ಮಳೆ: ದಾವಣಗೆರೆ ಜಿಲ್ಲೆಯಲ್ಲಿ ₹ 8.10 ಲಕ್ಷ ನಷ್ಟ

ದಾವಣಗೆರೆ: ನಗರ ಸೇರಿ ಜಿಲ್ಲೆಯ ವಿವಿಧೆಡೆ ಸೋಮವಾರ ಉತ್ತಮವಾಗಿ ಮಳೆ ಬಿದ್ದಿದೆ. ಜಿಲ್ಲೆಯಲ್ಲಿ ಭಾನುವಾರ 13.06 ಮಿ.ಮೀ. ಸರಾಸರಿ ಮಳೆಯಾಗಿದ್ದು, ₹ 8.10ಲಕ್ಷ ನಷ್ಟವಾಗಿದೆ.

ಚನ್ನಗಿರಿ ತಾಲ್ಲೂಕಿನಲ್ಲಿ 22.75 ಮಿ.ಮೀ, ದಾವಣಗೆರೆಯಲ್ಲಿ 26.46 ಮಿ.ಮೀ., ಹರಿಹರದಲ್ಲಿ 3.40 ಮಿ.ಮೀ., ಹೊನ್ನಾಳಿ 5.70 ಮಿ.ಮೀ ಹಾಗೂ ಜಗಳೂರು ತಾಲ್ಲೂಕಿನಲ್ಲಿ 7 ಮಿಲಿ ಮೀಟರ್ ಮಳೆಯಾಗಿದೆ.

ದಾವಣಗೆರೆ ತಾಲ್ಲೂಕು ವ್ಯಾಪ್ತಿಯಲ್ಲಿ 7 ಕಚ್ಚಾ ಮನೆಗಳಿಗೆ ಹಾನಿಯಾಗಿದ್ದು, ₹ 2.10 ಲಕ್ಷ ನಷ್ಟವಾಗಿದೆ. 4 ಎಕರೆ ಮೆಕ್ಕೆಜೋಳ ಸೇರಿ ₹1 ಲಕ್ಷ ಸೇರಿದಂತೆ ₹ 3.10 ಲಕ್ಷ ನಷ್ಟ ಸಂಭವಿಸಿದೆ.

ಹರಿಹರ ತಾಲ್ಲೂಕು ವ್ಯಾಪ್ತಿಯಲ್ಲಿ 3 ಪಕ್ಕಾ ಮನೆಗಳಿಗೆ ಹಾನಿಯಾಗಿ ₹‌ 1.20 ಲಕ್ಷ, 1 ಕಚ್ಚಾ ಮನೆಗೆ ಹಾನಿಯಾಗಿ ₹ 30 ಸಾವಿರ ಸೇರಿ ₹1.50 ಲಕ್ಷ ನಷ್ಟವಾಗಿದೆ.

ಚನ್ನಗಿರಿ ತಾಲ್ಲೂಕು ವ್ಯಾಪ್ತಿಯಲ್ಲಿ 1 ಮನೆಗೆ ತೀವ್ರ ಹಾನಿಯಾಗಿದ್ದು, ₹ 1 ಲಕ್ಷ ನಷ್ಟವಾಗಿದೆ. 2 ಪಕ್ಕಾ ಮನೆಗಳಿಗೆ  ಭಾಗಶಃ ಹಾನಿಯಾಗಿದ್ದು, ₹1 ಲಕ್ಷ ಮತ್ತು 1 ಕಚ್ಚಾ ಮನೆ ತೀವ್ರ ಹಾನಿಯಾಗಿದ್ದು ₹ 1.50 ಲಕ್ಷ ಸೇರಿ ₹ 3.50 ಲಕ್ಷ ನಷ್ಟ ಸಂಭವಿಸಿದೆ. ಸರ್ಕಾರದ ಮಾರ್ಗಸೂಚಿ ಅನ್ವಯ ಸಂತ್ರಸ್ತರಿಗೆ ಪರಿಹಾರ ವಿತರಿಸಲು ಕ್ರಮ ವಹಿಸಲಾಗುವುದೆಂದು ಜಿಲ್ಲಾಧಿಕಾರಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.