ಸೋಮವಾರ, ಜನವರಿ 25, 2021
25 °C
ಕಾಡಂಚಿನ ತೋಟಗಳಲ್ಲಿ ಮೊದಲ ಬಾರಿಗೆ ಪತ್ತೆಯಾದ ಉರಗ

ಬಿಳಿಗಿರಿರಂಗನ ಬನದಲ್ಲೂ ಹಾರುವ ಹಾವು

ನಾ.ಮಂಜುನಾಥಸ್ವಾಮಿ Updated:

ಅಕ್ಷರ ಗಾತ್ರ : | |

Prajavani

ಯಳಂದೂರು: ರಾಜ್ಯದ ಪಶ್ಚಿಮ ಘಟ್ಟ, ಈಶಾನ್ಯ ರಾಜ್ಯ ಹಾಗೂ ಗೋವಾದ ಪಶ್ಚಿಮ ಘಟ್ಟಗಳಲ್ಲಿ ಕಂಡುಬರುವ ವಿಶಿಷ್ಟ ಪ್ರಭೇದದ ಹಾರುವ ಹಾವು ಇತ್ತೀಚೆಗೆ ಬಿಳಿ ಗಿರಿರಂಗನಬೆಟ್ಟದ ಅರಣ್ಯ ಪ್ರದೇಶದಲ್ಲಿ ಮೊದಲ ಬಾರಿಗೆ ಕಂಡು ಬಂದಿದೆ. ‌

ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ಪಶ್ಚಿಮ ಘಟ್ಟದಲ್ಲಿ ಹೆಚ್ಚಾಗಿ ಕಂಡು ಬರುವ ಬಹು ವರ್ಣಗಳಿಂದ ಕೂಡಿದ ಸುಂದರ ಉರಗವನ್ನು ಬಿಳಿಗಿರಿಬೆಟ್ಟದ ಕಾಡಂಚಿನ ತೋಟಗಳ ಬಳಿ ಗುರುತಿಸಲಾಗಿದೆ.

ಈ ಹಾವಿನ ಶರೀರ ವೈವಿಧ್ಯಮಯ ಬಣ್ಣಗಳಿಂದ ಕೂಡಿದೆ. ಬೆನ್ನಿನ ಮೇಲೆ ಕಪ್ಪು, ಕೆಂಪು, ಹಳದಿ ಬಣ್ಣದ ಪಟ್ಟಿಗಳಿವೆ. ದೇಹದ ಪೊರೆ ಹುರುಪೆ ಮೃದುವಾಗಿದ್ದು, ಹೊಳೆಯುತ್ತದೆ. ದೇಹದ ಅಡಿ ಭಾಗ ತಿಳಿಹಸಿರು ಬಣ್ಣ ಹೊಂದಿದ್ದು, ತಲೆ ಅಡಿಭಾಗ ಬಿಳಿ ಇಲ್ಲವೇ ತಿಳಿ ಹಳದಿ ಬಣ್ಣಗಳ ಸಂಯೋಜನೆಯಿಂದ ಕಂಗೊಳಿಸುತ್ತದೆ. ತೆಳುವಾದ ಶರೀರ, ಕುತ್ತಿಗೆಗಿಂತ ಅಗಲವಾದ ತಲೆ ಮತ್ತು ಬಾಲ ಮರ ಏರಲು ಸಹಕರಿಸುತ್ತದೆ.

ಇವು ಸದಾ ಕ್ರೀಯಾಶೀಲ ಆಗಿದ್ದು, ಹಗಲು ಮತ್ತು ಇರುಳಿನಲ್ಲಿ ಚಟುವಟಿಕೆಯಿಂದ ಕೂಡಿರುತ್ತದೆ. ಬೇಟೆಯ ಸಂದರ್ಭ ಇಲ್ಲವೇ ಅಪಾಯಕಾರಿ ಸ್ಥಳಗಳಲ್ಲಿ ಶತ್ರುಗಳಿಂದ ರಕ್ಷಣೆ ಪಡೆಯಲು ಮರದಿಂದ ಮರಕ್ಕೆ ಕೆಳಮುಖವಾಗಿ ಹಾರುತ್ತವೆ. ತೇಲುವಾಗ ಶರೀರದ ಪಕ್ಕೆಲುಬುಗಳನ್ನು ಅಗಲಗೊಳಿಸಿ, ಒಳಗಿನ ಗಾಳಿಯನ್ನು ಹೊರದೂಡುತ್ತ, ಉದರ ಭಾಗವನ್ನು ಒಳಕ್ಕೆ ಎಳೆದುಕೊಂಡು 'ಪ್ಯಾರಾಚ್ಯೂಟ್' ನಂತೆ ಇಳಿಯುತ್ತವೆ. ಟೊಂಗೆ, ಬಿಳಲುಗಳನ್ನು ವೇಗವಾಗಿ ಏರುತ್ತವೆ. ಮನೆಹಲ್ಲಿ, ಕಪ್ಪೆ, ಹಕ್ಕಿ, ಓತಿಕ್ಯಾತ ಹಾಗೂ ವಿಷರಹಿತ ಸಣ್ಣ ಹಾವುಗಳು ಈ ಹಾವಿನ ಆಹಾರ.

ವಿಶೇಷ ಹಾಗೂ ವಿಸ್ಮಯ
ಕನ್ನಡದಲ್ಲಿ ಹಾರುವ ಹಾವನ್ನು 'ಬಟ್ಟೆ ಬಣಜಿಗ' ಎನ್ನುತ್ತಾರೆ. ತುಳುವಿನಲ್ಲಿ 'ಪುಲ್ಲೀಪುತ್ರ', ಉರ್ದುವಿನಲ್ಲಿ 'ಕಲಜಿನ್' ಹೆಸರಿದೆ, ಇಂಗ್ಲಿಷ್‌ನಲ್ಲಿ 'ಗೋಲ್ಡನ್ ಟ್ರೀ ಸ್ನೇಕ್' ಎಂದು ಕರೆಯುವ ಇದರ ವೈಜ್ಞಾನಿಕ ಹೆಸರು 'ಕ್ರೈಸೋಪೆಲಿಯ ಆರ್ನೇಟ'. ಇವು ಮಾರ್ಚ್-ಏಪ್ರಿಲ್ನಲ್ಲಿ ಮಿಲನಗೊಂಡು ಜೂನ್-ಜುಲೈನಲ್ಲಿ 6 ರಿಂದ 12 ಮೊಟ್ಟೆ ಇಡುತ್ತವೆ. ತಮ್ಮ ಮೊಟ್ಟೆಗಳಿಗೆ ಇವು ಕಾವು ಕೊಡುವುದಿಲ್ಲ. ಮರದ ಪೊಟರೆ, ತೆಂಗು-ಕಂಗು, ಮರಗಳೆಡೆ ಇಟ್ಟ ತತ್ತಿಗಳು 60-70 ದಿನಗಳಲ್ಲಿ ಮೊಟ್ಟೆ ಒಡೆದುಕೊಂಡು ಮರಿಗಳು ಹೊರಬರುತ್ತವೆ. ಎಳೆ ಮರಿಗಳ ಬಣ್ಣ ಕಪ್ಪಾಗಿದ್ದು, ಶಿರದಿಂದ ಬಾಲದ ತನಕ ಬಿಳಿ ಇಲ್ಲವೆ ಹಳದಿ ಬಣ್ಣದ ಹೊಳೆಯುವ ಅಡ್ಡ ಪಟ್ಟಿಗಳಿಂದ ಗಮನ ಸೆಳೆಯುತ್ತವೆ. ‌

ಹುಟ್ಟಿದಾಗ ಐದರಿಂದ ಎಂಟು ಇಂಚು ಉದ್ದ ಇದ್ದರೆ, ಸಂಪೂರ್ಣ ಬೆಳೆದಾಗ 39ರಿಂದ 69 ಇಂಚಿನವರೆಗೂ ಬೆಳೆಯುತ್ತದೆ. ಹೆಣ್ಣು ಗಂಡಿಗಿಂತ ದೊಡ್ಡದಾಗಿ ಬೆಳೆಯುತ್ತದೆ. ಗೋವಾ, ಈಶಾನ್ಯ ರಾಜ್ಯಗಳು ಹಾಗೂ ಚೀನಾ, ಶ್ರೀಲಂಕಾ ಮತ್ತು ಬಾಂಗ್ಲಾದೇಶಗಲ್ಲಿ ಈ ಹಾವು ಕಂಡು ಬರುತ್ತವೆ.‌

ಧರೆಯ ಆಭರಣವನ್ನು ಕೊಲ್ಲದಿರಿ: ‘ಈ ಹಾವುಗಳ ವರ್ತನೆ ಬಗ್ಗೆ ಹೆಚ್ಚಿನ ಅಧ್ಯಯನಗಳು ನಡೆದಿಲ್ಲ. ವೃಕ್ಷದಿಂದ ವೇಗವಾಗಿ ಹಾರುವುದನ್ನು ಕಂಡ ಸ್ಥಳೀಯರು ಇವುಗಳನ್ನು ವಿಷಕಾರಿ ಎಂದು ಕೊಲ್ಲುವುದೇ ಹೆಚ್ಚು. ಬಿಳಿಗಿರರಂಗನ ಬನದ ಹೊರವಲಯದ ತೋಟಗಳಲ್ಲಿ ಮೊದಲ ಸಲ ಕಂಡು ಬಂದಿದ್ದು, ಮನೆ ಸಮೀಪದ ಬೊಡ್ಡೆಬಳಿ ಇಳಿ ಬಿದ್ದಿದ್ದ ಹಾವನ್ನು ಸಂರಕ್ಷಿಸಲಾಗಿದೆ. ಇವು ಅಲ್ಪ ವಿಷಕಾರಿ. ಹಾಗಾಗಿ, ಧರೆಯ ಆಭರಣವಾದ ಈ ಉರಗದ ಕುಲವನ್ನು ಸಂರಕ್ಷಿಸಬೇಕು’ ಎಂದು ಉರಗ ತಜ್ಞ ಸಂತೇಮರಹಳ್ಳಿ ಸ್ನೇಕ್ ಮಹೇಶ್ ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು