ಶಾಲೆಯು 1961ರಲ್ಲಿ ಆರಂಭಗೊಂಡಿದ್ದು, ಒಂದರಿಂದ ಏಳನೇ ತರಗತಿವರೆಗೆ ಕಲಿಕೆಗೆ ಅವಕಾಶವಿದೆ. ಮಂಜೂರಾಗಿರುವ ಎಂಟು ಶಿಕ್ಷಕರಿದ್ದಾರೆ. ಏಳು ಕೊಠಡಿಗಳಿದ್ದು, ಎರಡು ಸಂಪೂರ್ಣ ಶಿಥಿಲಗೊಂಡಿವೆ. ಶಾಲೆಯ ಮುಂಭಾಗದ ರಸ್ತೆ ಎತ್ತರದಲ್ಲಿರುವ ಕಾರಣ ಮಳೆಯ ನೀರು ಹೊರಗೆ ಹರಿಯಲು ಅವಕಾಶವಿಲ್ಲದೆ ಶಾಲಾ ಆವರಣದಲ್ಲಿಯೇ ನೀರು ನಿಲ್ಲುತ್ತದೆ. ಮಳೆ ಬಂದ ದಿನಗಳಂದು ಬೆಳಿಗ್ಗೆಯ ಪ್ರಾರ್ಥನೆಯನ್ನು ಆವರಣದ ಬದಲು ವೆರಾಂಡದಲ್ಲಿ ಮಾಡಿಸಲಾಗುತ್ತಿದೆ. ಕೊಠಡಿಗಳ ಒಳಗಿನ ನೀರನ್ನು ಶಿಕ್ಷಕರೇ ಮೊಗೆದು ಹೊರ ಹಾಕಬೇಕಾದ ಸ್ಥಿತಿ ಇದೆ.