿಲ್ಲ. ಒಂದು ದಿನ ಆಪ್ತರೊಬ್ಬರು ಈ ಕೇಂದ್ರದ ಬಗ್ಗೆ ಹೇಳಿದಾಗ ನನ್ನ ಹೃದಯದಲ್ಲಿ ಹೊಸ ಆಶಾ ಕಿರಣ ಹೊಮ್ಮಿತು. ಮಗುವನ್ನು ತಜ್ಞರಿಗೆ ತಂದು ತೋರಿಸಿ ಭಾಷಾ ಚಿಕಿತ್ಸೆಯ ಒಳಪಡಿಸಲಾಯಿತು. ಮೊದಲಿಗೆ ಒಂದು ಅಕ್ಷರ… ನಂತರ ಎರಡು ಅಕ್ಷರಗಳ ಶಬ್ದ ಉಚ್ಚಾರಣೆ ಮಾಡಿದಳು. ನನ್ನ ಮಗಳು ಚಿಕ್ಕ ತುಟಿಗಳನ್ನು ಜೋಡಿಸಿ ಮೊದಲ ಬಾರಿಗೆ ಸ್ಪಷ್ಟವಾಗಿ ಹೇಳಿದಳು. ‘ಅಮ್ಮ’ ಎಂದು. ಆ ಶಬ್ದ ಕೇಳಿದ ಕ್ಷಣ ನನಗೆ ಅತ್ಯಂತ ಮಧುರವಾದ ಉಡುಗೊರೆ ಇದೇ ಎನ್ನುತ್ತಾರೆ ಸಹನಾ . ಇದು ನನ್ನ ಮಗಳ ಮಾತುಗಳ ಆರಂಭ ಮಾತ್ರ. ಆದರೆ ತಾಯಿಯಾದ ನನಗೆ ಇದು ಜೀವನದ ಅತ್ಯಂತ ದೊಡ್ಡ ಜಯ. ಇದು ಕೇವಲ ಅಮ್ಮ ಎಂಬ ಎರಡು ಅಕ್ಷರ ಶಬ್ದವಲ್ಲ. ಇದು ಗೆಲುವು ತಾಳ್ಮೆಯ ಫಲ ಮತ್ತು ತಾಯಿಯ ಹೃದಯಕ್ಕೆ ಮರು ಜೀವ ತುಂಬಿದ ಮಧುರ ನಾದ ಎನ್ನುತ್ತಾರೆ ಅವರು.

ಹೋಬಳಿ ಮಟ್ಟದಲ್ಲಿ ವಿಶೇಷ ಮಕ್ಕಳ ಪುನರ್ವಸತಿ ಕೇಂದ್ರ ಆರಂಭವಾದ ನಂತರ ಹೋಬಳಿಯ ಗ್ರಾಮ ಪಂಚಾಯಿತಿಗಳು ಪಟ್ಟಣ ಸೇರಿದಂತೆ ನೆರೆಯ ಚಿಕ್ಕಬಳ್ಳಾಪುರ ಜಿಲ್ಲೆಯ ಶಿಡ್ಲಘಟ್ಟ ಮೇಲೂರು ಮಳ್ಳೂರು ಜಂಗಮಕೋಟೆ ವಿವಿಧ ಗ್ರಾಮಗಳಿಂದ ಪೋಷಕರು ಮಕ್ಕಳನ್ನು ಕರೆ ತಂದು ಕೇಂದ್ರದಲ್ಲಿ ಪರೀಕ್ಷೆಗೆ ಒಳಪಡಿಸಿ ಥೆರಪಿ ಸೇವೆಗಳನ್ನು ಉಚಿತವಾಗಿ ಪಡೆಯುತ್ತಿದ್ದಾರೆ. *** ಸಣ್ಣ ಬದಲಾವಣೆ ಸೇವೆಗೆ ಪ್ರೇರಣೆ ಪ್ರತಿ ಮಕ್ಕಳ ಸಣ್ಣ ಧನಾತ್ಮಕ ಬದಲಾವಣೆಯು ನಮಗೆ ಹೆಚ್ಚಿನ ಸೇವೆ ಸಲ್ಲಿಸಲು ಪ್ರೇರೇಪಣೆ ಆಗುತ್ತದೆ. ಮೊದಲ ಸಲ ಬರುವ ಪೋಷಕರು ಬಹಳ ದುಃಖದಿಂದ ತಮ್ಮ ಭಾವನೆಗಳನ್ನು ಹಂಚಿಕೊಳ್ಳುತ್ತಾರೆ. ಆದರೆ ಥೆರಪಿ ಸೇವೆಗಳಿಂದ ಮಗುವಿನ ಧನಾತ್ಮಕ ಬದಲಾವಣೆಯು ಪೋಷಕರ ವೈಯಕ್ತಿಕವಾಗಿ ಅಲ್ಲದೆ ಇಡೀ ಕುಟುಂಬದ ಮೇಲೆ ಧನಾತ್ಮಕ ಪರಿಣಾಮ ಬೀರುತ್ತದೆ. ಮಾಲಾ ವಿಶೇಷ ಶಿಕ್ಷಕಿ.