ಅಂದು ಕಳಪೆ ಕೆಲಸ–ಇಂದು ಕಾಮಗಾರಿ ನಿಯಂತ್ರಕ!

7
ಆರು ತಿಂಗಳಲ್ಲೇ ಕಿತ್ತು ಹೋದ ಮಡಿವಾಳ ಕೆಳಸೇತುವೆಯ ಟಿಕಿ ಡಾಂಬರು * ವಾಹನ ಸವಾರರ ಪರದಾಟ

ಅಂದು ಕಳಪೆ ಕೆಲಸ–ಇಂದು ಕಾಮಗಾರಿ ನಿಯಂತ್ರಕ!

Published:
Updated:
ಅಂದು ಕಳಪೆ ಕೆಲಸ–ಇಂದು ಕಾಮಗಾರಿ ನಿಯಂತ್ರಕ!

ಬೆಂಗಳೂರು: ರಸ್ತೆಗಳಲ್ಲಿ ಗುಂಡಿ ಬೀಳುವುದನ್ನು ತಪ್ಪಿಸುವ ಉದ್ದೇಶದಿಂದ ಹೊಸೂರು ರಸ್ತೆಯ ಮಡಿವಾಳ ಕೆಳಸೇತುವೆಯಲ್ಲಿ ಹಾಕಿದ್ದ ಟಿಕಿ ಡಾಂಬರು ಶೀಟುಗಳು ಆರು ತಿಂಗಳಲ್ಲೇ ಕಿತ್ತು ಹೋಗಿವೆ.

ಕೆಳಸೇತುವೆಯ ಡಾಂಬರು ಪದರವನ್ನು ತೆಗೆದು, ಅಲ್ಲಿಗೆ ಟಿಕಿ ಡಾಂಬರು ಶೀಟು ಹೊದಿಸಲಾಗಿತ್ತು. ಅದರ ಮೇಲೆ ‌40 ಎಂ.ಎಂ.ನಷ್ಟು ದಪ್ಪದಲ್ಲಿ ಡಾಂಬರು (ಬಿಟುಮಿನ್‌ ಕಾಂಕ್ರೀಟ್‌) ಹಾಕಲಾಗಿತ್ತು. ಈ ಶೀಟು ಬಳಕೆಯಿಂದ ಡಾಂಬರು ಸಡಿಲಗೊಳ್ಳುವುದು, ನೀರು ಇಂಗುವುದನ್ನು ತಡೆಯಬಹುದು ಎಂದು ಅಧಿಕಾರಿಗಳು ಹೇಳಿದ್ದರು.

‘ಈ ಕಾಮಗಾರಿಯಿಂದಾಗಿ ರಸ್ತೆಯಲ್ಲಿ ಗುಂಡಿಗಳು ಬೀಳುವುದು ಕಡಿಮೆ ಆಗುತ್ತದೆ. ರಸ್ತೆ ನಯವಾಗುತ್ತದೆ. ರಸ್ತೆ 5 ವರ್ಷಗಳವರೆಗೆ ಬಾಳಿಕೆ ಬರುತ್ತದೆ’ ಎಂದು ಬಿಬಿಎಂಪಿ ಮುಖ್ಯ ಎಂಜಿನಿಯರ್‌ ಆಗಿದ್ದ (ಮುಖ್ಯರಸ್ತೆ) ಬಿ.ಎಸ್‌.ಪ್ರಹ್ಲಾದ್‌ ಅವರು 2017ರ ಡಿಸೆಂಬರ್‌ 25ರಂದು ‘ಪ್ರಜಾವಾಣಿ’ಗೆ ತಿಳಿಸಿದ್ದರು.

