ಭಯದ ನೆರಳಿನಲ್ಲಿ ಬದುಕುತ್ತಿರುವ ಕಾರ್ಮಿಕರು

7
ಬಿಹಾರಕ್ಕೆ ತೆರಳಿದ ಕಾರ್ಮಿಕರು: ಕಾರ್ಖಾನೆ ಸುತ್ತಲೂ ಖಾಖಿ ಪಡೆ

ಭಯದ ನೆರಳಿನಲ್ಲಿ ಬದುಕುತ್ತಿರುವ ಕಾರ್ಮಿಕರು

Published:
Updated:
Deccan Herald

ಸೇಡಂ: ತಾಲ್ಲೂಕಿನ ಶ್ರೀ ಸಿಮೆಂಟ್ ಕಾರ್ಖಾನೆಯಲ್ಲಿ ಗುರುವಾರ ಸಂಜೆ ಕ್ರೇನ್ ಬಿದ್ದು ಆರು ಜನ ಮೃತಪಟ್ಟಿರುವುದರಿಂದ ಕಾಮಗಾರಿ ಸ್ಥಗಿತಗೊಂಡಿದ್ದು, ಸಹ ಕಾರ್ಮಿಕರನ್ನು ಕಳೆದುಕೊಂಡ ಬಿಹಾರ ಕಾರ್ಮಿಕರು ಭಯದ ನೆರಳಿನಲ್ಲಿ ಬದುಕು ಸಾಗಿಸುತ್ತಿದ್ದಾರೆ.

ಶ್ರೀ ಸಿಮೆಂಟ್ ಕಾರ್ಖಾನೆಯಲ್ಲಿ 4 ಸಾವಿರಕ್ಕಿಂತ ಅಧಿಕ ಕಾರ್ಮಿಕರು ಕೆಲಸ ನಿರ್ವಹಿಸುತ್ತಿದ್ದಾರೆ. ಆದರೆ, ಕಾರ್ಮಿಕರು ಮೃತಪಟ್ಟಿದ್ದರಿಂದ ಸುಮಾರು 1,500ಕ್ಕೂ ಹೆಚ್ಚು ಕಾರ್ಮಿಕರು ಬಿಹಾರಕ್ಕೆ ತೆರಳಿದ್ದಾರೆ. ಪ್ರಸ್ತುತ ಕಾರ್ಖಾನೆಯ ಹಿಂಭಾಗದಲ್ಲಿರುವ ಶೆಡ್‌ನಲ್ಲಿ 2 ಸಾವಿರ ಕಾರ್ಮಿಕರು ಭಯದಲ್ಲೇ ಕಾಲಕಳೆಯುತ್ತಿದ್ದಾರೆ.

ಕಲ್ಲು ತೂರಾಟಕ್ಕೆ ಸಂಬಂಧಿಸಿದಂತೆ ಪೊಲೀಸರು 30ಕ್ಕೂ ಅಧಿಕ ಕಾರ್ಮಿಕರನ್ನು ವಶಕ್ಕೆ ಪಡೆದಿದ್ದರಿಂದ ಕಾರ್ಮಿಕ ವರ್ಗದಲ್ಲಿ ಭಯದ ವಾತಾವರಣ ಮೂಡಿದೆ. ಕಾರ್ಖಾನೆ ಸುತ್ತಮುತ್ತ ಇರುವ ಹೋಟೆಲ್, ಹೇರ್ ಕಟಿಂಗ್ ಸಲೂನ್, ಕಿರಾಣಿ, ಜನರಲ್ ಸ್ಟೋರ್ ಅಂಗಡಿಗಳು ಎಂದಿನಂತೆ ತೆರೆದಿದ್ದು, ವ್ಯಾಪಾರ–ವಹಿವಾಟು ನಡೆದಿದೆ. ಕಾರ್ಮಿಕರು ನಿತ್ಯ ಊಟಕ್ಕಾಗಿ ಕೋಡ್ಲಾದ ಹೊಟೇಲ್‌ಗೆ ತೆರಳುತ್ತಿದ್ದಾರೆ.

ಕಾರ್ಮಿಕರ ವಸತಿ ಸ್ಥಳದಲ್ಲಿ ಸುಮಾರು ಅರ್ಧದಷ್ಟು ಶೆಡಗಳು ಮುಚ್ಚಿವೆ. ಅಲ್ಲಲ್ಲಿ ನಿಂತಿರುವ ಕೆಲವರು ಆತಂಕದಿಂದಲೇ ಮಾತನಾಡುತ್ತಿರುವುದು ಕಂಡು ಬಂತು. ಬಿಹಾರ ಕಾರ್ಮಿಕರ ಮೇಲೆ ಪೊಲೀಸರು ಹದ್ದಿನ ಕಣ್ಣಿಟ್ಟಿದ್ದು, ಗಸ್ತು ತಿರುಗುತ್ತಿದ್ದಾರೆ. ಕಾರ್ಖಾನೆ ಸುತ್ತಲೂ ಪೊಲೀಸ್ ಬಂದೋಬಸ್ತ್ ಜತೆಗೆ ಕಾರ್ಖಾನೆಯ ಭದ್ರತಾ ಸಿಬ್ಬಂದಿಯನ್ನು ಹೆಚ್ಚುವರಿಯಾಗಿ ನಿಯೋಜಿಸಲಾಗಿದೆ. ಶ್ರೀ ಸಿಮೆಂಟ್ ಕಾರ್ಖಾನೆಯಲ್ಲಿ ಎರಡು ದಿನಗಳಿಂದ ಕೆಲಸ ಸ್ಥಗಿತಗೊಂಡಿದ್ದರಿಂದ ಕಾರ್ಖಾನೆಗೆ ತೆರಳುವ ಲಾರಿಗಳು ರಸ್ತೆಯ ಮೇಲೆ ಸಾಲಾಗಿ ನಿಂತಿವೆ.

‘ಘಟನೆ ನಡೆದ ಸ್ಥಳ ಹಾಗೂ ಕಲ್ಲು ತೂರಾಟದ ಸ್ಥಳವನ್ನು ಪೊಲೀಸರು ಗುರುತಿಸಿದ್ದಾರೆ. ತನಿಖೆ ಮುಗಿಯುವವರೆಗೂ ಕಾರ್ಖಾನೆ ಒಳಗಡೆ ಪ್ರವೇಶಿಸದಂತೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಎನ್.ಶಶಿಕುಮಾರ್ ಸೂಚಿಸಿದ್ದಾರೆ. ಹೀಗಾಗಿ ಯಾರಿಗೂ ಪ್ರವೇಶ ನೀಡುತ್ತಿಲ್ಲ. ಕಂಪನಿಯ ಅಧಿಕಾರಿಗಳು ಕೂಡ ಯಾರನ್ನೂ ಒಳಬಿಡದಂತೆ ಆದೇಶಿಸಿದ್ದಾರೆ’ ಎಂದು ಕಂಪನಿಯ ಶಾಂತಕುಮಾರ ತಿಳಿಸಿದರು.

‘ಕೆಲಸ ಸ್ಥಗಿತಗೊಂಡಿದ್ದರಿಂದ ಕೆಲಸಕ್ಕಾಗಿ ಪರದಾಡುವ ಪರಿಸ್ಥಿತಿ ಇದೆ. ಎರಡು ದಿನಗಳಿಂದ ನಮಗೆ ಕೆಲಸ ಇಲ್ಲ. ನಮ್ಮ ರಾಜ್ಯ ಬಿಟ್ಟು ಕೆಲಸಕ್ಕಾಗಿ ಇಲ್ಲಿಗೆ ಬಂದಿದ್ದೇವೆ. ಈಗ ಕೆಲಸದ ಜತೆಗೆ ಸಹ ಕಾರ್ಮಿಕರನ್ನು ಕಳೆದುಕೊಂಡಿದ್ದೇವೆ. ಆದಷ್ಟು ಬೇಗ ಕೆಲಸ ಪ್ರಾರಂಭವಾದರೆ ಅನುಕೂಲವಾಗುತ್ತದೆ’ ಎಂದು ಬಿಹಾರದ ಕಾರ್ಮಿಕ ಜುಬೈದ್ ಮತ್ತು ವ್ಯಾಪಾರಸ್ಥ ಸಂತೋಷ ಹೇಳುತ್ತಾರೆ.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !