ಕಲಬುರಗಿ | ತಾಪಮಾನ ತಗ್ಗಿಸಲು ‘ಹಸಿರು ಕ್ರಾಂತಿ’

ಬೇಸಿಗೆಯಲ್ಲಿ ಇಲ್ಲಿನ ತಾಪಮಾನ 45 ಡಿಗ್ರಿ ಆಸುಪಾಸಿನಲ್ಲಿ ಇರುತ್ತದೆ. ತಾಪಮಾನ ಹೆಚ್ಚಳಕ್ಕೆ ಮಳೆ, ಮರಗಳ ಕೊರತೆ ಕಾರಣ. ಹೀಗಾಗಿ ‘ನಾಲ್ಕು ಚಕ್ರ’ ಎಂಬ ಚಾರಿಟೇಬಲ್‌ ಟ್ರಸ್ಟ್‌ ಕಳೆದ ನಾಲ್ಕು ವರ್ಷಗಳಿಂದ ಹಸಿರು ಕ್ರಾಂತಿ ನಡೆಸುತ್ತಿದೆ.

ಸುಮಾರು 15 ಜನರ ಈ ತಂಡ ಅರಣ್ಯ ಇಲಾಖೆಯಿಂದ ಬೇವು, ಹೆಬ್ಬೇವು, ಹೊಂಗೆ, ಸಾಗವಾನಿ, ಮಹಾಗನಿಯಂತಹ ಆಮ್ಲಜನಕ ಬಿಡುಗಡೆ ಮಾಡುವ 5,000 ಸಸಿಗಳನ್ನು ಪ್ರತಿವರ್ಷ ಖರೀದಿಸಿ ನೆಡುತ್ತಾರೆ. ಸಿನ್ನೂರ ಮತ್ತು ಕೆಸರಟಗಿ ಸಾಮಾಜಿಕ ಅರಣ್ಯ ಇಲಾಖೆ ಕಚೇರಿಯಿಂದ ಪ್ರತಿ ಸಸಿಗೆ ₹12 ರಂತೆ ಬೆಲೆ ನೀಡಿ ಖರೀದಿಸಿ ತರುತ್ತಾರೆ. ಅವುಗಳನ್ನು ಪಾಲಿಕೆ ಉದ್ಯಾನಗಳು, ಬಡಾವಣೆಗಳು, ಶಾಲಾ ಆವರಣ, ದೇವಾಲಯ, ಮಸೀದಿ, ಚರ್ಚ್‌ ಆವರಣದಲ್ಲಿ ನೆಡುತ್ತಾರೆ.

ನಗರದಲ್ಲಿ ಪಾಲಿಕೆ ವ್ಯಾಪ್ತಿಯಲ್ಲಿ 220 ಉದ್ಯಾನಗಳು ಇದ್ದು, ಅಲ್ಲಿ ನೆಟ್ಟ ಸಸಿಗಳಿಗೆ ಬೇಸಿಗೆಯಲ್ಲಿ ನೀರುಣಿಸುವ ಜವಾಬ್ದಾರಿಯನ್ನು ಪಾಲಿಕೆಯವರೇ ವಹಿಸಿಕೊಂಡಿದ್ದಾರೆ. ಶಾಲಾ ಆವರಣದಲ್ಲಿ ನೆಟ್ಟ ಸಸಿಗಳ ಪೋಷಣೆ ಜವಾಬ್ದಾರಿಯನ್ನು ವಿದ್ಯಾರ್ಥಿಗಳಿಗೆ ನೀಡಲಾಗುತ್ತದೆ. ಈಗಾಗಲೇ ಈ ಟ್ರಸ್ಟ್‌ನವರು ಕಳೆದ 4 ವರ್ಷಗಳಲ್ಲಿ ಸುಮಾರು 20 ಸಾವಿರ ಸಸಿಗಳನ್ನು ನೆಟ್ಟಿದ್ದಾರೆ. ಅವುಗಳಲ್ಲಿ ಸುಮಾರು 18 ಸಾವಿರ ಗಿಡಗಳಾಗಿ ಬೆಳೆದುನಿಂತಿದೆ.

ಖಾಸಗಿ ಕೆಲಸದಲ್ಲೇ ಇರುವ ಈ ಟ್ರಸ್ಟ್‌ನ ಸದಸ್ಯರು ನಗರ ವ್ಯಾಪ್ತಿಯಲ್ಲಿ ಅಷ್ಟೇ ಅಲ್ಲದೇ ತಮ್ಮ ಕಾರ್ಯವ್ಯಾಪ್ತಿಯನ್ನು ತಾಲ್ಲೂಕು ಮತ್ತು ಕಲಬುರಗಿ ನಗರದ ಸುತ್ತಲಿನ ಪ್ರವಾಸಿ ತಾಣಗಳಿಗೂ ವಿಸ್ತರಿಸಿದ್ದಾರೆ. ಪ್ರತಿ ಭಾನುವಾರ ಸ್ವಚ್ಛತಾ ಅಭಿಯಾನ ನಡೆಸಿ ಸಸಿ ನೆಡುತ್ತಾರೆ.

ಸಸಿಗಳನ್ನು ನೆಡಲು ತಗ್ಗು ತೆಗೆಯಬೇಕು. ಹೀಗಾಗಿ ಟ್ರಸ್ಟ್‌ನ ಸದಸ್ಯರೇ ಹಣ ಸೇರಿಸಿ ತಗ್ಗು ತೋಡುವ ಯಂತ್ರವನ್ನೂ ಖರೀದಿಸಿದ್ದಾರೆ. ಮಳೆಗಾಲದಲ್ಲೇ ಇವರು ಸಸಿಗಳನ್ನು ನೆಡುವುದರಿಂದ ನೀರಿನ ಸಮಸ್ಯೆ ಅಷ್ಟಾಗಿ ಕಾಡುವುದಿಲ್ಲ. ಇನ್ನು ನೆಟ್ಟ ಸಸಿಗಳ ಬೆಳವಣಿಗೆ ಗಮನಿಸಿ ವರ್ಷದ ಬಳಿಕ ಬೆಳೆದು ನಿಂತ ಗಿಡಗಳ ವಿಡಿಯೊ ಮಾಡಿ ಜನರಿಗೆ ತಲುಪಿಸುವ ಕೆಲಸ ಮಾಡುತ್ತಾರೆ. ಜನರೂ ಸಸಿಗಳನ್ನು ನೆಡಲಿ ಎಂಬ ಉದ್ದೇಶದಿಂದ ವಿಡಿಯೊ ಹಂಚಿಕೊಳ್ಳುತ್ತಾರೆ. ಇನ್ನು ಮನೆ ಆವರಣದಲ್ಲಿ ಜಾಗವಿದ್ದು, ಸಸಿಗಳನ್ನು ನೆಡುವ ಉದ್ದೇಶವಿರುವ ಜನರಿಗೆ ಟ್ರಸ್ಟ್‌ನವರು ಸಸಿಗಳನ್ನು ಉಚಿತವಾಗಿಯೂ ಹಂಚುತ್ತಾರೆ. ಸಂಪರ್ಕಕ್ಕೆ ಮೊ. 9741299995