ಮಹದೇಶ್ವರ ಬೆಟ್ಟ: ಸಹೋದರಿ, ಸಹೋದರರ ಸವಾಲ್‌

ಮಹದೇಶ್ವರ ಬೆಟ್ಟ: ಇಲ್ಲಿನ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲಿ ಅಕ್ಕ –ತಂಗಿಯರು, ಅಣ್ಣ– ತಮ್ಮಂದಿರು ಮುಖಾಮುಖಿಯಾಗಿ ಸ್ಪರ್ಧಿಸಿದ್ದು, ಚುನಾವಣಾ ಕಣ ರಂಗೇರಿದೆ.  

ಇಂಡಿಗನತ್ತ ಗ್ರಾಮದಲ್ಲಿ ರಾಜಮ್ಮ ಹಾಗೂ ಅವರ ಸಹೋದರಿಯಾದ ನಾಗರತ್ನ ನಾಮಪತ್ರ ಸಲ್ಲಿಸಿದ್ದಾರೆ. ರಾಜಮ್ಮ ಕಾಂಗ್ರೆಸ್‌ ಪರ ಒಲವು ಹೊಂದಿದ್ದರೆ, ನಾಗರತ್ನ ಬಿಜೆಪಿಯ ಪರವಾಗಿದ್ದಾರೆ. 

ಕೊಂಬುಡಿಕ್ಕಿ ಗ್ರಾಮದಲ್ಲಿ ಬೆಳ್ಳಿ ಹಾಗೂ ಅವರ ಸಹೋದರ ಶಿವಣ್ಣ ಅವರು ಸ್ಪರ್ಧಿಸಿದ್ದಾರೆ. ಬೆಳ್ಳಿ ಅವರು ಜೆಡಿಎಸ್‌ ಪರವಾಗಿದ್ದರೆ, ಶಿವಣ್ಣ ಅವರು ಕಾಂಗ್ರೆಸ್‌ ಜೊತೆಗೆ ಗುರುತಿಸಿಕೊಂಡಿದ್ದಾರೆ.

ಅಕ್ಕ ತಂಗಿಯರು ಹಾಗೂ ಅಣ್ಣ ತಮ್ಮಂದಿರ ನಡುವೆ ಜಿದ್ದಾಜಿದ್ದಿನ ಸ್ಪರ್ಧೆ ಏರ್ಪಟಿದ್ದು, ಯಾರು ಗೆಲ್ಲುತ್ತಾರೆ ಎಂಬ ಕುತೂಹಲ ಗ್ರಾಮಸ್ಥರಲ್ಲಿ ಮನೆ ಮಾಡಿದೆ. 

ಮಹದೇಶ್ವರ ಬೆಟ್ಟ ಗ್ರಾಮ ಪಂಚಾಯಿತಿಯಲ್ಲಿ 11 ಸದಸ್ಯ ಸ್ಥಾನಗಳಿದ್ದು 110 ಅಭ್ಯರ್ಥಿಗಳು ನಾಮಪತ್ರವನ್ನು ಸಲ್ಲಿಸಿದ್ದಾರೆ. ಈ ಪೈಕಿ ಎರಡು ಅರ್ಜಿಗಳು ತಿರಸ್ಕೃತಗೊಂಡಿವೆ.