ಸ್ನೇಹ ಬಂಧ ಗಟ್ಟಿಗೊಳಿಸುವ ‘ಫ್ರೆಂಡ್‌ಶಿಪ್‌ ಡೇ’

ಬೆಳಗಾವಿ: ಸ್ನೇಹ ಎನ್ನುವುದು ಹೃದಯದಿಂದ ಹುಟ್ಟುವಂತಹ ಸಂಬಂಧ ಎನ್ನುವ ಮಾತಿದೆ. ಅದಕ್ಕೆ ಸ್ನೇಹಕ್ಕೆ ಎಲ್ಲಿಲ್ಲದ ಮಹತ್ವವಿದೆ. ಕಷ್ಟ ಸುಖ ಹಂಚಿಕೊಳ್ಳುವ ಸ್ನೇಹಿತರನ್ನು ಸ್ಮರಿಸುವ ಉದ್ದೇಶದಿಂದ ‘ಫ್ರೆಂಡ್‌ಶಿಪ್‌ ಡೇ’ ಆಚರಣೆ ಬಂದಿದೆ. ಆಗಸ್ಟ್‌ ತಿಂಗಳ ಮೊದಲ ಭಾನುವಾರದ ದಿನವನ್ನು ಫ್ರೆಂಡ್‌ಶಿಪ್‌ ಡೇ ಎಂದು ಆಚರಿಸಲಾಗುತ್ತಿದೆ.

ಸ್ನೇಹದ ನೆನಪಿಗಾಗಿ ಸ್ನೇಹಿತರ ಕೈಗೆ ಬ್ಯಾಂಡ್‌ ಕಟ್ಟುವುದು ಈ ದಿನದ ವಿಶೇಷತೆ. ವಿಭಿನ್ನ ಶೈಲಿಯ ಹಾಗೂ ವಿವಿಧ ಬಣ್ಣಗಳಲ್ಲಿ ಬ್ಯಾಂಡ್‌ಗಳು ಮಾರುಕಟ್ಟೆಯಲ್ಲಿ ಈಗಾಗಲೇ ಲಗ್ಗೆ ಇಟ್ಟಿವೆ. ಇವುಗಳ ಮೇಲಿನ ಒಕ್ಕಣಿಕೆ ಒಂದಕ್ಕಿಂತ ಒಂದು ಚೆಂದ. ‘ಫ್ರೆಂಡ್ಸ್‌ ಫಾರ್‌ ಎವರ್‌’, ‘ಐ ಮಿಸ್‌ ಯೂ’, ‘ಡಿಯರ್‌ ಫ್ರೆಂಡ್‌’ ಸೇರಿದಂತೆ ಹತ್ತು ಹಲವು ಒಕ್ಕಣಿಕೆಗಳು ಆಕರ್ಷಿಸುತ್ತವೆ.

ನಗರದ ಹಲವು ಸ್ಟೇಷನರಿ, ಪುಸ್ತಕ ಮಳಿಗೆಗಳಲ್ಲಿ ಇಂತಹ ಬ್ಯಾಂಡ್‌ಗಳು ಮಾರಾಟಕ್ಕೆ ಲಭ್ಯ ಇವೆ. ಇಂತಹ ಬ್ಯಾಂಡ್‌ಗಳನ್ನು ಖರೀದಿಸಲು ಶನಿವಾರ ಯುವಕರು, ವಿದ್ಯಾರ್ಥಿಗಳು ಮಳಿಗೆಗಳಿಗೆ ಮುಗಿಬಿದ್ದರು. ತಮ್ಮ ನೆಚ್ಚಿನ ಸ್ನೇಹಿತರಿಗೆ ನೀಡಲು ಗಿಫ್ಟ್‌ಗಳನ್ನು ಹಾಗೂ ಫ್ರೆಂಡ್‌ಶಿಪ್‌ ಬ್ಯಾಂಡ್‌ಗಳನ್ನು ಖರೀದಿಸಿ ಇಟ್ಟುಕೊಂಡಿದ್ದಾರೆ. ಭಾನುವಾರ ಭೇಟಿಯಾಗಿ, ಬ್ಯಾಂಡ್‌ ಕಟ್ಟಿ, ಗಿಫ್ಟ್‌ ನೀಡುವ ಯೋಜನೆ ಹಾಕಿಕೊಂಡಿದ್ದಾರೆ.

ದಿನವಿಡೀ ಸುತ್ತಾಡುವುದು. ಹರಟೆ ಹೊಡೆಯುವುದು, ಸಮೀಪದ ಹೋಟೆಲ್‌, ರೆಸ್ಟೋರೆಂಟ್‌ಗೆ ಹೋಗಿ ತಿಂಡಿ ತಿನಿಸು ತಿನ್ನುವುದು. ಸಿನಿಮಾ ನೋಡಲು ಪ್ಲ್ಯಾನ್‌ ಹಾಕಿಕೊಂಡಿದ್ದಾರೆ. ದೂರದ ಊರುಗಳಲ್ಲಿ ಇರುವ ಸ್ನೇಹಿತರಿಗೆ ಗ್ರೀಟಿಂಗ್ಸ್‌ ಕಾರ್ಡ್‌ಗಳನ್ನು ಕಳುಹಿಸಿಕೊಟ್ಟಿದ್ದಾರೆ. ಬ್ಯಾಂಡ್‌ಗಳನ್ನು ಕೂಡ ಅಂಚೆ ಮೂಲಕ ರವಾನಿಸಿದ್ದಾರೆ.

ಭಾನುವಾರ ರಜೆ ಇರುವುದರಿಂದ ಕೆಲವು ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳು ಶನಿವಾರವೇ ತಮ್ಮ ಸ್ನೇಹಿತರಿಗೆ ಬ್ಯಾಂಡ್‌ ಕಟ್ಟುವ ಮೂಲಕ ಫ್ರೆಂಡ್‌ಶಿಪ್‌ ಡೇ ಆಚರಿಸಿದ್ದಾರೆ.