ಜಲಾಶಯಗಳಿಂದ ನೀರು: ಕೊಳ್ಳೇಗಾಲದಲ್ಲಿ ಕಾವೇರಿ ನೀರಿನ ಮಟ್ಟ ಹೆಚ್ಚಳ

ಮುಂಗಾರು ಕೊರತೆಯ ಕಾರಣಕ್ಕೆ ಜೂನ್‌ ತಿಂಗಳು ಪೂರ್ತಿ ಮಳೆಯಾಗಿರಲಿಲ್ಲ. ನದಿಯಲ್ಲಿ ನೀರಿನ ಹರಿವು ಬಹುತೇಕ ನಿಂತಿತ್ತು. ಭರಚುಕ್ಕಿ ಜಲಪಾತದಲ್ಲಿ ಸಣ್ಣ ನೀರಿನ ಝರಿ ಕೊರಕಲು ಕಲ್ಲುಗಳ ನಡುವೆ ಬೀಳುತ್ತಿತ್ತು. ಇದರಿಂದ ಪ್ರವಾಸಿಗರು ನಿರಾಸೆ ಅನುಭವಿಸಿದ್ದರು. ಈ ವಾರಾಂತ್ಯದ ಹೊತ್ತಿಗೆ ನೀರಿನ ಹರಿವು ಹೆಚ್ಚುವ ನಿರೀಕ್ಷೆ ಇದ್ದು, ಜಲಪಾತ ವೀಕ್ಷಣೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಬರುವ ಸಾಧ್ಯತೆ ಇದೆ. 

‘ನದಿಯಲ್ಲಿ ನೀರಿನ ಹರಿವು ಹೆಚ್ಚಳವಾಗುತ್ತಿರುವ ಕಾರಣ ನದಿ ತೀರದ ಗ್ರಾಮಸ್ಥರು ಅನವಶ್ಯಕವಾಗಿ ನದಿ ತೀರಕ್ಕೆ ಹಾಗೂ ನದಿಯಲ್ಲಿ ಈಜಲು ಹೋಗಬಾರದು’ ಎಂದು ಉಪ ವಿಭಾಗಾಧಿಕಾರಿ ಮಹೇಶ್ ‘ಪ್ರಜಾವಾಣಿ’ಗೆ ತಿಳಿಸಿದರು.

ಜಿಲ್ಲೆಯಲ್ಲಿ ಮುಂದುವರಿದ ಸೋನೆ ಮಳೆ: ಈ ಮಧ್ಯೆ, ಜಿಲ್ಲೆಯಾದ್ಯಂತ ಬುಧವಾರವೂ ಮೋಡ ಕವಿದ ವಾತಾವರಣ, ಚಳಿ ಗಾಳಿ ಸೋನೆ ಮಳೆ ಮುಂದುವರಿಯಿತು. ಆಗಾಗ ಹದ ಮಳೆಯೂ ಆಯಿತು. 

ಬುಧವಾರ ಬೆಳಿಗ್ಗೆ 8.30ಕ್ಕೆ ಕೊನೆಗೊಂಡಂತೆ 24 ಗಂಟೆಗಳ ಅವಧಿಯಲ್ಲಿ ಜಿಲ್ಲೆಯಾದ್ಯಂತ 0.60 ಮಿ.ಮೀ ಮಳೆಯಾಗಿದೆ. ಇನ್ನೂ ಮೂರ್ನಾಲ್ಕು ದಿನಗಳ ಕಾಲ ಇದೇ ವಾತಾವರಣ ಇರಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.