ನಿಪ್ಪಾಣಿ: ಬೋರಗಾವ ಪಟ್ಟಣದಲ್ಲಿ ಸುಮಾರು ₹101 ಕೋಟಿ ಮೊತ್ತದ ಅಭಿವೃದ್ಧಿ ಕಾಮಗಾರಿಗಳನ್ನು ಹಮ್ಮಿಕೊಂಡಿದ್ದೇನೆ. ಪಟ್ಟಣದಲ್ಲಿ ನಡೆದ ಎಲ್ಲ ಶಾಶ್ವತ ಕಾಮಗಾರಿಗಳು ನನ್ನ ಆಡಳಿತಾವಧಿಯಲ್ಲಿಯೇ ಆಗಿವೆ. ಈ ಚುನಾವಣೆಯಲ್ಲಿ ಜನ ಆಶೀರ್ವದಿಸಲಿದ್ದಾರೆ ಎಂದು ಮತಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಸಚಿವೆ ಶಶಿಕಲಾ ಜೊಲ್ಲೆ ಹೇಳಿದರು.
ತಾಲ್ಲೂಕಿನ ಬೋರಗಾವ ಪಟ್ಟಣದಲ್ಲಿ ಶನಿವಾರ ಆಯೋಜಿಸಿದ್ದ ಪ್ರಚಾರ ರ‍್ಯಾಲಿಯಲ್ಲಿ ಮಾತನಾಡಿದರು.
ಜೈನ ಧರ್ಮದವರ ಪವಿತ್ರ ತೀರ್ಥಸ್ಥಳವಾದ ಸಮ್ಮೇದ ಶಿಖರ್ಜಿ ಬಳಿ ಯಾತ್ರಿ ನಿವಾಸದ ಕಾರ್ಯ ಪ್ರಗತಿಯಲ್ಲಿದೆ. ಅನೇಕ ದೇಗುಲ-ಮಶೀದಿಗಳ ಜೀಣೋದ್ಧಾರಕ್ಕೆ ಕೋಟ್ಯಂತರ ರೂಪಾಯಿ ಅನುದಾನ ವಿತರಿಸಲಾಗಿದೆ. ನುಡಿದಂತೆ ನಡೆದಿದ್ದೇನೆ. ದಾಖಲೆಯ ಮತಗಳಿಂದ ನನ್ನನ್ನು ಗೆಲ್ಲಿಸಿ ಎಂದು ಮನವಿ ಮಾಡಿದರು.
ಪಟ್ಟಣ ಪಂಚಾಯಿತಿ ಸದಸ್ಯ ಶರದ ಜಂಗಟೆ ಮಾತನಾಡಿದರು. ಸುನೀಲ ಪಾಟೀಲ, ರಮೇಶ ಪಾಟೀಲ, ಬಾಬಾಸಾಹೇಬ ಚೌಗುಲೆ, ಶಿವಾಜಿ ಭೋರೆ, ಫಿರೋಜ್ ಅಪರಾಜ, ಮಹಾವೀರ ಪಾಟೀಲ, ಅಜಿತ ಕಡೊಲೆ, ರಾಣಿ ಬೇವಿನಕಟ್ಟಿ, ಬಿಸ್ಮಿಲ್ಲಾ ಅಪರಾಜ, ಮೀನಾಕ್ಷಿ ಭಾದುಲೆ, ಅರ್ಚನಾ ಭಾದುಲೆ, ದೀಪಾಲಿ ಕುಂಭಾರ ಇದ್ದರು.
