ವಕೀಲನ ಅಪಹರಣ: ಸಿನಿಮಾ ಸಾಹಸ ಕಲಾವಿದರ ಬಂಧನ

‘ತಿಗಳರಪಾಳ್ಯದ ಸಿದ್ದೇಶ್ (31), ಡಾಲರ್ಸ್ ಕಾಲೊನಿಯ ವಿಜಯಕುಮಾರ್ (33) ಮತ್ತು ಸಿನಿಮಾ ಸಾಹಸ ಕಲಾವಿದರಾಗಿದ್ದ ಬೊಮ್ಮನಹಳ್ಳಿಯ ಎಸ್. ಸಂಜಯ್ ಅಲಿಯಾಸ್ ಸಂಜು (27), ಶಾಂತಿಪ್ರಿಯ ಲೇಔಟ್‌ನ ನೆಲ್ಸನ್ (23), ಕತ್ರಿಗುಪ್ಪಿಯ ಯುಗಾನಂದ್ (22), ಬೆಟ್ಟಹಳ್ಳಿ ಲೇಔಟ್‌ನ ನರೇಶ್ (30), ಅರುಣ್ ಕುಮಾರ್ (29), ನ್ಯೂ ಗುಡ್ಡದಹಳ್ಳಿಯ ಯುವರಾಜ್ (31) ಹಾಗೂ ಅಶೋಕ (31) ಬಂಧಿತರು. ಕೃತ್ಯಕ್ಕೆ ಬಳಸಿದ್ದ ಎರಡು ಕಾರು, ಮೊಬೈಲ್‌ಗಳನ್ನು ಜಪ್ತಿ ಮಾಡಲಾಗಿದೆ’ ಎಂದು ಪೊಲೀಸರು ಹೇಳಿದರು.

‘ನಾಗರಬಾವಿ ನಿವಾಸಿಯಾದ ವಕೀಲ ಅಭಯ್ ಕುಲಕರ್ಣಿ ಅವರನ್ನು ಅಪಹರಿಸಲಾಗಿತ್ತು. ಈ ಬಗ್ಗೆ ಪ್ರಕರಣ ದಾಖಲಾಗಿತ್ತು. ಅಂದ್ರಹಳ್ಳಿ ಬಳಿ ಆರೋಪಿಗಳು ಸಿಕ್ಕಿಬಿದ್ದರು . ಸದ್ಯ ನ್ಯಾಯಾಂಗ ಬಂಧನದಲ್ಲಿ ಇದ್ದಾರೆ’ ಎಂದು ಪೊಲೀಸ್ ಮೂಲಗಳು ಹೇಳಿವೆ.

‘ಹಣದ ಬಗ್ಗೆ ಮಾತನಾಡಲೆಂದು ಅಭಯ್‌ ಅವರನ್ನು ಸೆ. 20ರಂದು ಕರೆಸಿಕೊಂಡಿದ್ದ ಆರೋಪಿ ಸಿದ್ದೇಶ್, ತನ್ನ ಸ್ನೇಹಿತರ ಜೊತೆ ಸೇರಿ ಅಪಹರಣ ಮಾಡಿ ಅಕ್ರಮ ಬಂಧನದಲ್ಲಿಟ್ಟಿದ್ದ.’

‘ಅಭಯ್ ಸಹೋದರನಿಗೆ ಕರೆ ಮಾಡಿದ್ದ ಆರೋಪಿಗಳು, ‘₹10 ಲಕ್ಷ ಕೊಟ್ಟರಷ್ಟೇ ಬಿಡುಗಡೆ ಮಾಡುತ್ತೇವೆ. ಇಲ್ಲದಿದ್ದರೆ, ಜೀವ ಸಹಿತ ಬಿಡುವುದಿಲ್ಲ’ ಎಂದಿದ್ದರು. ಸಹೋದರ ದೂರು ನೀಡಿದ್ದರು’ ಎಂದೂ ಮೂಲಗಳು ಹೇಳಿವೆ.

‘ಭರ್ಜರಿ’ ಸೇರಿ ಹಲವು ಸಿನಿಮಾಗಳಲ್ಲಿ ಸಾಹಸ ಕಲಾವಿದರಾಗಿ ನಟಿಸಿದ್ದವರು ಅಪಹರಣದಲ್ಲಿ ಭಾಗಿಯಾಗಿದ್ದಾರೆ’ ಎಂದೂ ಮೂಲಗಳು ತಿಳಿಸಿವೆ.