ಭಾನುವಾರ, ಜನವರಿ 17, 2021
27 °C
ಎರಡು ಹಂತದಲ್ಲಿ ಚುನಾವಣೆ; ವೇಳಾಪಟ್ಟಿ ಪ್ರಕಟ– ಡಿ.31ರ ವರೆಗೆ ನೀತಿಸಂಹಿತೆ ಜಾರಿ

ಹಾಸನದ 245 ಗ್ರಾ.ಪಂ: 3,352 ಸ್ಥಾನಕ್ಕೆ ಚುನಾವಣೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಹಾಸನ: ಜಿಲ್ಲೆಯ 267 ಗ್ರಾಮ ಪಂಚಾಯಿತಿಗಳಲ್ಲಿ ಅವಧಿ ಮುಗಿಯದ 12 ಪಂಚಾಯಿತಿಗಳು ಹಾಗೂ ನಗರ ಸ್ಥಳೀಯ ಸಂಸ್ಥೆಗಳಿಗೆ ಸೇರ್ಪಡೆಗೊಂಡ 10 ಗ್ರಾಮ ಪಂಚಾಯಿತಿಗಳನ್ನು ಹೊರತುಪಡಿಸಿ, ಉಳಿದ 245 ಗ್ರಾಮ ಪಂಚಾಯಿತಿಗಳ ಒಟ್ಟು 3,352 ಸ್ಥಾನಗಳಿಗೆ ಎರಡು ಹಂತಗಳಲ್ಲಿ ಚುನಾವಣೆ ನಡೆಯಲಿದೆ ಎಂದು ಜಿಲ್ಲಾಧಿಕಾರಿ ಆರ್‌. ಗಿರೀಶ್‌ ತಿಳಿಸಿದ್ದಾರೆ.

ಮೊದಲ ಹಂತದ ಚುನಾವಣೆ ಡಿ. 22 ರಂದು ಹಾಸನ, ಅರಕಲಗೂಡು, ಚನ್ನರಾಯಪಟ್ಟಣ ಹಾಗೂ ಸಕಲೇಶಪುರ ತಾಲ್ಲೂಕುಗಳಲ್ಲಿ ನಡೆದರೆ. ಎರಡನೇ ಹಂತದ ಚುನಾವಣೆ ಡಿ. 27ರಂದು ಅರಸೀಕೆರೆ, ಬೇಲೂರು, ಆಲೂರು ಹಾಗೂ ಹೊಳೆನರಸೀಪುರ ತಾಲ್ಲೂಕುಗಳಲ್ಲಿ ನಡೆಯಲಿದೆ.

ನಾಮಪತ್ರಗಳನ್ನು ಸಲ್ಲಿಸಲು ಮೊದಲನೆ ಹಂತಕ್ಕೆ ಡಿ.7 ಹಾಗೂ ಎರಡನೇ ಹಂತಕ್ಕೆ ಡಿ. 11 ಕೊನೆಯ ದಿನವಾಗಿದೆ. 

ನಾಮಪತ್ರ ಪರಿಶೀಲನೆ ಮೊದಲನೆ ಹಂತ (ಡಿ.12), ಎರಡನೇ ಹಂತಕ್ಕೆ ಡಿ. 17 ರಂದು ನಡೆಯಲಿದೆ.

ಉಮೇದುವಾರಿಕೆ ಹಿಂಪಡೆಯಲು ಮೊದಲನೆ ಹಂತಕ್ಕೆ ಡಿ. 14 ಹಾಗೂ ಎರಡನೇ ಹಂತಕ್ಕೆ ಡಿ. 19 ಕೊನೆಯ ದಿನವಾಗಿದೆ.

ಮತಗಳ ಎಣಿಕೆ ಡಿ.30ರಂದು ಆಯಾ ತಾಲ್ಲೂಕು ಕೇಂದ್ರಗಳಲ್ಲಿ ಬೆಳಿಗ್ಗೆ 8 ಗಂಟೆಯಿಂದ
ನಡೆಯಲಿದೆ.

‘ಚುನಾವಣಾ ನೀತಿ ಸಂಹಿತೆ ನ. 30ರಿಂದ ಡಿ. 31ರ ಸಂಜೆ 5 ಗಂಟೆಯವರೆಗೆ ಜಾರಿಯಲ್ಲಿರುತ್ತದೆ. ನೀತಿ ಸಂಹಿತೆಯು ಪಟ್ಟಣ ಪಂಚಾಯಿತಿ, ಪುರಸಭೆ, ನಗರಸಭೆ, ನಗರ ಪಾಲಿಕೆ, ಮಹಾನಗರ ಪಾಲಿಕೆ ಪ್ರದೇಶಗಳಿಗೆ ಅನ್ವಯವಾಗುವುದಿಲ್ಲ’ ಎಂದು ಜಿಲ್ಲಾಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ

‘ಜಿಲ್ಲೆಯಲ್ಲಿ ಒಟ್ಟು 10,70,545 ಮತದಾರರು ಇದ್ದಾರೆ. ಕೋವಿಡ್ ಕಾರಣದಿಂದ ರಾಜ್ಯ ಚುನಾವಣಾ ಆಯೋಗವು ಮಾರ್ಗಸೂಚಿ ತಯಾರಿಸಿದೆ. ಆಯೋಗದ ಸೂಚನೆ ಪಾಲಿಸಿ ಚುನಾವಣೆ ನಡೆಸಲಾಗುವುದು. ಮತದಾರರರು ಯಾವುದೇ ಆತಂಕವಿಲ್ಲದೆ ತಮ್ಮ ಮತ ಚಲಾಯಿಸಬಹುದು’ ಎಂದು ಜಿಲ್ಲಾಧಿಕಾರಿಗಳು
ತಿಳಿಸಿದ್ದಾರೆ.

‘ಜಿಲ್ಲೆಯ 2,003 ಮತಗಟ್ಟೆಗಳಿಗೆ ಸುಮಾರು 8,850 ಮತಗಟ್ಟೆ ಅಧಿಕಾರಿ ಹಾಗೂ ಸಿಬ್ಬಂದಿ ನೇಮಿಸಲಾಗುವುದು. ಚುನಾವಣೆಗಾಗಿ ಅಂಗವಾಡಿ ಕಾರ್ಯಕರ್ತೆಯರು, ಆಶಾ ಕಾರ್ಯಕರ್ತೆಯರು ಹಾಗೂ ಆರೋಗ್ಯ ಇಲಾಖೆಯ ಸಿಬ್ಬಂದಿ ಸೇವೆಯನ್ನು ಪಡೆದುಕೊಳ್ಳಲಾಗುವುದು’ ಎಂದು ತಿಳಿಸಿದ್ದಾರೆ.

ನಗರ ಸ್ಥಳೀಯ ಸಂಸ್ಥೆಗಳಿಗೆ ಸೇರ್ಪಡೆಗೊಂಡ ಪಂಚಾಯಿತಿಗಳ ವಿವರ: ಹಾಸನ ತಾಲ್ಲೂಕಿನ ಬಿ. ಕಾಟೀಹಳ್ಳಿ, ಬೂವನಹಳ್ಳಿ, ಹರಳಹಳ್ಳಿ, ಕಂದಲಿ, ಹಂದಿನಕೆರೆ, ಮಣಚನಹಳ್ಳಿ, ಸತ್ಯಮಂಗಲ, ತಟ್ಟೇಕೆರೆ, ತೇಜೂರು, ಹೂವಿನಹಳ್ಳಿ ಕಾವಲು, ದೊಡ್ಡಗೇಣಿಗೆರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.