ಮರಿಯಮ್ಮನಹಳ್ಳಿ (ಹೊಸಪೇಟೆ ತಾಲ್ಲೂಕು): ಈ ಅಧಿಕಾರಿಯ ಮನೆ ನಮ್ಮ, ನಿಮ್ಮಂತೆಯೇ ಸಾಮಾನ್ಯವಾದುದು. ಆದರೆ, ಇಲ್ಲಿ 70ಕ್ಕೂ ಹೆಚ್ಚು ದೇಶಗಳ ಕರೆನ್ಸಿ, ನಾಣ್ಯಗಳನ್ನು ನೋಡಬಹುದು. ವಿದೇಶಿ ಕರೆನ್ಸಿಗಳ ಸಂಗ್ರಹಾಲಯ ಎಂದರೂ ತಪ್ಪಾಗಲಾರದು.
ಕೊಪ್ಪಳದ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಜಿಲ್ಲಾ ಪರಿವೀಕ್ಷಣ ಅಧಿಕಾರಿಯಾಗಿರುವ ಪಟ್ಟಣದ ಕೃಷ್ಣ ಎಲ್.ಬಾಕಳೆ ಅವರ ಮನೆಯಲ್ಲಿ ಬರೋಬ್ಬರಿ ₹5 ಲಕ್ಷ ಮೌಲ್ಯದ 70ಕ್ಕೂ ಹೆಚ್ಚು ದೇಶಗಳ ನೋಟು, ನಾಣ್ಯಗಳ ಸಂಗ್ರಹಗಳಿವೆ.
ಅಮೆರಿಕ, ಜಪಾನ್, ರಷ್ಯಾ, ಸಿಂಗಪುರ, ಶ್ರೀಲಂಕಾ, ಇಂಗ್ಲೆಂಡ್, ಜರ್ಮನಿ, ಬ್ರೆಜಿಲ್, ಬಾಂಗ್ಲಾದೇಶ, ಇರಾನ್, ಮಲೇಷ್ಯಾ, ಚೀನಾ, ಕೆನಡಾ, ಇಂಡೋನೇಷ್ಯಾ ಸೇರಿದಂತೆ ಜಗತ್ತಿನ ಪ್ರಮುಖ ರಾಷ್ಟ್ರಗಳ ಕರೆನ್ಸಿಗಳು ಇವರ ಸಂಗ್ರಹದಲ್ಲಿವೆ.
ವಿದೇಶಿ ಕರೆನ್ಸಿಗಳ ಜೊತೆಗೆ ಹಳೆಯ ನೋಟು, ನಾಣ್ಯಗಳು, ವಿವಿಧ ಬಗೆಯ 1,260 ಬೆಂಕಿ ಪೊಟ್ಟಣಗಳ ಸಂಗ್ರಹವಿದೆ. ದೇಶ, ವಿದೇಶದ ನೂರಾರು ಅಂಚೆ ಚೀಟಿಗಳಿವೆ. ಜೊತೆಗೆ ವಿವಿಧ ಮುಖಬೆಲೆಯ 73 ನಾಣ್ಯಗಳು, ವಿಶೇಷ ಸಂದರ್ಭದಲ್ಲಿ ಬಿಡುಗಡೆಗೊಂಡ 100ಕ್ಕೂ ಹೆಚ್ಚು ನಾಣ್ಯಗಳು, ಅಂಚೆ ಚೀಟಿಗಳಿವೆ. ಇದಕ್ಕಾಗಿ ₹2 ಲಕ್ಷ ರೂಪಾಯಿ ವ್ಯಯಿಸಿದ್ದಾರೆ.
‘ನೋಡಿ; ಪ್ರತಿಯೊಬ್ಬರಿಗೂ ಒಂದಲ್ಲಾ ಒಂದು ಹವ್ಯಾಸ ಇರುತ್ತವೆ. ಅದೇ ರೀತಿ ಸರ್ಕಾರಿ ಸೇವೆಯ ಜೊತೆಗೆ ಈ ಹವ್ಯಾಸ ಬೆಳಸಿಕೊಂಡಿದ್ದೇನೆ’ ಎಂದು ಕೃಷ್ಣ ಬಾಕಳೆ ಹೇಳಿದರು.