ಅಫಜಲಪುರ: ಭೀಮಾ ಪ್ರವಾಹ ಏರುತ್ತಿರುವದರಿಂದ ತಾಲ್ಲೂಕಿನ ಬೋಸಗಾ ಮತ್ತು ಉಡಚಾಣ ಗ್ರಾಮಗಳ ಮನೆಗಳಿಗೆ ನೀರು ನುಗ್ಗಿದೆ.
ತಾಲ್ಲೂಕಿನ ಬೋಸಗಾ ಗ್ರಾಮದಲ್ಲಿ ಸುಮಾರು 100 ಮನೆಗಳು ಜಲಾವೃತವಾಗಿವೆ ಮತ್ತು ಅಲ್ಲಿಯ ಸರ್ಕಾರಿ ಪ್ರೌಢಶಾಲೆಯಲ್ಲಿ ಕಾಳಜಿ ಕೇಂದ್ರ ಆರಂಭಿಸಿ ಸಂತ್ರಸ್ತರಿಗೆ ವ್ಯವಸ್ಥೆ ಮಾಡಲಾಗುತ್ತಿದೆ. ಇನ್ನೂ ಹೆಚ್ಚಿನ ಮನೆಗಳು ಜಲಾವೃತವಾಗುವ ಸಂಭವವಿದೆ. ಪ್ರವಾಹದಿಂದ ಮನೆಯ ಗೋಡೆಗಳು ತೇವಾಂಶ ಹೆಚ್ಚಿ ಕುಸಿಯುವ ಭೀತಿ ಎದುರಾಗಿದೆ.
ಕಾಳಜಿ ಕೇಂದ್ರದಲ್ಲಿ ಸರಿಯಾದ ವ್ಯವಸ್ಥೆ ಇಲ್ಲಾ, ಸಂತ್ರಸ್ಥರು ಪರದಾಡುತ್ತಿದ್ದಾರೆ. ಅಧಿಕಾರಿಗಳು ಭೇಟಿ ನೀಡುತ್ತಿಲ್ಲ ಎಂದು ಗ್ರಾಮಸ್ಥರಾದ ದುಂಡೇಶ ದೇಗಾಂವ್, ಸಿದ್ದು ಜವಳಿ ಆರೋಪಿಸಿದರು.
ಉಡಚಾಣ ಗ್ರಾಮಕ್ಕೂ ಜಲ ದಿಗ್ಭಂಧನವಾಗಿದ್ದು ಜನರು ಪರದಾಡುವಂತಾಗಿದೆ. ತಾಲ್ಲೂಕು ಆಡಳಿತವು ಜನರನ್ನು ಸೂಕ್ತ ಸ್ಥಳಗಳಿಗೆ ಸಾಗಿಸಲು ವ್ಯವಸ್ಥೆ ಮಾಡಿದೆ. ಜನರು ಕಾಳಜಿ ಕೇಂದ್ರದ ಆಶ್ರಯ ಪಡೆದಿದ್ದಾರೆ.