ಕುಂದಗೋಳ | ದಶಕ ಕಳೆದರೂ ಕಾರ್ಯಾರಂಭಿಸದ ಪ್ರಾಥಮಿಕ ಆರೋಗ್ಯ ಕೇಂದ್ರ

ಮಾಜಿ ಮುಖ್ಯಮಂತ್ರಿಗಳಾದ ಎಸ್.ಆರ್. ಬೊಮ್ಮಾಯಿ, ಬಸವರಾಜ ಬೊಮ್ಮಾಯಿ ಅವರ ಮೂಲ ಊರಿನ ಅವ್ಯವಸ್ಥೆ ಇದು. ಜಿಲ್ಲೆಯಲ್ಲಿಯೇ ‘ಹಿಂದುಳಿದ ತಾಲ್ಲೂಕು’ ಹಣೆಪಟ್ಟಿ ಹೊಂದಿರುವುದು ಕುಂದಗೋಳ. ತಾಲ್ಲೂಕಿನಲ್ಲಿ ಅತಿಹೆಚ್ಚು ಜನಸಂಖ್ಯೆ ಹೊಂದಿರುವ (ಅಂದಾಜು 15 ಸಾವಿರ) ಊರುಗಳಲ್ಲಿ ಇದೂ ಒಂದು.

ಗ್ರಾಮಕ್ಕೆ ಮಂಜೂರಾದ ಆರೋಗ್ಯ ಕೇಂದ್ರ ಕಾರಣಾಂತರಗಳಿಂದ 2012ರಲ್ಲಿ ರದ್ದಾಗಿತ್ತು. ಈ ಆದೇಶವನ್ನು 2014ರ ಫೆಬ್ರುವರಿಯಲ್ಲಿ ಹಿಂಪಡೆದ ಸರ್ಕಾರವು ಆರೋಗ್ಯ ಕೇಂದ್ರವನ್ನು ಪುನಃ ಮಂಜೂರು ಮಾಡಿತ್ತು. ಬಸವರಾಜ ಬೊಮ್ಮಾಯಿ ಅವರು ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕಾಗಿ ಎರಡು ಎಕರೆ ಭೂಮಿಯನ್ನೂ ದಾನ ನೀಡಿದ್ದಾರೆ. ಆದರೆ ಈವರೆಗೂ ಶಾಶ್ವತ ಕಟ್ಟಡ ನಿರ್ಮಾಣ ಕಾರ್ಯ ಮಾತ್ರ ಮರೀಚಿಕೆಯೇ ಆಗಿದೆ.

‘ಸಮಸ್ಯೆಯ ಬಗ್ಗೆ ಈ ಹಿಂದೆ ಶಾಸಕರಾದ ಸಿ.ಎಸ್. ಶಿವಳ್ಳಿ, ಎಸ್.ಐ. ಚಿಕ್ಕನಗೌಡ್ರ, ಕುಸುಮಾವತಿ ಶಿವಳ್ಳಿ ಅವರ ಗಮನಕ್ಕೆ ತಂದಿದ್ದೆವು. ಹಾಲಿ ಶಾಸಕ ಎಂ.ಆರ್. ಪಾಟೀಲ ಅವರ ಗಮನಕ್ಕೂ ತಂದಿದ್ದೇವೆ. ಚುನಾವಣೆ ಇದ್ದಾಗ ಮಾತ್ರ ಕಮಡೊಳ್ಳಿ ಜನ ಬೇಕು, ನಂತರ ನಾವ್ಯಾರಿಗೂ ಬೇಡ’ ಎಂದು ಊರಿನ ಮುಖಂಡ ಜಗದೀಶ ಸಂಶಿ ಅಲವತ್ತುಕೊಂಡರು.

‘ಜನತಾ ದರ್ಶನ ಕಾರ್ಯಕ್ರಮದಲ್ಲಿ ಉಸ್ತುವಾರಿ ಸಚಿವ ಸಂತೋಷ್ ಲಾಡ್ ಅವರಿಗೆ ಮನವಿ ಸಲ್ಲಿಸಲಾಗಿದೆ. ಜಿಲ್ಲಾ ಆರೋಗ್ಯ ಅಧಿಕಾರಿಯವರ ಗಮನಕ್ಕೂ ತಂದಿದ್ದೇವೆ. ಬಸವರಾಜ ಬೊಮ್ಮಾಯಿ ಮುಖ್ಯಮಂತ್ರಿ ಇದ್ದಾಗ ಸರ್ಕಾರಕ್ಕೆ ಪತ್ರ ಬರೆದಿದ್ದೇವೆ’ ಎನ್ನುತ್ತಾರೆ ವೀರನಗೌಡಗೌಡ ಪಾಟೀಲ.

‘ಆರೋಗ್ಯ ಮತ್ತು ಕ್ಷೇಮ ಕೇಂದ್ರದಲ್ಲಿ ಆಮ್ಲಜನಕ ವ್ಯವಸ್ಥೆಯೂ ಇಲ್ಲ. ಹಾವು ಕಚ್ಚಿದರೆ, ಅಪಘಾತವಾದಾಗ, ಹೆರಿಗೆ ಸಮಯದಲ್ಲಿ ತಾಲ್ಲೂಕು ಕೇಂದ್ರವಾದ ಕುಂದಗೋಳ ಆಸ್ಪತ್ರೆಗೆ ಹೋಗದೆ ವಿಧಿಯಿಲ್ಲ’ ಎಂದು ತಿಳಿಸಿದರು ಮುಖಂಡ ರುದ್ರಪ್ಪ ಖ್ಯಾತಗೌಡ್ರ.

ಗ್ರಾಮದಲ್ಲಿ ಖಾಸಗಿ ವೈದ್ಯರಿದ್ದಾರೆ, ಆದರೆ ಸರ್ಕಾರಿ ಆಸ್ಪತ್ರೆ ಕನಸಾಗಿಯೇ ಉಳಿದಿದೆ. ಸ್ಥಳೀಯ ರಾಜಕೀಯ ಕೆಸರೆರಚಾಟಕ್ಕೆ ಬಡವರು ಬೆಲೆ ತೆರಏಕಾಗಿದೆ ಎನ್ನುವುದು ಗ್ರಾಮಸ್ಥರ ಅಭಿಪ್ರಾಯ.