ಬುಧವಾರ, ಏಪ್ರಿಲ್ 14, 2021
24 °C

ಒಣಕಸ ವಿಂಗಡಣೆಗೆ ನೆದರ್ಲೆಂಡ್ಸ್‌ ನೆರವು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು ಸೌಂದರ್ಯ ಮತ್ತು ಆರೋಗ್ಯಕ್ಕೆ ಮಾರಕವಾಗಿ ಪರಿಣಮಿಸಿರುವ ಒಣಕಸ ಸಮಸ್ಯೆ ಪರಿಹಾರವಾಗಿ ಬೆಂಗಳೂರು ಬೃಹತ್‌ ಮಹಾನಗರ ಪಾಲಿಕೆ (ಬಿಬಿಎಂಪಿ) ನಗರದಲ್ಲಿರುವ 10 ಒಣ ಕಸ ಸಂಗ್ರಹ ಘಟಕಗಳಲ್ಲಿ ಶೀಘ್ರದಲ್ಲಿಯೇ ಸ್ಮಾರ್ಟ್‌ ತಂತ್ರಜ್ಞಾನ ಅಳವಡಿಸಲಿದೆ.

ಇದಕ್ಕಾಗಿ ಬಿಬಿಎಂಪಿಯು ವೈಜ್ಞಾನಿಕವಾಗಿ ಕಸ ವಿಂಗಡಣೆಯಲ್ಲಿ ಪರಿಣಿತಿ ಸಾಧಿಸಿರುವ ಸ್ವೀಪ್‌ಸ್ಮಾರ್ಟ್‌ ಎಂಬ ನೆದರ್ಲೆಂಡ್ಸ್‌ ಮೂಲದ ಕಂಪನಿಯ ಜತೆ ಮೇ ತಿಂಗಳಲ್ಲಿ ಒಪ್ಪಂದಕ್ಕೆ ಸಹಿ ಹಾಕಿತ್ತು. 

ಮರಿಯಪ್ಪನಪಾಳ್ಯ, ಮೈಸೂರು ಸ್ಯಾಂಡಲ್‌ ಸೋಪ್‌ ಫ್ಯಾಕ್ಟರಿ ಹಿಂಬದಿಯ ವೀರಾಂಜನೇಯ ಸ್ವಾಮಿ ದೇವಸ್ಥಾನ ಬಳಿಯ ಘಟಕ ಸೇರಿದಂತೆ ಬಿಬಿಎಂಪಿಯ ಹತ್ತು ಒಣಕಸ ಘಟಕಗಳಲ್ಲಿ ಕಸ ವಿಂಗಡಣೆಗೆ ಯಂತ್ರ ಅಳವಡಿಸಲಾಗುವುದು. ನೆದರ್ಲೆಂಡ್ಸ್‌ ಕಂಪನಿ ಈ ಘಟಕಗಳ ತಂತ್ರಜ್ಞಾನ ಮತ್ತು ವಿನ್ಯಾಸದ ಹೊಣೆ ಹೊತ್ತಿದೆ. 

ಇದೇ ಮೇ ತಿಂಗಳಲ್ಲಿ ನಗರಕ್ಕೆ ಬಂದಿದ್ದ ನೆದರ್ಲೆಂಡ್ಸ್‌ ಅಧಿಕಾರಿಗಳು ಮತ್ತು ಸ್ವೀಪ್‌ಸ್ಮಾರ್ಟ್‌ ಕಂಪನಿಯ ಅಧಿಕಾರಿಗಳು ಕಸ ವಿಂಗಡಣೆ ಘಟಕಗಳಿಗೆ ಭೇಟಿ ನೀಡಿ ಪರಿಶೀಲಿಸಿದ್ದರು. 

