ಬೆಂಗಳೂರು: ಬಿಗ್ ಎಫ್‌ಎಂನ ಆರ್‌.ಜೆಗಳು ನಗರದ 20 ಶಾಲೆಗಳಲ್ಲಿ ‘#ಪ್ಲಾಸ್ಟಿಕ್ ಬೇಕು’ ಅಭಿಯಾನ ನಡೆಸಲಿದ್ದು, ಸಂಗ್ರಹಿಸಿದ ಪ್ಲಾಸ್ಟಿಕ್‌ಗಳನ್ನುಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ರಸ್ತೆಗಳಿಗೆ ಬಳಕೆ ಮಾಡಲಾಗುತ್ತದೆ.
ನಗರವನ್ನು ಕಾಡುತ್ತಿರುವ ಪ್ಲಾಸ್ಟಿಕ್ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಆವರಣದ ರಸ್ತೆಗಳಿಗೆ ಪ್ಲಾಸ್ಟಿಕ್ ತ್ಯಾಜ್ಯ ಬಳಸಲಾಗುತ್ತದೆ. ಈ ನಿಟ್ಟಿನಲ್ಲಿ ಆರಂಭವಾದ ಅಭಿಯಾನಕ್ಕೆ ರೇಡಿಯೊ ಚಾನಲ್ ಬಿಗ್ ಎಫ್‍ಎಂ ಕೈಜೋಡಿಸಿದೆ.
ಆರ್‌.ಜೆಗಳು ಶಾಲೆಗಳಿಗೆ ಭೇಟಿ ನೀಡಿ,ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಲಿದ್ದಾರೆ. ಒಣ ಮತ್ತು ಹಸಿ ತ್ಯಾಜ್ಯಗಳನ್ನು ತೊಟ್ಟಿಗಳಲ್ಲಿ ಬೇರ್ಪಡಿ ಸುವ ಅಗತ್ಯತೆ, ಪ್ಲಾಸ್ಟಿಕ್ ತ್ಯಾಜ್ಯದ ಮರು ಬಳಕೆ ಬಗ್ಗೆ ಕೂಡಾ ತಿಳಿಸಿ ಕೊಡಲಿದ್ದಾರೆ. ಈ ವೇಳೆ ಶಾಲೆಗಳಲ್ಲಿ ಕಸ ಸಂಗ್ರಹದ ತೊಟ್ಟಿಗಳನ್ನು ಇಡಲಾ ಗುತ್ತದೆ. ಮೂರು ತಿಂಗಳು ಈ ಅಭಿಯಾನ ನಡೆಯಲಿದೆ.
‘ಯುವ ಮನಸ್ಸುಗಳಿಗೆ ಪ್ಲಾಸ್ಟಿಕ್ ಬಗ್ಗೆ ತಿಳಿಸಿಕೊಟ್ಟಲ್ಲಿ ಸಮಾಜದಲ್ಲಿ ಬದಲಾವಣೆ ಸಾಧ್ಯವಾಗಲಿದೆ. ಮಕ್ಕಳು ಈ ಅಭಿಯಾನದಲ್ಲಿ ಪಾಲ್ಗೊಳ್ಳುವುದರಿಂದ ಉಳಿದವರಿಗೆ ಪ್ರೇರಣೆಯಾಗಲಿದೆ’ ಎಂದುಆರ್.ಜೆ ಪ್ರದೀಪ ತಿಳಿಸಿದರು.
