ಬಹಿಷ್ಕಾರಕ್ಕೆ ಕಾರಣ:ನಂದಿಬೇವೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ನಾಲ್ಕು ಹಳ್ಳಿಗಳು ಸೇರಿವೆ. ವಾರ್ಡ್ ವಿಂಗಡಣೆ ನಂತರ ಆರು ಸ್ಥಾನವಿದ್ದ ನಂದಿಬೇವೂರ ಗ್ರಾಮಕ್ಕೆ ಹತ್ತು ಸ್ಥಾನ, ಮೂರು ಸ್ಥಾನ ಹೊಂದಿದ್ದ ನಂದಿಬೇವೂರು ತಾಂಡಾಗೆ ನಾಲ್ಕು ಸ್ಥಾನ, ನಾಲ್ಕು ಸ್ಥಾನ ಹೊಂದಿದ್ದ ಕೊಂಗಣಹೊಸೂರು ಗ್ರಾಮಕ್ಕೆ 5 ಸದಸ್ಯ ಸ್ಥಾನ ಸಿಕ್ಕಿದ್ದವು. ಆದರೆ ಇದೇ ಗ್ರಾಮ ಪಂಚಾಯಿತಿಗೆ ಒಳಪಡುವ ಕಣವಿಹಳ್ಳಿ ಗ್ರಾಮ 1904 ಮತದಾರರನ್ನು ಹೊಂದಿದ್ದರೂ ಹೆಚ್ಚುವರಿ ಸ್ಥಾನಗಳು ದೊರೆತಿರಲಿಲ್ಲ. ಇದ್ದ ಐದು ಸದಸ್ಯ ಸ್ಥಾನಗಳಲ್ಲೇ ಒಂದನ್ನು ಕಡಿತಗೊಳಿಸಿ ನಾಲ್ಕಕ್ಕೆ ಸೀಮಿತಗೊಳಿಸಿದ್ದು ಗ್ರಾಮಸ್ಥರ ಅಸಮಾಧಾನಕ್ಕೆ ಕಾರಣವಾಗಿತ್ತು.