2016ರಲ್ಲಿ ಕಸ ವಿಂಗಡಣೆ ಕಡ್ಡಾಯ ಮಾಡಲಾಗಿದ್ದು, ಅಂದಿನಿಂದ ಕಸ ವಿಂಗಡಣೆ ಘಟಕಗಳ ಸಂಖ್ಯೆ ಹೆಚ್ಚುತ್ತಿದೆ. ಈ ಘಟಕಗಳಲ್ಲಿ ಸಿಬ್ಬಂದಿಯೇ ಕಸವನ್ನು ವಿಂಗಡಿಸುತ್ತಿದ್ದಾರೆ. ಕಾಗದ, ಪ್ಲಾಸ್ಟಿಕ್‌, ಕಬ್ಬಿಣ ಸೇರಿದಂತೆ 38 ಬಗೆಯ ಒಣಕಸವನ್ನು ಕಾರ್ಮಿಕರು ಬೇರ್ಪಡಿಸುತ್ತಿದ್ದರು. ಹೊಸ ತಂತ್ರಜ್ಞಾನ ಅಳವಡಿಸಿದರೆ ಯಂತ್ರಗಳೇ ಈ ಕೆಲಸ ಮಾಡಲಿವೆ. 

ಈ ಯಂತ್ರಗಳನ್ನು ಅಳವಡಿಸಲು ಘಟಕಗಳಲ್ಲಿ ವಿಶಾಲವಾದ ಜಾಗ ಬೇಕಾಗಿಲ್ಲ. ಅತ್ಯಂತ ಕಡಿಮೆ ಸ್ಥಳದಲ್ಲಿ ಈ ಯಂತ್ರಗಳನ್ನು ಒಂದರ ಮೇಲೊಂದರಂತೆ ಜೋಡಿಸಬಹುದು. ಕನ್ವೇಯರ್‌ ಬೆಲ್ಟ್‌ ಮೂಲಕ ಅತ್ಯಂತ ವೇಗವಾಗಿ ಕಸವನ್ನು ಬೇರ್ಪಡಿಸುವ ಯಂತ್ರಗಳು ಕಾರ್ಮಿಕರ ಕೆಲಸ ಸುಲಭಗೊಳಿಸಲಿವೆ. 

ನಗರಕ್ಕೆ ಭೇಟಿ ನೀಡಿದ್ದ ನೆದರ್ಲೆಂಡ್ಸ್‌ ತಂಡ

ರಾಜ್ಯ ಸರ್ಕಾರದ ಆಹ್ವಾನದ ಮೇರೆಗೆ ಕೆಲವು ತಿಂಗಳ ಹಿಂದೆ ನಗರಕ್ಕೆ ಭೇಟಿ ನೀಡಿದ್ದ ನೆದರ್ಲೆಂಡ್ಸ್‌ ಸರ್ಕಾರದ ಒಂದು ತಂಡ ಅಧ್ಯಯನ ನಡೆಸಿ, ಹಿಂದಿರುಗಿತ್ತು. ಈ ಯೋಜನೆಯ ಶೇ 15ರಷ್ಟು ವೆಚ್ಚವನ್ನು ನೆದರ್ಲೆಂಡ್ಸ್‌ ಸರ್ಕಾರ ಮತ್ತು ಶೇ 35ರಷ್ಟು ವೆಚ್ಚವನ್ನು ಸ್ವಚ್ಛ ಭಾರತ ಸೆಸ್‌ನಿಂದ ಭರಿಸಲಾಗುವುದು. ಇನ್ನುಳಿದ ಶೇ 50ಷ್ಟು ವೆಚ್ಚವನ್ನು ಬಿಬಿಎಂಪಿ ಭರಿಸಲಿದೆ. 

* ಹತ್ತು ಘಟಕಗಳನ್ನು ಹೊರತುಪಡಿಸಿ ಇನ್ನುಳಿದ ಒಣಕಸ ವಿಂಗಡಣಾ ಘಟಕಗಳನ್ನು ಕೂಡ ₹40 ಲಕ್ಷ ವೆಚ್ಚದಲ್ಲಿ ಮೇಲ್ದರ್ಜೆಗೆ ಏರಿಸಲು ಬಿಬಿಎಂಪಿ ಯೋಜನೆ ರೂಪಿಸಿದೆ. ಯಂತ್ರಗಳನ್ನು ಅಳವಡಿಸಿದರೆ ಒಂದು ದಿನಕ್ಕೆ ಕಸ ವಿಂಗಡಣೆ ಕೆಲಸ ಮೂರರಿಂದ ನಾಲ್ಕು ಪಟ್ಟು ಹೆಚ್ಚಲಿದೆ.

- ಬಿಬಿಎಂಪಿ ಅಧಿಕಾರಿ

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು