ಮತದಾರರನ್ನು ಸೆಳೆಯಲು ಶಾಸಕರ ಕಡೆಯಿಂದ ಸೀರೆ ಉಡುಗೊರೆ

ಭಾಲ್ಕಿ: 2023ರ ವಿಧಾನಸಭೆ ಚುನಾವಣೆಯಲ್ಲಿ ಕ್ಷೇತ್ರದ ಮತದಾರರನ್ನು ಓಲೈಸಲು ಶಾಸಕ ಈಶ್ವರ ಖಂಡ್ರೆ ಅವರು ಸೀರೆಗಳನ್ನು ಉಡುಗೊರೆಯಾಗಿ ನೀಡುತ್ತಿದ್ದಾರೆ. ಶಾಸಕರ ನಿವಾಸದಲ್ಲಿನ ಸೀರೆಗಳನ್ನು ವಶಕ್ಕೆ ಪಡೆದು ಈ ಕೃತ್ಯಕ್ಕೆ ಸಾಥ್ ನೀಡಿದವರ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ಬಿಜೆಪಿ ಮುಖಂಡ ಡಿ.ಕೆ.ಸಿದ್ರಾಮ ಒತ್ತಾಯಿಸಿದರು.

ಪಟ್ಟಣದ ನಗರ ಪೊಲೀಸ್‌ ಠಾಣೆ ಎದುರು ಸೋಮವಾರ ಕಾರ್ಯಕರ್ತರೊಂದಿಗೆ ದಿಢೀರ್‌ ಧರಣಿ ನಡೆಸಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕಳೆದೊಂದು ವಾರದಿಂದ ಶಾಸಕ ಈಶ್ವರ ಖಂಡ್ರೆ ಅವರ ಕಡೆಯಿಂದ ರಾಜರೋಷವಾಗಿ ತಾಲ್ಲೂಕಿನೆಲ್ಲೆಡೆ ಮತದಾರರಿಗೆ ಸೀರೆ ನೀಡಲಾಗುತ್ತಿದೆ ಎಂದು ಆರೋಪಿಸಿದರು.
ಇದನ್ನು ತಡೆಯುವಂತೆ ಅಧಿಕಾರಿಗಳ ಗಮನಕ್ಕೂ ತರಲಾಗಿದೆ. ಆದರೆ ಯಾವುದೇ ಪ್ರಯೋಜನ ಆಗಲಿಲ್ಲ. ಸೋಮವಾರ ನನ್ನ ನಿವಾಸದ ಪಕ್ಕದಲ್ಲೇ ಶಾಸಕರ ಕಡೆಯವರು ಇನೋವಾ ಕಾರ್‌ನಲ್ಲಿ ಸಾವಿರಾರೂ ಸೀರೆಗಳನ್ನು ತಂದು ಮತದಾರರಿಗೆ ವಿತರಿಸಿದರು ಎಂದು ತಿಳಿಸಿದರು.
ಕಾರ್ಯಕರ್ತರೊಂದಿಗೆ ಇನೋವಾ ಕಾರ್ ತಡೆದು ಸಾವಿರಾರೂ ಸೀರೆಗಳನ್ನು ಜನರೆದರು ಇಟ್ಟಿದ್ದೇವೆ. ಇನೋವಾ ಕಾರ್ ಸೀರೆ ಸಮೇತ ಪೋಲಿಸರ ವಶಕ್ಕೆ ಒಪ್ಪಿಸುವ ಸಂದರ್ಭದಲ್ಲಿ ಅವರ ಕಾರ್ಯಕರ್ತ ಕಾರನ್ನು ಓಡಿಸಿಕೊಂಡು ಹೋಗಿದ್ದಾನೆ ಎಂದು ಆರೋಪಿಸಿದ ಅವರು, ಸಾವಿರಾರೂ ಕೋಟಿ ರೂಪಾಯಿ ಅನುದಾನ ತಂದು ಕ್ಷೇತ್ರವನ್ನು ಅಭಿವೃದ್ಧಿ ಪಡಿಸಿದ್ದೇನೆ ಎಂದು ಹೇಳುವ ಶಾಸಕರು ₹ 50 ಬೆಲೆಯ ಸೀರೆಗಳನ್ನು ಮತದಾರರಿಗೆ ನೀಡಿ ಕೀಳುಮಟ್ಟದ ರಾಜಕಾರಣ ಮಾಡುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಬಿಜೆಪಿ ಒಗ್ಗಟ್ಟಿನ ಪರಿಣಾಮ ಈ ಬಾರಿ ಚುನಾವಣೆಯಲ್ಲಿ ಶಾಸಕರಿಗೆ ಸೋಲಿನ ಭಯ ಶುರುವಾಗಿದೆ. ಈ ಹಿನ್ನೆಲೆಯಲ್ಲಿ ವಾಮ ಮಾರ್ಗದಿಂದ ಚುನಾವಣೆಯಲ್ಲಿ ಗೆಲ್ಲಲು ಹೊರಟ್ಟಿದ್ದಾರೆ. ಸೀರೆ ಹಂಚಿಕೆ ಸಂಬಂಧ ವಿವಿಧ ಕಲಂ ಅಡಿಯಲ್ಲಿ ಮೂರು ಪ್ರಕರಣಗಳು ದಾಖಲಾಗಿವೆ ಎಂದು ತಿಳಿಸಿದರು.

ಪ್ರಮುಖರಾದ ಜಗದೀಶ ಖಂಡ್ರೆ, ಜರ್ನಾಧನ ಬಿರಾದರ, ಗೋವಿಂದರಾವ್‌ ಬಿರಾದರ, ಪಾಂಡುರಂಗ ಕನಸೆ, ಪ್ರವೀಣ ಸವರೆ, ಬಾಬುರಾವ್‌ ಧೋಪೆ, ಅನಿಲ್‌ ಕುಂದೆ, ಕಿರಣ ಖಂಡ್ರೆ, ಸಂಜೀವ ಶಿಂದೆ, ರಫಿಕ ಚೌಧರಿ, ಜೈರಾಜ ಕೊಳ್ಳಾ, ಸಂಗಮೇಶ ಭೂರೆ, ಬಿಬಿಶನ ಬಿರಾದರ, ಕೈಲಾಸ ಪಾಟೀಲ, ನವನಾಥ ಪಾಟೀಲ, ಕನಕ ಮಲ್ಲೇಶಿ, ದೀಪಕ ಶಿಂದೆ, ಸಂಗಮೇಶ ಟೆಂಕಾಳೆ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.