ಆದರೆ, ಈ ಶೀಟುಗಳು ಕಿತ್ತು ಹೋಗಿ ವಾಹನ ಸವಾರರಿಗೆ ತೊಂದರೆ ಉಂಟು ಮಾಡುತ್ತಿವೆ. ಈ ಕಾಮಗಾರಿಗೆ ಪಾಲಿಕೆ ₹1.10 ಕೋಟಿ ವೆಚ್ಚ ಮಾಡಿದೆ. ದೆಹಲಿ ಮತ್ತು ಮುಂಬೈನಂತಹ ಮಹಾನಗರಗಳಲ್ಲಿ ರಸ್ತೆಗಳಿಗೆ ಈ ಶೀಟುಗಳನ್ನು ಬಳಸಲಾಗುತ್ತಿದೆ

‘ಈ ರಸ್ತೆಯಲ್ಲಿ ನಿತ್ಯ ಸಾವಿರಾರು ವಾಹನಗಳು ಸಂಚರಿಸುತ್ತವೆ. ಕೆಳಸೇತುವೆ ಹೊಂಡ ಗುಂಡಿಗಳಿಂದ ತುಂಬಿತ್ತು. ಕಾಮಗಾರಿ ನಡೆಸಿದಾಗ ಸಮಾಧಾನಪಟ್ಟುಕೊಂಡಿದ್ದೆವು. ಈಗ ಮತ್ತೆ ಗುಂಡಿಗಳು ಬಿದ್ದಿವೆ. ಹೊಸ ತಂತ್ರಜ್ಞಾನವೆಂದು ಹೇಳಿಕೊಂಡಿದ್ದರು. ಇದೊಂದು ದುಡ್ಡು ಹೊಡೆಯುವ ತಂತ್ರಜ್ಞಾನ ಎನಿಸುತ್ತಿದೆ’ ಎಂದು ಬೈಕ್‌ ಸವಾರ ಸಂಜಯ್‌ ವ್ಯಂಗ್ಯವಾಡಿದರು.

‘ರಿಚ್ಮಂಡ್‌ ರಸ್ತೆಯ ಮೇಲ್ಸೇತುವೆಯಲ್ಲಿ ಒಂದೂವರೆ ವರ್ಷದ ಹಿಂದೆ ₹4 ಕೋಟಿ ವೆಚ್ಚದಲ್ಲಿ ಟಿಕಿ ಡಾಂಬರು ಶೀಟ್‌ಗಳನ್ನು ಹಾಕಲಾಗಿತ್ತು. ಈ ರಸ್ತೆ ಗಟ್ಟಿಮುಟ್ಟಾಗಿದೆ. ಬಳಿಕ ಮಡಿವಾಳ ಕೆಳಸೇತುವೆಯಲ್ಲಿ ಪ್ರಯೋಗ ನಡೆಸಲಾಗಿತ್ತು. ಇಲ್ಲಿ ಪಾಲಿಕೆಯ ಬಂಡವಾಳ ಬಟಬಯಲಾಗಿದೆ’ ಎಂದು ಅವರು ಕಿಡಿಕಾರಿದರು.

ಟಿವಿಸಿಸಿ ಹೊಣೆ: ಬಳಿಕ ಮುಖ್ಯ ರಸ್ತೆಯ ಮುಖ್ಯ ಎಂಜಿನಿಯರ್‌ ಹುದ್ದೆಗೆ ಎಸ್‌. ಸೋಮಶೇಖರ್ ಬಂದರು. ಪ್ರಹ್ಲಾದ್‌ ಅವರಿಗೆ ಸೂಪರಿಟೆಂಡಿಂಗ್ ಎಂಜಿನಿಯರ್ ಹೊಣೆಯ ಜತೆಗೆ ಆಯುಕ್ತರ ತಾಂತ್ರಿಕ ಜಾಗೃತಿ ಕೋಶದ (ಟಿವಿಸಿಸಿ) ಮುಖ್ಯ ಎಂಜಿನಿಯರ್‌ ಜವಾಬ್ದಾರಿಯನ್ನೂ ವಹಿಸಲಾಗಿದೆ. ಪಾಲಿಕೆಯ ಅವ್ಯವಹಾರಗಳನ್ನು ಬಯಲಿಗೆಳೆಯುವ ಜವಾಬ್ದಾರಿ ಈ ಕೋಶಕ್ಕೆ ಇದೆ.

‘ಕಾಂಗ್ರೆಸ್‌ನ ಶಾಸಕರೊಬ್ಬರ ಒತ್ತಡಕ್ಕೆ ಮಣಿದು ಅವರನ್ನು ಇತ್ತೀಚೆಗೆ ಈ ಹುದ್ದೆಗೆ ನೇಮಕ ಮಾಡಲಾಗಿದೆ. ಮುಖ್ಯ ಎಂಜಿನಿಯರ್‌ ಹುದ್ದೆಯಲ್ಲಿದ್ದ ಮೂವರನ್ನು ಕಡೆಗಣಿಸಿ ಈ ನೇಮಕ ಮಾಡಲಾಗಿದೆ. ರಸ್ತೆ ಕಾಮಗಾರಿಗಳಲ್ಲಿ ಹಗರಣಗಳು ಹೆಚ್ಚು. ಆ ವಿಭಾಗದಲ್ಲಿದ್ದ ಅಧಿಕಾರಿಯನ್ನೇ ಟಿವಿಸಿಸಿಗೆ ವರ್ಗ ಮಾಡಿದ್ದು ಸರಿಯಲ್ಲ. ಅವರಿಂದ ವರದಿ ನಿರೀಕ್ಷೆ ಮಾಡಲು ಸಾಧ್ಯವೇ’ ಎಂದು ಪಾಲಿಕೆಯ ಅಧಿಕಾರಿಗಳು ಪ್ರಶ್ನಿಸುತ್ತಾರೆ.

‘ದುಂದುವೆಚ್ಚಕ್ಕೆ ಸಾಕ್ಷಿ’

'ಕಳಪೆ ಕಾಮಗಾರಿಗೆ ಕಾಂಗ್ರೆಸ್‌–ಜೆಡಿಎಸ್‌ ಮೈತ್ರಿಕೂಟದ ಆಡಳಿತ ಕುಖ್ಯಾತಿ ಪಡೆದಿದೆ. ಅಧಿಕಾರಿಗಳು ದುಂದುವೆಚ್ಚ ಮಾಡುತ್ತಿದ್ದಾರೆ. ಮಡಿವಾಳ ಕೆಳಸೇತುವೆ ಇದಕ್ಕೆ ಒಂದು ಉದಾಹರಣೆ ಮಾತ್ರ. ಇದಕ್ಕೆ ಕಾರಣರಾದವರ ಮೇಲೆ ಕ್ರಮ ಕೈಗೊಳ್ಳಬೇಕು’ ಎಂದು ಪಾಲಿಕೆಯ ವಿರೋಧ ಪಕ್ಷದ ನಾಯಕ ಪದ್ಮನಾಭ ರೆಡ್ಡಿ ಒತ್ತಾಯಿಸಿದರು.

‘ನನಗೆ ಮಾಹಿತಿ ಇಲ್ಲ’

‘ನಾನು ಈಗ ರಸ್ತೆ ಮೂಲಸೌಕರ್ಯ ವಿಭಾಗದಲ್ಲಿ ಇಲ್ಲ. ಕಳಪೆ ಕಾಮಗಾರಿ ಬಗ್ಗೆ ನನಗೆ ಮಾಹಿತಿ ಇಲ್ಲ. ಈ ಬಗ್ಗೆ ಮುಖ್ಯ ಎಂಜಿನಿಯರ್‌ ಅವರನ್ನು ಕೇಳಿ. ಈಗ ಟಿವಿಸಿಸಿಯಲ್ಲಿ ಮುಖ್ಯ ಎಂಜಿನಿಯರ್‌ ಆಗಿದ್ದೇನೆ. ಕಳಪೆ ಕಾಮಗಾರಿ ಬಗ್ಗೆ ಟಿವಿಸಿಸಿಗೆ ದೂರು ಬಂದಿಲ್ಲ’ ಎಂದು ಬಿ.ಎಸ್‌.ಪ್ರಹ್ಲಾದ್‌ ಪ್ರತಿಕ್ರಿಯಿಸಿದರು. ಈ ಬಗ್ಗೆ ಪ್ರತಿಕ್ರಿಯೆ ಪಡೆಯಲು ಮುಖ್ಯ ಎಂಜಿನಿಯರ್‌ ಎಸ್.ಸೋಮಶೇಖರ್‌ ಲಭ್ಯರಾಗಲಿಲ್ಲ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry