ಸುಧಾಕರ್ ಆಸ್ತಿಯಲ್ಲಿ ₹1.66 ಕೋಟಿ ಹೆಚ್ಚಳ: ಪತ್ನಿಯ ಮೇಲೆ ಭಾರಿ ಸಾಲದ ಹೊರೆ

2018ರ ವಿಧಾನಸಭೆ ಚುನಾವಣೆ ಸಂದರ್ಭದಲ್ಲಿ ಸುಧಾಕರ್ ಅವರು ತಮ್ಮ ಕುಟುಂಬದ ಒಟ್ಟು ಆಸ್ತಿ ₹15.38 ಕೋಟಿ ಎಂದು ಪ್ರಮಾಣ ಪತ್ರ ಸಲ್ಲಿಸಿದ್ದರು. ಅದಕ್ಕೆ ಹೋಲಿಸಿದರೆ ಕಳೆದ ಒಂದೂವರೆ ವರ್ಷದಲ್ಲಿ ಅವರ ಆಸ್ತಿ ₹1.66 ಕೋಟಿ ಹೆಚ್ಚಳವಾಗಿದೆ. ಸಾಲ ಪ್ರಮಾಣವೂ ₹12 ಲಕ್ಷದಷ್ಟು ಹೆಚ್ಚಳವಾಗಿದೆ.

2018ರ ಚುನಾವಣೆ ಸಂದರ್ಭದಲ್ಲಿ ಸುಧಾಕರ್ ಮತ್ತು ಅವರ ಪತ್ನಿ ಡಾ.ಪ್ರೀತಿ ಅವರ ಒಟ್ಟು ಚರಾಸ್ತಿ ₹11.87 ಕೋಟಿ ಇತ್ತು. ಅದೀಗ ₹14.89 ಕೋಟಿಗೆ ಏರಿಕೆಯಾಗಿದೆ. ₹3.51 ಕೋಟಿ ಯಷ್ಟಿದ್ದ ಸ್ಥಿರಾಸ್ತಿ ಮೌಲ್ಯ ₹2.15 ಕೋಟಿಗೆ ಕುಸಿದಿದೆ.

ಕುಟುಂಬದ ಆಸ್ತಿಯಲ್ಲಿ ‘ಅಗ್ರ’ ಪಾಲು ಹೊಂದಿರುವ ಪ್ರೀತಿ ಅವರ ಮೇಲೆ ಇದೀಗ ದೊಡ್ಡ ಸಾಲದ ಹೊರೆ ಇದೆ. ಶಿವನ್ ಎಂಬುವರಿಗೆ ₹ 10 ಕೋಟಿ ಸೇರಿದಂತೆ ಐದು ಜನರು ಒಟ್ಟು ₹10.68 ಕೋಟಿ ಮರುಪಾವತಿಸಬೇಕಿದೆ. ಈ ಸಾಲದ ಪ್ರಮಾಣ ಕಳೆದ ಚುನಾವಣೆಯಲ್ಲಿ ₹ 10.70 ಕೋಟಿ ಇತ್ತು. ಪ್ರಸ್ತುತ ಸುಧಾಕರ್ ಅವರು ಪಿಸಿಎಆರ್‌ಡಿ ಬ್ಯಾಂಕ್, ಕೆನರಾ ಬ್ಯಾಂಕ್ ಮತ್ತು ಪತ್ನಿಗೆ ಸೇರಿದಂತೆ ಒಟ್ಟು ₹ 29.84 ಲಕ್ಷ ಮರು ಪಾವತಿಸಬೇಕಿದೆ.

ಸ್ಥಿರಾಸ್ತಿ ಪೈಕಿ ಪಿತ್ರಾರ್ಜಿತ ಮತ್ತು ಸ್ವಯಾರ್ಜಿತ ಸೇರಿ ಸುಧಾಕರ್ ಅವರ ಬಳಿ ₹97.37 ಲಕ್ಷ, ಪತ್ನಿ ಬಳಿ ₹1.17 ಕೋಟಿ ಆಸ್ತಿ ಇದೆ. ಸುಧಾಕರ್ ಅವರ ಚರಾಸ್ತಿ ಕಳೆದ ಒಂದೂವರೆ ವರ್ಷ ಹಿಂದೆ ₹ 2.34 ಕೋಟಿ ಇತ್ತು. ಅದೀಗ ₹1.37 ಕೋಟಿಯಷ್ಟು ಕಡಿಮೆಯಾಗಿದೆ. ಪತ್ನಿಯ ಚರಾಸ್ತಿಯಲ್ಲಿ ಯಾವುದೇ ವ್ಯತ್ಯಾಸವಾಗಿಲ್ಲ.

ಇನ್ನು ಚರಾಸ್ತಿಯಲ್ಲಿ ವಿವಿಧ ಬ್ಯಾಂಕ್‌ ಖಾತೆಗಳಲ್ಲಿರುವ ಠೇವಣಿ, ಉದ್ಯಮಗಳಲ್ಲಿ ಮಾಡಿರುವ ಹೂಡಿಕೆಗಳು ಸೇರಿವೆ. ಸುಧಾಕರ್ ಬಳಿ 160 ಗ್ರಾಂ ಚಿನ್ನ, ಪ್ರೀತಿ ಅವರ ಬಳಿ ₹ 30 ಲಕ್ಷ ಮೌಲ್ಯದ 1 ಕೆ.ಜಿ. ಬಂಗಾರದ ಆಭರಣಗಳು, ನಾಲ್ಕು ವಜ್ರದ ಹಾರಗಳು, 21 ಕೆ.ಜಿ.ಬೆಳ್ಳಿ ವಸ್ತುಗಳು ಮತ್ತು ₹ 66 ಲಕ್ಷ ಮೌಲ್ಯದ ಚಿನ್ನ ಬೆಳ್ಳಿ ಇದೆ. ಈ ದಂಪತಿಯ ಬಳಿ ಒಂದು ಕಾರು, ಮೂರು ಟ್ರ್ಯಾಕ್ಟರ್‌ಗಳು ಇವೆ.

ಕಳೆದ ವಿಧಾನಸಭೆ ಚುನಾವಣೆ ವೇಳೆ ಸುಧಾಕರ್ ದಂಪತಿ ಬಳಿ 5 ಕೆ.ಜಿ.ಬೆಳ್ಳಿ ವಸ್ತುಗಳು ಮತ್ತು ನಾಲ್ಕು ಕಾರುಗಳು, ಒಂದು ಟ್ರ್ಯಾಕ್ಟರ್ ಇತ್ತು. ಕ್ಷೇತ್ರದಾದ್ಯಂತ ಈಗಾಗಲೇ ಜೋರು ಪ್ರಚಾರ ಕೈಗೊಂಡಿರುವ ಸುಧಾಕರ್ ಅವರ ಬಳಿ ಸದ್ಯ ₹4.20 ಲಕ್ಷ ಮತ್ತು ಅವರ ಪತ್ನಿ ಬಳಿ ₹ 3.10 ಲಕ್ಷ ನಗದು ಇದೆ.