ಮಾದಕ ವಸ್ತು ಕಳ್ಳಸಾಗಾಟದಾರರಿಗೆ 10 ವರ್ಷ ಕಠಿಣ ಜೈಲು ಶಿಕ್ಷೆ

2007ರ ಮೇ 28ರಂದು ಆಕಾಶ ಹಾಗೂ ಆಸೀಫ್‌ಅಬ್ದುಲ್‌ ಅವರು ಕಾರಿನಲ್ಲಿ ಹಶೀಷ್‌ ಸಾಗಿಸುತ್ತಿದ್ದಾಗ ಟಿಳಕವಾಡಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದರು. ಆಕಾಶ ಅವರ ಬ್ಯಾಗ್‌ನಿಂದ 5 ಕೆ.ಜಿ ಹಶೀಷ್‌, ರಿವಾಲ್ವರ್‌, 10 ಗುಂಡುಗಳು, 2 ಮೊಬೈಲ್‌, ₹ 2.10 ಲಕ್ಷ ನಗದು ದೊರೆತಿತ್ತು. ಆಸೀಫ್‌ಅಬ್ದುಲ್‌ ಅವರ ಬ್ಯಾಗ್‌ನಿಂದ 3 ಕೆ.ಜಿ. ಹಶೀಷ್‌, 2 ಮೊಬೈಲ್‌, ₹ 35,000 ನಗದನ್ನು ಪೊಲೀಸರು ವಶಪಡಿಸಿಕೊಂಡಿದ್ದರು.

ಇವರಿಬ್ಬರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ ಮಹಾರಾಷ್ಟ್ರದ ರಾಯಗಢ ಪಟ್ಟಣದ ಮಹ್ಮದ ಅಲಿ ಸೈಯದ ಹಾಗೂ ಗೋವಾದ ಅಸ್ನೋಡಾ ಬರದೇಶ ಪ್ರದೇಶದ ಸಜ್ಜನ ಹೆರವಲಕರ ದಂಧೆಯಲ್ಲಿ ಭಾಗಿಯಾಗಿರುವುದು ತಿಳಿಯಿತು. ಇವರಿಬ್ಬರ ಮನೆಗಳ ಮೇಲೆ ಪೊಲೀಸರು ದಾಳಿ ಮಾಡಿದರು. ಮಹ್ಮದ ಅಲಿ ಅವರಿಂದ 2 ಕೆ.ಜಿ. ಹಶೀಷ್‌, 2 ಮೊಬೈಲ್‌, ಸಜ್ಜನ ಅವರ ಮನೆಯಿಂದ 600 ಗ್ರಾಂ ಹಶೀಷ್‌ ದೊರೆತಿತ್ತು. ಇವರೆಲ್ಲರೂ ಸೇರಿ ಹಶೀಷ್‌ ಅನ್ನು ಗೋವಾ ಅಲ್ಲದೇ, ವಿದೇಶಗಳಿಗೂ ಕಳ್ಳಸಾಗಾಟ ಮಾಡುತ್ತಿದ್ದರು ಎನ್ನುವುದು ವಿಚಾರಣೆಯಲ್ಲಿ ಬೆಳಕಿಗೆ ಬಂದಿತ್ತು.

ಮಾದಕ ವಸ್ತು ಕಳ್ಳಸಾಗಾಣಿಕೆಯಲ್ಲಿ ತೊಡಗಿರುವುದು ಸಾಬೀತಾದ ಹಿನ್ನೆಲೆಯಲ್ಲಿ ಎಲ್ಲರಿಗೂ ತಲಾ 10 ವರ್ಷ ಕಠಿಣ ಜೈಲು ಶಿಕ್ಷೆ ಹಾಗೂ ₹ 4 ಲಕ್ಷ ದಂಡವನ್ನು ನ್ಯಾಯಾಧೀಶರು ವಿಧಿಸಿದರು. ದಂಡದ ಹಣ ಕಟ್ಟಲು ವಿಫಲವಾದರೆ ಮತ್ತ 2 ವರ್ಷ ಜೈಲು ಶಿಕ್ಷೆ ಅನುಭವಿಸುವಂತೆ ಆದೇಶಿಸಿದರು. ಸರ್ಕಾರದ ಪರವಾಗಿ ಜಿ.ಕೆ. ಮಾಹುರಕರ ವಾದ ಮಂಡಿಸಿದರು.