ವೇಲ್ಸ್ನ ಮಹಿಳೆಯೊಬ್ಬರಿಗೆ ಒಮ್ಮೆ ಅಚ್ಚರಿ ಕಾದಿತ್ತು. ಅವರ ಕಾರಿನ ಹಿಂಬದಿಯ ಗಾಜಿನ ಮೇಲೆ ಅಂದಾಜು ಇಪ್ಪತ್ತು ಸಾವಿರ ಜೇನು ನೊಣಗಳು ಮುತ್ತಿಕೊಂಡಿದ್ದವು. ಅವು ಎರಡು ದಿನಗಳ ಕಾಲ ಕಾರಿನ ಗಾಜಿನ ಮೇಲೆಯೇ ಇದ್ದವು. ಕಾರಿನ ಹಿಂಬದಿಯ ಗಾಜಿನ ವೈಪರ್ಗೆ ರಾಣಿ ಜೇನು ನೊಣ ಸಿಲುಕಿಕೊಂಡಿತ್ತು. ಹಾಗಾಗಿ, ಇನ್ನುಳಿದ ಜೇನು ನೊಣಗಳು ರಾಣಿಯನ್ನು ಬಿಟ್ಟುಹೋಗಲು ಸಿದ್ಧವಿರಲಿಲ್ಲ. ರಾಣಿಯನ್ನು ಅಲ್ಲಿಂದ ಬಿಡಿಸಿದ ನಂತರವಷ್ಟೇ, ಇತರ ಜೇನು ನೊಣಗಳು ಕಾರಿನ ಗಾಜನ್ನು ಬಿಟ್ಟು ಬೇರೆಡೆ ಹಾರಿ ಹೋದವು.