ಬೆಳಗಾವಿಯಲ್ಲೇ ಆರೋಗ್ಯ ವಿಮೆ ಕೇಂದ್ರ ತೆರೆದ ಮಹಾರಾಷ್ಟ್ರ

ಕರ್ನಾಟಕ– ಮಹಾರಾಷ್ಟ್ರ ಗಡಿ ವಿವಾದದ ಮಹಾರಾಷ್ಟ್ರದ ಉನ್ನತಾಧಿಕಾರ ಸಮಿತಿ ಅಧ್ಯಕ್ಷ ಹಾಗೂ ಸಂಸದ ಧೈರ್ಯಶೀಲ ಮಾನೆ ಅವರು ಜನವರಿ 4ರಂದು ಬೆಳಗಾವಿಯಲ್ಲಿ ಗೋಪ್ಯ ಸಭೆ ಮಾಡಿ, ಕೈಪಿಡಿ ಬಿಡುಗಡೆ ಮಾಡಿದ್ದಾರೆ. ಐದು ಕೇಂದ್ರಗಳನ್ನು ಉದ್ಘಾಟಿಸಿ, ಮೊಬೈಲ್‌ ಸಂಖ್ಯೆಗಳನ್ನೂ ನೀಡಿದ್ದಾರೆ. ಪ್ರತಿ ಕೇಂದ್ರದಲ್ಲಿ ನಾಲ್ವರು ಸಹಾಯಕರನ್ನು ನೇಮಿಸಿದ್ದಾರೆ. ಅವರು ಬಂದು ಹೋದ ನಾಲ್ಕೆ ದಿನಗಲ್ಲಿ ಕೇಂದ್ರಗಳು ಕಾರ್ಯಾರಂಭ ಮಾಡಿವೆ.

ಎಲ್ಲೆಲ್ಲಿವೆ ಕೇಂದ್ರಗಳು:

ಶಹಾಪುರ ವಿಠ್ಠಲದೇವ ಗಲ್ಲಿಯಲ್ಲಿ (9945548958), ಗೋವಾವೇಸ್‌ನಲ್ಲಿ ಸಿದ್ಧಿವಿನಾಯಕ ಸೇವಾ ಕೇಂದ್ರ (9448866930), ಖಡಕ್ ಗಲ್ಲಿಯಲ್ಲಿ ಎಂಇಎಸ್ ಸೇವಾ ಕೇಂದ್ರ (98801131123), ಶಿವಾಜಿ ನಗರ ಸೇವಾಕೇಂದ್ರ ಹಾಗೂ ಶಿವಾಜಿ ಮಂಡೋಳ್ಕರ್ ಸೇವಾ ಕೇಂದ್ರಗಳನ್ನು (9964070072) ತೆರೆಯಲಾಗಿದೆ. ಅಲ್ಲದೇ, ಯೋಜನೆಯ ಮಾಹಿತಿ ನೀಡಲು ಉಚಿತ ದೂರವಾಣಿ ಸಂಖ್ಯೆ (8650567567) ಕೂಡ ಕೊಡಲಾಗಿದೆ.

‘ವಿವಾದಕ್ಕೆ ಒಳಪಟ್ಟ 865 ಪ್ರದೇಶಗಳಿಗೆ ಮಾತ್ರ ಈ ಯೋಜನೆ ಜಾರಿ ಮಾಡಲಾಗಿದೆ. ಇದರ ಹಿಂದೆ ಮಹಾರಾಷ್ಟ್ರ ಸರ್ಕಾರದ ದುರುದ್ದೇಶವಿದೆ. ಮರಾಠಿಗರನ್ನು ತನ್ನತ್ತ ಭಾವನಾತ್ಮಕವಾಗಿ ಸೆಳೆಯುವುದು, ಕರ್ನಾಟಕ ಸರ್ಕಾರ ನಿರ್ಲಕ್ಷ್ಯ ಮಾಡಿದೆ ಎಂದು ಎತ್ತಿ ತೋರಿಸುವುದು, ಮರಾಠಿ ಭಾಷಿಕರೆಲ್ಲ ಮಹಾರಾಷ್ಟ್ರದ ಪ್ರಜೆಗಳು ಎಂದು ಆಮಿಷವೊಡ್ಡುವುದು, ಆ ಮೂಲಕ ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಲು ದಾಖಲೆ ಸೃಷ್ಟಿಸುವುದು ಮಹಾರಾಷ್ಟ್ರ ಸರ್ಕಾರದ ಹುನ್ನಾರ. ಅವರು ಇಷ್ಟೆಲ್ಲ ಮಾಡುತ್ತಿದ್ದರೂ ಕರ್ನಾಟಕ ಸರ್ಕಾರ ಮಾತ್ರ ಕಣ್ಣು–ಕಿವಿ– ಬಾಯಿ ಮುಚ್ಚಿಕೊಂಡು ಕುಳಿತಿದೆ’ ಎಂದು ಜಿಲ್ಲಾ ಕನ್ನಡ ಸಂಘಟನೆಗಳ ಕ್ರಿಯಾ ಸಮಿತಿ ಅಧ್ಯಕ್ಷ ಅಶೋಕ ಚಂದರಗಿ ಕಿಡಿ ಕಾರಿದ್ದಾರೆ.