ಭುವನೇಶ್ವರ: ಪೂರ್ವ ಕರಾವಳಿಯ ಮಹಿಳಾ ಕ್ಷೇಮಾಭಿವೃದ್ಧಿ ಸಂಘದ ವತಿಯಿಂದ ಇಲ್ಲಿನ ರೈಲ್ವೆ ನಿಲ್ದಾಣದಲ್ಲಿ ‘ಹ್ಯಾಪಿ ನಾರಿ’ ಹೆಸರಿನ ಸ್ಯಾನಿಟರಿ ನ್ಯಾಪ್ಕಿನ್ ವಿತರಣಾ ಯಂತ್ರ ಅಳವಡಿಸಲಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.
‘ಯಂತ್ರದಲ್ಲಿ ₹5 ಹಾಕಿ, ಯಾರು ಬೇಕಾದರೂ ನ್ಯಾಪ್ಕಿನ್ ಪಡೆಯಬಹುದು. ಒಂದು ಬಾರಿಗೆ 75 ನ್ಯಾಪ್ಕಿನ್ಗಳನ್ನು ಯಂತ್ರಕ್ಕೆ ತುಂಬಿಸಬಹುದು. ಖಾಲಿಯಾದ ನಂತರ ಕಾರ್ಯಕರ್ತರು ಅದನ್ನು ಭರ್ತಿ ಮಾಡುತ್ತಾರೆ’ ಎಂದು ಸಂಘದ ಅಧ್ಯಕ್ಷೆ ಮಧುಲಿಕ ಸಿಂಗ್ ಮಾಹಿತಿ ನೀಡಿದರು.
ಮಹಿಳಾ ಪ್ರಯಾಣಿಕರ ಅನುಕೂಲಕ್ಕಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಒಡಿಶಾ ರಾಜ್ಯದಲ್ಲಿ ಇದು ಮೊದಲ ಪ್ರಯತ್ನ ಎಂದು ತಿಳಿಸಿದರು.