ಕಣ್ಮನ ಸೆಳೆಯುವ ಕಾಡು ಹೂಗಳು

ಕೆಲವು ಹಳ್ಳಿಗಳ ಹೊರವಲಯಗಳಲ್ಲಂತೂ ಈ ಹೂಗಳಿಂದಾಗಿ ಹಳ್ಳಿಗೇ ಸೌಂದರ್ಯದ ಸೊಬಗು ಇಮ್ಮಡಿಸಿದಂತಾಗಿದೆ. ನೋಡುಗರ ಮನಸ್ಸಿಗೆ ಆನಂದ ನೀಡುವುದರೊಂದಿಗೆ ಸೌಂದರ್ಯದ ಖನಿಗಳಾದ ಈ ಹೂಗಳಿಂದ ಹಲವಾರು ಉಪಯೋಗಗಳೂ ಇವೆ. ದುಂಬಿಗಳು, ಚಿಟ್ಟೆಗಳು ಹಾಗೂ ಪತಂಗಗಳಿಗೆ ಇವು ನೆಚ್ಚಿನವು. ಈಸಸ್ಯಗಳು ಹಲವು ಔಷಧೀಯ ಗುಣಗಳನ್ನೂ ಹೊಂದಿವೆ.

ಕಡು ಗುಲಾಬಿ ಬಣ್ಣದ ತ್ರಿಭುಜಾಕಾರದ ಎಲೆಗಳುಳ್ಳ ಐದು ಎಸಳಿನ ಸೊರೆಲ್ ಹೂಗಳು, ಹಳದಿ ಬಣ್ಣದ ಆಕರ್ಷಕ ಕ್ಯಾಸಿಯಾ ಹೂಗಳು, ಕೆಂಪು ರೋಮಗಳಂತಿರುವ ಮುಟ್ಟಿದರೆ ಮುನಿ ಹೂಗಳು, ಇಂಗ್ಲಿಷ್‌ನಲ್ಲಿ ಕೋಟ್ ಬಟನ್ ಎಂದು ಕರೆಯುವ ಸಣ್ಣ ಸೇವಂತಿ ಹೂಗಳು, ಹೃದಯಾಕಾರದ ಎಲೆಗಳಿರುವ ಬಳ್ಳಿಯಲ್ಲಿ ಬಿಡುವ ಬಿಳಿಚಿದ ಬುಗುರಿ ಹೂಗಳು, ಕಪ್ಪು ಮುಳ್ಳುಗಳಿರುವ ಸಸ್ಯದಲ್ಲಿ ಅರಳುವ ಸಿಂಹಿ ಹೂಗಳು, ಆಕರ್ಷಕ ಪುಟ್ಟಪುಟ್ಟ ನೀಲಿ ಹೂಗಳ ಗುಚ್ಛದಂತಿರುವ ಕರಿಯುತ್ತರಾಣಿ ಹೂಗಳು, ಶಿವನಿಗೆ ಪ್ರಿಯವಾದ ತುಂಬೆ ಹೂಗಳು... ಹೀಗೆ ಹೂಗಳ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ.

‘ಯಾರ ಮುಡಿಗೂ ಏರದೆ, ಯಾವ ದೇವರ ಪಾದವನ್ನೂ ಸೇರದೆ, ತನ್ನಷ್ಟಕ್ಕೆ ತಾನರಳಿ, ಮಕರಂದವನ್ನು ಹಂಚಿ, ಅಳಿದು ಹೋಗುವ ಈ ಸುಂದರ ಹೂಗಳನ್ನು ನೋಡುವುದೇ ಚೆನ್ನ. ಪ್ರತಿದಿನ ಈ ರೀತಿಯ ಹೂಗಳನ್ನು ಮೊಬೈಲ್‌ನಲ್ಲಿ ಕ್ಲಿಕ್ಕಿಸಿ ಆಪ್ತರಿಗೆ ವಾಟ್ಸ್‌ಆ್ಯಪ್‌ ಮಾಡುವ ಅಭ್ಯಾಸವನ್ನು ರೂಢಿಸಿಕೊಂಡಿದ್ದೇನೆ’ ಎನ್ನುತ್ತಾರೆ ಶಿಕ್ಷಕ ಕಾಚಹಳ್ಳಿ ಎಂ. ದೇವರಾಜ್.