ಕುಂಚಿಟಿಗ ಸಮಾಜದ ಅಭಿವೃದ್ಧಿ ಅಗತ್ಯ: ಸಂಸದ ಚಂದ್ರಪ್ಪ

7
ಕುಂಚಿಟಿಗ ಜಾತಿ ಅಸ್ಮಿತೆ ಕುರಿತ ಸಂವಾದ

ಕುಂಚಿಟಿಗ ಸಮಾಜದ ಅಭಿವೃದ್ಧಿ ಅಗತ್ಯ: ಸಂಸದ ಚಂದ್ರಪ್ಪ

Published:
Updated:
Deccan Herald

ಚಿತ್ರದುರ್ಗ: ನೆಲೆ ಇಲ್ಲದ ಕುಂಚಿಟಿಗ ಸಮುದಾಯಕ್ಕೆ ಉತ್ತಮವಾದ ನೆಲೆಗಟ್ಟು ಕಾಣಿಸುವ ಜವಾಬ್ದಾರಿ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ಮೇಲಿದೆ ಎಂದು ಸಂಸದ ಬಿ.ಎನ್. ಚಂದ್ರಪ್ಪ ಅಭಿಪ್ರಾಯಪಟ್ಟರು.

ಜಿಲ್ಲಾ ಕ್ರೀಡಾಭವನದಲ್ಲಿ ಭಾನುವಾರ ಜಿಲ್ಲಾ ಕುಂಚಿಟಿಗರ ಸಂಘದಿಂದ ಹಮ್ಮಿಕೊಂಡಿದ್ದ ಪ್ರತಿಭಾ ಪುರಸ್ಕಾರ, ರಾವ್‍ ಬಹದ್ದೂರ್ ಡಿ. ಬನುಮಯ್ಯ ಜಯಂತಿ, ಕುಂಚಿಟಿಗ ಜಾತಿ ಅಸ್ಮಿತೆ ಕುರಿತ ಸಂವಾದ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

‘ಕುಂಚಿಟಿಗ ಸಮುದಾಯದವರು ಅತ್ತ ವೀರಶೈವರು ಅಲ್ಲ, ಇತ್ತ ಒಕ್ಕಲಿಗರು ಅಲ್ಲ ಎಂಬ ಸಂಕಷ್ಟ ಸ್ಥಿತಿಯಲ್ಲಿ ಇದ್ದಾರೆ. ಈವರೆಗೂ ಅಸಂಘಟಿತರಾಗಿಯೇ ಇದ್ದಾರೆ. ಆದರೆ, ಕಷ್ಟ ಕಾರ್ಪಣ್ಯಗಳು ಬಂದಾಗ ತನ್ನದೆ ಆದ ಜಾತಿಯಿಂದ ಗುರುತಿಸಿಕೊಳ್ಳುವ ಅಗತ್ಯವಿದೆ. ಯಾವುದನ್ನಾದರೂ ಪಡೆಯಬೇಕಾದರೆ, ಹೋರಾಟದಿಂದ ಮಾತ್ರ ಸಾಧ್ಯ. ಅದಕ್ಕಾಗಿ ಕುಂಚಿಟಿಗರು ಸಂಘಟಿತರಾಗಬೇಕು. ನಿಮ್ಮೊಂದಿಗೆ ನಾನೂ ಕೂಡ ಇರುತ್ತೇನೆ’ ಎಂದು ಭರವಸೆ ನೀಡಿದರು.

ಜನಸಂಖ್ಯೆಗೆ ಅನುಗುಣವಾಗಿ ದೇಶದ ಸಂಪತ್ತು ಎಲ್ಲರಿಗೂ ಸಮಾನವಾಗಿ ಹಂಚಿಕೆ ಆಗಬೇಕು ಎಂಬುದು ಡಾ.ಬಿ.ಆರ್. ಅಂಬೇಡ್ಕರ್ ಹಾಗೂ ಗಾಂಧೀಜಿ ಅವರ ಕನಸಾಗಿತ್ತು. ಆದರೆ, ಅದು ಈಡೇರಿಲ್ಲ. ದೇಶದಲ್ಲಿ ನೂರಾರು ಜಾತಿಗಳಿದ್ದು, ಎಲ್ಲದಕ್ಕಿಂತಲೂ ಬಡವ, ಮಧ್ಯಮ, ಶ್ರೀಮಂತ ಈ ಮೂರೇ ಮುಖ್ಯವಾದ ಜಾತಿಗಳಾಗಿವೆ. ಆದ್ದರಿಂದ ತಾರತಮ್ಯ ಹೋಗಲಾಡಿಸಲು ಪ್ರಯತ್ನಿಸಬೇಕಿದೆ ಎಂದರು.

ಬಡವರು ಕೆಳ ಜಾತಿಗಳಲ್ಲಷ್ಟೇ ಅಲ್ಲ, ಮೇಲ್ಜಾತಿಗಳಲ್ಲಿಯೂ ಇದ್ದಾರೆ. ಅದೇ ರೀತಿ ಬುದ್ಧಿವಂತಿಕೆ ಎಂಬುದು ಯಾರಿಗೂ ಸೀಮಿತವಾದುದಲ್ಲ. ನೈಪುಣ್ಯವುಳ್ಳ ಮಕ್ಕಳನ್ನು ಹೆಕ್ಕಿ ತೆಗೆಯುವ ಕೆಲಸ ಶಿಕ್ಷಕರು ಹಾಗೂ ಪೋಷಕರು ಮಾಡಬೇಕಿದೆ. ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಪುರಸ್ಕರಿಸಿದರೆ ಹೆಚ್ಚಿನ ಸಾಧನೆ ಮಾಡಲು ಪ್ರೇರೇಪಿಸಿದಂತಾಗುತ್ತದೆ ಎಂದು ತಿಳಿಸಿದರು.

ಸಾಹಿತಿ ಡಾ. ವಡ್ಡಗೆರೆ ನಾಗರಾಜಯ್ಯ ಮಾತನಾಡಿ, ‘ಕುಂಚಿಟಿಗ ಹೊರತುಪಡಿಸಿ ಜಾತ್ಯತೀತವಾದ ಸಮುದಾಯ ಈ ದೇಶದ ನೆಲದಲ್ಲಿ ಇನ್ಯಾವುದು ಇಲ್ಲ. ಎಲ್ಲ ಸಮುದಾಯವನ್ನು ಪ್ರೀತಿಯಿಂದ ಕಾಣುವ ಸಮುದಾಯವಾಗಿದೆ’ ಎಂದರು.

ಕುಂಚಿಟಿಗರು ಸೋಮಾರಿಗಳಲ್ಲ. ಜ್ಯೋತಿಷಿಗಳಂತೆ ಮನೆಯಲ್ಲಿಯೇ ಕೂತು ತಿನ್ನುವವರೂ ಅಲ್ಲ. ಕಷ್ಟಪಟ್ಟು ದುಡಿಯುವ ಶ್ರಮಜೀವಿಗಳು. ಇಂದು ಆ ಸಂಖ್ಯೆ ಕಡಿಮೆಯಾಗುತ್ತಿದೆ. ಕಾಯಕವೇ ಕೈಲಾಸ ಎಂಬ ಬಸವಣ್ಣ ಅವರ ತತ್ವ ಸಿದ್ಧಾಂತಕ್ಕೆ ಬದ್ಧರಾಗಿ ನಡೆದುಕೊಂಡವರು ಕುಂಚಿಟಿಗರು. ತಾವು ಬೆಳೆಯುವುದರ ಜತೆ ಇತರರನ್ನು ಬೆಳೆಸುವ ಪ್ರವೃತ್ತಿ ಉಳ್ಳವರು. ಆದರೆ, ಇತರೆ ಜಾತಿಗಳಲ್ಲಿ ಗುರುತಿಸಿಕೊಂಡು ಹರಿದು ಹಂಚಿ ಹೋಗಿರುವುದು ಅತ್ಯಂತ ನೋವಿನ ಸಂಗತಿ ಎಂದರು.

ಬುಡಕಟ್ಟು ಸಮುದಾಯಕ್ಕೆ ಸೇರಿದ ಕುಂಚಿಟಿಗರು ತಮ್ಮ ಸಾಂಸ್ಕೃತಿಕ ನಾಯಕ, ನಾಯಕಿಯರನ್ನು, ವೀರಗಲ್ಲುಗಳನ್ನು ಮರೆತಿದ್ದಾರೆ. ಕೆಲವೆಡೆ ಪಾಳು ಬಿದ್ದಿವೆ. ಅವುಗಳನ್ನು ಜೀರ್ಣೋದ್ಧಾರ ಮಾಡುವ ಕೆಲಸ ಸಮುದಾಯದಿಂದ ಆಗಬೇಕಿದೆ. ಅಲ್ಲದೆ, ಇನ್ನಾದರೂ ಎಚ್ಚೆತ್ತುಕೊಂಡು ರಾಜ್ಯ ಮತ್ತು ಕೇಂದ್ರ ಸರ್ಕಾರದಿಂದ ಸಿಗುವ ಸೌಲಭ್ಯಗಳನ್ನು ಹೋರಾಟದ ಮೂಲಕ ಪಡೆದುಕೊಳ್ಳಬೇಕಿದೆ ಎಂದು ಹೇಳಿದರು.

ಎಸ್‌ಎಸ್‌ಎಲ್‌ಸಿ, ಪಿಯುನಲ್ಲಿ ಅತಿ ಹೆಚ್ಚು ಅಂಕಗಳಿಸಿದ ಸಮುದಾಯದ ವಿದ್ಯಾರ್ಥಿಗಳನ್ನು ಸನ್ಮಾನಿಸಲಾಯಿತು.

ಕುಂಚಿಟಿಗರ ಜಿಲ್ಲಾ ಸಂಘದ ಅಧ್ಯಕ್ಷ ಗಾಳಿ ಚಂದ್ರಯ್ಯ ಅಧ್ಯಕ್ಷತೆ ವಹಿಸಿದ್ದರು. ಅಖಿಲ ಕರ್ನಾಟಕ ಕುಂಚಿಟಿಗ ಮಹಾಮಂಡಲದ ರಾಜ್ಯ ಘಟಕದ ಅಧ್ಯಕ್ಷ ಕೆ. ಬಸವಾನಂದ, ಡಾ.ಎಂ.ಜಿ. ಗೋವಿಂದಯ್ಯ, ಛಾಯಾ ಮೋಹನ್, ತಿಮ್ಮಯ್ಯ, ನಾಗರಾಜ್, ಪತ್ರಕರ್ತ ಹರಿಯಬ್ಬೆ ಹೆಂಜಾರಪ್ಪ ಇದ್ದರು.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !