ಮತದಾರರ ಮನವೊಲಿಕೆಗೆ ಮೊಬೈಲ್ ಕರೆ!
ವಿಜಯಪುರ: ಮತದಾನಕ್ಕೂ ಮುನ್ನ ಮತದಾರರ ಮನವೊಲಿಕೆಗಾಗಿ ಅಂತಿಮ ಕ್ಷಣದ ಕಸರತ್ತು ತೀವ್ರಗೊಂಡಿದೆ. ಮೂರು ಪಕ್ಷಗಳ ಅಭ್ಯರ್ಥಿಗಳು ಮೊಬೈಲ್ ಕರೆಯ ಮೊರೆ ಹೊಕ್ಕಿದ್ದರೂ; ಕಮಲ ಪಾಳೆಯ ಎಲ್ಲರಿಗಿಂತ ವಿಭಿನ್ನ ಕಾರ್ಯತಂತ್ರ ರೂಪಿಸಿದೆ.
222 ವಿಧಾನಸಭಾ ಕ್ಷೇತ್ರಗಳಲ್ಲೂ ಬಿಜೆಪಿ ಕಾಲ್ ಸೆಂಟರ್‌ಗಳು ಈಗಾಗಲೇ ಕಾರ್ಯಾಚರಣೆ ಆರಂಭಿಸಿವೆ. ಪ್ರತಿ ಕೇಂದ್ರದಲ್ಲೂ ತರಬೇತಿ ಹೊಂದಿದ 15–20 ಕಾರ್ಯಕರ್ತರು ಕಾರ್ಯ ನಿರ್ವಹಿಸಿದ್ದಾರೆ. ಮತದಾನ ದಿನವಾದ ಶನಿವಾರ (ಮೇ 12) 30ಕ್ಕೂ ಹೆಚ್ಚು ಕಾರ್ಯಕರ್ತರು ಸಕ್ರಿಯರಾಗಲಿದ್ದಾರೆ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ.
‘ಬಿಜೆಪಿ ಈ ಹಿಂದೆ ಹಮ್ಮಿಕೊಂಡಿದ್ದ ಮಿಸ್ಡ್‌ಕಾಲ್‌ ಸದಸ್ಯತ್ವ ಅಭಿಯಾನದಲ್ಲಿ ಸದಸ್ಯರಾದವರ ಸಂಪೂರ್ಣ ವಿವರ ಲಭ್ಯವಿದೆ. ಪ್ರತಿ ಕ್ಷೇತ್ರದಲ್ಲಿ ಕನಿಷ್ಠ 50 ಸಾವಿರದಿಂದ 1 ಲಕ್ಷ ಜನರು ಕಾರ್ಯಕರ್ತರಾಗಿ ನೋಂದಾಯಿಸಿಕೊಂಡಿದ್ದರು. ಈಗಾಗಲೇ ಇವರಿಗೆಲ್ಲಾ ಎರಡೆರೆಡು ಬಾರಿ ಮೊಬೈಲ್ ಮೂಲಕ ಬಿಜೆಪಿಗೆ ಮತ ನೀಡುವಂತೆ ಮನವಿ ಮಾಡಿಕೊಳ್ಳಲಾಗಿದೆ’ ಎಂದು ವಿಜಯಪುರ ನಗರ ಬಿಜೆಪಿ ಮಂಡಲದ ಅಧ್ಯಕ್ಷ ಶಿವರುದ್ರ ಬಾಗಲಕೋಟ ತಿಳಿಸಿದರು.
ಕಾಲ್ ಸೆಂಟರ್ ಕಾರ್ಯ ವೈಖರಿ...
‘ಗುರುವಾರ ರಾತ್ರಿಯೇ ಕಾಲ್ ಸೆಂಟರ್‌ನಲ್ಲಿ ಕಾರ್ಯ ನಿರ್ವಹಿಸುವ ಕಾರ್ಯಕರ್ತರಿಗೆ ತರಬೇತಿ ನೀಡಿದ್ದೇವೆ. ಶನಿವಾರ ನಸುಕಿನ 5 ಗಂಟೆಗೆ ನಮ್ಮ ಕೇಂದ್ರ ಕಾರ್ಯಾರಂಭಿಸಲಿದೆ. ಆರಂಭದಲ್ಲೇ ವಿಜಯಪುರ ನಗರ ವಿಧಾನಸಭಾ ಕ್ಷೇತ್ರದ 272 ಮತಗಟ್ಟೆಗಳ 544 ಬೂತ್‌ (ಪೋಲಿಂಗ್) ಏಜೆಂಟರಿಗೆ ಕರೆ ಮಾಡಿ ಎಚ್ಚರಗೊಳಿಸುತ್ತೇವೆ.
ಮತದಾನ ಆರಂಭಕ್ಕೂ ಮುನ್ನ ಬೆಳಿಗ್ಗೆ 6 ಗಂಟೆಯೊಳಗೆ ಮತಗಟ್ಟೆಗೆ ಪೋಲಿಂಗ್ ಏಜೆಂಟರು ತೆರಳುವಂತೆ ಮೊಬೈಲ್ ಕರೆಗಳ ಮೂಲಕವೇ ಜವಾಬ್ದಾರಿ ನಿಭಾಯಿಸಲಿದ್ದೇವೆ. ನಂತರ ಪೇಜ್‌ ಪ್ರಮುಖ್, ಬೂತ್‌ ಸಶಕ್ತಿಕರಣ ಸಮಿತಿಯಲ್ಲಿ ಕ್ರಿಯಾಶೀಲರಾಗಿರುವ ಕಾರ್ಯಕರ್ತರಿಗೆ ಮೊಬೈಲ್ ಕರೆ ಮಾಡಿ, ಮನೆ ಮನೆಗೆ ತೆರಳಿ, ಮತದಾರರನ್ನು ಮತಗಟ್ಟೆಗೆ ಕರೆದೊಯ್ಯುವಂತೆ ಸೂಚಿಸುತ್ತೇವೆ.
ಆಗಿಂದಾಗ್ಗೆ ಪೇಜ್‌ ಪ್ರಮುಖರಿಂದ ಮಾಹಿತಿ ಪಡೆಯುತ್ತೇವೆ. ಇದರ ನಡುವೆಯೇ ಬಿಜೆಪಿ ಕಾರ್ಯಕರ್ತರು, ವಿವಿಧೆಡೆಯಿಂದ ಸಂಗ್ರಹಿಸಿರುವ ಮತದಾರರ ಮೊಬೈಲ್‌ಗಳಿಗೆ ಕರೆ ಮಾಡುತ್ತೇವೆ. ‘ನಮಸ್ಕಾರ್ರೀ, ನಾವು ಬಿಜೆಪಿ ಕಚೇರಿಯಿಂದ ಮಾತಾಡ್ತಿದ್ದೀವ್ರೀ. ಆರಾಮಿದ್ದೀರಿ ಅಣ್ಣಾವ್ರಾ, ಅಕ್ಕಾವ್ರಾ. ಮರಿಬ್ಯಾಡ್ರೀ. ಕಮಲದ ಹೂವಿಗೆ ಮತ ಹಾಕಿ’ ಎಂದು ಮೊಬೈಲ್ ಕರೆಯಲ್ಲೇ ಮನವೊಲಿಸುವ ಯೋಜನೆ ರೂಪಿಸಿಕೊಂಡಿದ್ದೇವೆ.
ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಸೂಚನೆಯಂತೆ 223 ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಈ ಕಾಲ್ ಸೆಂಟರ್‌ಗಳು ಶನಿವಾರ ಕಾರ್ಯ ನಿರ್ವಹಿಸಲಿದ್ದಾವೆ. ತಾಸು, ಎರಡು ತಾಸಿಗೊಮ್ಮೆ ಬೆಂಗಳೂರಿನ ಬಿಜೆಪಿ ಕೇಂದ್ರ ಕಚೇರಿಯಿರುವ ಜಗನ್ನಾಥ ಭವನದಲ್ಲಿ ಕಾರ್ಯಾಚರಿಸುವ ರಾಜ್ಯ ಘಟಕದ ಕಾಲ್ ಸೆಂಟರ್‌ಗೆ ಮಾಹಿತಿ ರವಾನಿಸುತ್ತೇವೆ. ಎಷ್ಟು ಪರ್ಸೆಂಟೇಜ್‌ ಮತದಾನ ನಡೆದಿದೆ ಎಂಬುದರ ಮಾಹಿತಿ ಅಪ್‌ಡೇಟ್‌ ಮಾಡುತ್ತೇವೆ’ ಎಂದು ಬಾಗಲಕೋಟ ಮಾಹಿತಿ ನೀಡಿದರು.
ಫೋನ್‌ ಮಾಡಿದ್ರೇ ಮತಗಟ್ಟೆ ವಿಳಾಸ ಹೇಳ್ತೀವಿ...
ಕಾಲ್ ಸೆಂಟರ್‌ನಲ್ಲಿ ಕಾರ್ಯ ನಿರ್ವಹಿಸುವ ಕಾರ್ಯಕರ್ತರ ಮೊಬೈಲ್ ನಂಬರ್‌ಗಳನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಈಗಾಗಲೇ ವೈರಲ್‌ ಮಾಡಿದ್ದೇವೆ. ಮತದಾರರು ಈ ಸಂಖ್ಯೆಗಳಿಗೆ ಕರೆ ಮಾಡಿ ತಮ್ಮ ಹೆಸರು, ವಿಳಾಸವನ್ನು ಹೇಳಿದರೆ ಯಾವ ಮತಗಟ್ಟೆಯಲ್ಲಿ ಮತದಾನ ಮಾಡಬಹುದು ಎಂಬುದನ್ನು ತಿಳಿಸಲು ಸಕಲ ವ್ಯವಸ್ಥೆ ಮಾಡಿಕೊಂಡಿದ್ದೇವೆ ಎಂದು ಶಿವರುದ್ರ ಹೇಳಿದರು.\
**
ಮತದಾರರನ್ನು ಅಂತಿಮ ಕ್ಷಣದಲ್ಲೂ ನೇರವಾಗಿ ತಲುಪಲು ಕಾಲ್ ಸೆಂಟರ್ ಆರಂಭಿಸಿದ್ದೇವೆ. ಮತ ಪಡೆಯುವ ತಂತ್ರಗಾರಿಕೆ ನಡೆಸಿದ್ದೇವೆ
- ರವಿ ಖಾನಾಪುರ, ವಿಜಯಪುರ ಜಿಲ್ಲಾ ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.