ಹಾವೇರಿ: ಸರ್ಕಾರಿ ವೈದ್ಯ, ನೇತ್ರಾಧಿಕಾರಿ, ಆರೋಗ್ಯ ಹಾಗೂ ಶಿಕ್ಷಣ ಇಲಾಖೆ ನೌಕರರು ಒಳಗೊಂಡಂತೆ ಜಿಲ್ಲೆಯಲ್ಲಿ ಗುರುವಾರ 155 ಮಂದಿಗೆ ಕೋವಿಡ್-19 ದೃಢಪಟ್ಟಿದೆ ಹಾಗೂ 101 ಮಂದಿ ಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ ಎಂದು ಜಿಲ್ಲಾಧಿಕಾರಿ ಸಂಜಯ ಶೆಟ್ಟೆಣ್ಣವರ ತಿಳಿಸಿದ್ದಾರೆ.
ತಾಲ್ಲೂಕುವಾರು ವಿವರ:
ಸವಣೂರು-9, ಬ್ಯಾಡಗಿ-12, ಹಿರೇಕೆರೂರು-19, ಹಾವೇರಿ-21, ಹಾನಗಲ್ ಹಾಗೂ ಶಿಗ್ಗಾವಿ ತಲಾ 24, ರಾಣೆಬೆನ್ನೂರು-44 ಹಾಗೂ ಇತರೆ ಇಬ್ಬರಿಗೆ ಸೋಂಕು ದೃಢಪಟ್ಟಿದೆ.
ಸೋಂಕಿನಿಂದ ಗುಣಮುಖರಾಗಿ ಹಿರೇಕೆರೂರು-2, ಹಾನಗಲ್-8, ಸವಣೂರು-9, ಹಾವೇರಿ-15, ಬ್ಯಾಡಗಿ-17, ರಾಣೆಬೆನ್ನೂರು-18, ಶಿಗ್ಗಾವಿ ತಾಲ್ಲೂಕಿನ 32 ಮಂದಿ ಬಿಡುಗಡೆ ಹೊಂದಿದ್ದಾರೆ.
ಮರಣ:
ರಾಣೆಬೆನ್ನೂರು ತಾಲ್ಲೂಕಿನ ಹೊನ್ನತ್ತಿ ಗ್ರಾಮದ 70 ವರ್ಷದ ಮಹಿಳೆ, ಹಿರೇಕೆರೂರು ತಾಲ್ಲೂಕು ದೊಡ್ಡಗುಬ್ಬಿ ಗ್ರಾಮದ 72 ವರ್ಷದ ಪುರುಷ, ಶಿಗ್ಗಾವಿ ತಾಲ್ಲೂಕು ಚಾಕಾಪುರದ 45 ವರ್ಷದ ಪುರುಷ ಹಾಗೂ ಬ್ಯಾಡಗಿ ತಾಲ್ಲೂಕಿನ ಕಾಟೇನಹಳ್ಳಿಯ 70 ವರ್ಷದ ಪುರುಷ ಸೇರಿದಂತೆ ನಾಲ್ವರು ಕೋವಿಡ್‌ನಿಂದ ಮೃತಪಟ್ಟಿರುವುದನ್ನು ದೃಢೀಕರಿಸಲಾಗಿದೆ.
