ಮಂಗಳವಾರ, ಮಾರ್ಚ್ 31, 2020
19 °C

'ಮೇ ಸಾಹಿತ್ಯ ಮೇಳ' ದಾವಣಗೆರೆಯಲ್ಲಿ ನಡೆಸಲು ನಿರ್ಧಾರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ದಾವಣಗೆರೆ: ಲಡಾಯಿ ಪ್ರಕಾಶನ ಮತ್ತು ವಿವಿಧ ಸಂಘಟನೆಗಳ ಆಶ್ರಯದಲ್ಲಿ ಹಲವು ವರ್ಷಗಳಿಂದ ನಡೆಸಿಕೊಂಡು ಬರುತ್ತಿರುವ ರಾಷ್ಟ್ರೀಯ ಮಟ್ಟದ ಮೇ ಸಾಹಿತ್ಯ ಮೇಳ ಈ ಬಾರಿ ದಾವಣಗೆರೆಯಲ್ಲಿ ನಡೆಸಲು ನಿರ್ಧರಿಸಲಾಗಿದೆ.

ನಗರದ ನಿರೀಕ್ಷಣಾ ಮಂದಿರದಲ್ಲಿ ಭಾನುವಾರ ನಡೆದ ಒಡನಾಡಿಗಳ ಸಭೆಯಲ್ಲಿ ಈ ತೀರ್ಮಾನಕ್ಕೆ ಬರಲಾಗಿದೆ.

ಶುದ್ಧ ಸಾಹಿತ್ಯ ಮೇಳ ಎಂದು ಕೆಲವನ್ನು ಕರೆಯಲಾಗುತ್ತದೆ. ಅಂಥ ಮೇಳ ಇದಲ್ಲ. ಸಾಹಿತ್ಯದ ಜತೆಗೆ ಸೌಹಾರ್ದ, ಗೌರವಯುತ ಸಮಾಜವನ್ನು ಕಟ್ಟುವ ಜನರ ಮೇಳ ಇದು. ಆಳುವವರ ಮರ್ಜಿಯಲ್ಲಿ, ಉದ್ಯಮಿಗಳ ಮುಲಾಜಿನಲ್ಲಿ, ರಾಜಕಾರಣಿಗಳ ಹಣದಲ್ಲಿ ಮೇ ಸಾಹಿತ್ಯ ಮೇಳ ನಡೆಸುವುದಿಲ್ಲ. ರಾಜ್ಯದ ವಿವಿಧ ಕಡೆಗಳಿಂದ ಬರುವ ಜನರು ನೀಡುವ ಸಹಾಯ, ಸಂಘಟಕರು, ಜನಸಾಮಾನ್ಯರ ನೆರವಿನಿಂದ ನಡೆಸಲಾಗುತ್ತಿದೆ ಎಂದು ಲಡಾಯಿ ಪ್ರಕಾಶನದ ಬಸವರಾಜ್‌ ಸೂಳಿಬಾವಿ ತಿಳಿಸಿದರು.

ಎರಡು ದಿನಗಳ ಕಾಲ ಸಾಹಿತ್ಯದ ಚರ್ಚೆಯ ಜತೆಗೆ ದೇಶದಲ್ಲಿ ನಡೆಯುತ್ತಿರುವ ವಿದ್ಯಮಾನಗಳ ಬಗ್ಗೆಯೂ ಚರ್ಚೆಮ ಸಂವಾದ, ಗೋಷ್ಠಿಗಳು ನಡೆಯಲಿವೆ. ಮೇ 16 ಮತ್ತು 17ರಂದು ಮೇ ಸಾಹಿತ್ಯ ಮೇಳ ನಡೆಸಲಾಗುವುದು ಎಂದು ವಿವರಿಸಿದರು.

ಧಾರವಾಡ, ಗದಗಗಳಿಗೆ ಸೀಮಿತವಾಗದೇ ರಾಜ್ಯದ ಎಲ್ಲ ಕಡೆಗಳಲ್ಲಿ ನಡೆಯಬೇಕು. ದಾವಣಗೆರೆಯಲ್ಲಿ ನಡೆಯುತ್ತಿರುವ ಎಲ್ಲ ಪ್ರಗತಿಪರ ಹೋರಾಟಗಳಿಗೆ ಬೆಂಬಲವಾಗಿ ಈ ಬಾರಿ ಇಲ್ಲಿ ನಡೆಸಬೇಕು ಎಂದು ಬಿ. ಶ್ರೀನಿವಾಸ್‌ ಅಭಿಪ್ರಾಯ ವ್ಯಕ್ತಪಡಿಸಿದರು.

ಮಕ್ಕಳಲ್ಲಿ ವಿಷ ಬೀಜ ಬಿತ್ತುವ ಕೆಲಸಗಳು ನಡೆಯುತ್ತಿವೆ. ಇಂಥ ಮೇಳಗಳ ಮೂಲಕ ವಿಷ ಬೀಜ ಕಿತ್ತು ಹಾಕುವ, ಮಕ್ಕಳನ್ನು ತಿದ್ದುವ ಕೆಲಸಗಳಾಗಬೇಕು ಎಂದು ಅನಿಸ್‌ಪಾಷಾ ಸಲಹೆ ನೀಡಿದರು.

ಮೇಳದ ರೂಪುರೇಷೆ ಮಾಡಲು ಸಮಿತಿಗಳನ್ನು ರಚಿಸಬೇಕು. ಯುವಜನರು ಹೆಚ್ಚು ಮಂದಿ ಭಾಗವಹಿಸುವಂತೆ ಕಾರ್ಯಕ್ರಮ ರೂಪಿಸಬೇಕು ಎಂದು ಸಾಹಿತಿ ಕಲೀಂ ಪಾಷಾ ತಿಳಿಸಿದರು.

ಸೈದ್ಧಾಂತಿಕ ಹೋರಾಟದ ಕೇಂದ್ರ ದಾವಣಗೆರೆ. ಈ ಮೇಳದ ಮೂಲಕ ಇಲ್ಲಿನ ಹೋರಾಟಗಾರರು ಮತ್ತೆ ಕ್ರಿಯಾಶೀಲರಾಗಬೇಕು. ವಿವಿಧ ಸಂಘಟನೆಗಳ ಹೆಸರಲ್ಲಿ ಮತ್ತೆ ಮತ್ತೆ ನಾವೇ ಕಾಣಿಸಿಕೊಳ್ಳುವಂತಾಗಿದೆ. ಈ ಮೇಳದ ಮೂಲಕ ಜನಪರ ಹೋರಾಟಗಳಿಗೆ ಹೊಸಬರು ಬರುವಂತಾಗಲಿ ಎಂದು ಉಪನ್ಯಾಸಕ ಡಾ. ಎ.ಬಿ. ರಾಮಚಂದ್ರಪ್ಪ ಆಶಯ ವ್ಯಕ್ತಪಡಿಸಿದರು.

ದಾವಣಗೆರೆಯಲ್ಲಿ ಯಶಸ್ವಿಯಾಗಿ ನಡೆಸಲು ಬೇಕಾದ ಕ್ರಮಗಳನ್ನು ಕೈಗೊಳ್ಳುವುದಾಗಿ ಮಲ್ಲಿಕಾರ್ಜುನ್ ಕಲ್ಮರಳಿ, ಮಹಾಂತೇಶ್, ರಾಘು ದೊಡ್ಮನಿ, ಆವರಗೆರೆ ರುದ್ರಮುನಿ, ಷಣ್ಮುಖಪ್ಪ, ಸತೀಶ್‌ ಅರವಿಂದ್‌, ಶ್ರೀನಿವಾಸ್‌, ಬಸವರಾಜ ಪೂಜಾರ, ಶಬೀರ್ ಅಲಿ, ಶಿವಕುಮಾರ್, ಗಂಗಾಧರ್ ಅವರೂ ತಿಳಿಸಿದರು.

ಮಾರ್ಚ್‌ 22ರಂದು ಬೆಳಿಗ್ಗೆ 10.30ಕ್ಕೆ ಬಿಇಇಟಿ ಕಾಲೇಜು ರಸ್ತೆ ಹೇಮಾವತಿ ವಸತಿನಿಲಯದ ಮುಂದೆ ಇರುವ ಜೆ.ಎಚ್‌. ಪಟೇಲ್‌ ಕಾಲೇಜಿನ ಸಭಾಂಗಣದಲ್ಲಿ ಈ ಸಾಹಿತ್ಯ ಮೇಳದ ಬಗ್ಗೆ ಚರ್ಚೆ ನಡೆಸಲು ನಿರ್ಧರಿಸಲಾಯಿತು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು