ಕಂಕಣಭಾಗ್ಯ: ಅಶ್ವಿನಿ, ಅಂಬಿಕಾ ಬಾಳಲ್ಲಿ ಸಂತಸ ಅರಳುವ ಸಮಯ...

7
ರಾಜ್ಯ ಮಹಿಳಾ ನಿಲಯದಲ್ಲಿ ಆಶ್ರಯ ಪಡೆದ ಇಬ್ಬರು ತರುಣಿಯರಿಗೆ ಕಂಕಣಭಾಗ್ಯ

ಕಂಕಣಭಾಗ್ಯ: ಅಶ್ವಿನಿ, ಅಂಬಿಕಾ ಬಾಳಲ್ಲಿ ಸಂತಸ ಅರಳುವ ಸಮಯ...

Published:
Updated:

ಕಲಬುರ್ಗಿ: ಹಸೆಮನೆ ಏರಿದ ಆ ಕನ್ಯಾಮಣಿಗಳಲ್ಲಿ ಅನಾಥರೆಂಬ ಭಾವ ಇಣುಕಲಿಲ್ಲ, ಬಂಧು– ಬಳಗ ಇಲ್ಲ ಎಂಬ ಅಳುಕು ಸುಳಿಯಲಿಲ್ಲ. ಅಲ್ಲಿ ಕಾಣಿಸಿದ್ದು ಸಪ್ತಪದಿ ತುಳಿಯುವ ಸಂಭ್ರಮ, ಹೊಸಬಾಳಿನ ಬಾಗಿಲು ತೆರೆಯಿತು ಎಂಬ ಸಡಗರ, ಬದುಕನ್ನು ಕಟ್ಟಿಕೊಳ್ಳಬಲ್ಲೆ ಎಂಬ ಭರವಸೆಯ ಭಾವ.

ಅವರ ಬಾಳಲ್ಲಿ ಈಗ ಸಂತಸ ಅರಳುವ ಸಮಯ...

ಇಲ್ಲಿನ ಆಳಂದ ರಸ್ತೆಯಲ್ಲಿರುವ ರಾಜ್ಯ ಮಹಿಳಾ ನಿಲಯದಲ್ಲಿ ಶುಕ್ರವಾರ ಎರಡು ಜೋಡಿಗಳ ಮದುವೆಯ ಸಡಗರ ಮನೆಮಾಡಿತ್ತು. ನಿಲಯದಲ್ಲಿ ಆಶ್ರಯ ಪಡೆದಿದ್ದ ಅಂಬಿಕಾ ಅವರು ಗುಂಡುರಾವ್‌ ಹಾಗೂ ಅಶ್ವಿನಿ ಅವರು ಪವನಕುಮಾರ ಅವರನ್ನು ವರಿಸಿದರು. ಇಬ್ಬರ ಕಂಕಣಭಾಗ್ಯ ಏಕಕಾಲಕ್ಕೇ ಕೂಡಿಬಂದಿದ್ದರಿಂದ ದುಪ್ಪಟ್ಟು ಸಂಭ್ರಮ ಮನೆ ಮಾಡಿತ್ತು.

ಅಲ್ಲಿ ಯಾರು ಯಾರಿಗೂ ಬಂಧುಗಳಲ್ಲಿ, ರಕ್ತಸಂಬಂಧಿಗಳಲ್ಲ. ಅವರಲ್ಲಿನ ಆಪ್ತತೆ, ಸಡಗರ, ಲವಲವಿಕೆಯ ಓಡಾಟ, ಮದುವೆ ತಯಾರಿ... ಎಲ್ಲ ಸಂಬಂಧಗಳನ್ನೂ ಮೀರಿಸಿತು.

ನಿಲಯದ ಆವರಣದಲ್ಲಿ ಹಾಕಿದ ಶಾಮಿಯಾನದಲ್ಲಿ ಹಿಂದೂ ಸಂಪ್ರದಾಯದಂತೆ ಎರಡೂ ಮದುವೆಗಳು ಸಾಂಗವಾಗಿ ನೆರವೇರಿದವು. ರೇಷ್ಮೆ ಸೀರೆ, ಹಸಿರು ಬಳೆ, ಕಾಲುಂಗುರ ಧರಿಸಿದ ವಧುಗಳು ನಾಚಿಕೆಯಿಂದಲೇ ಹಸೆಮನೆ ಏರಿದರು. ಕೈತುಂಬ ಕಡುಗೆಂಪು ಮೆಹಂದಿ, ಕಣ್ಣಿಗೆ ಕಾಡಿಗೆ, ಉದ್ದ ಜಡೆಗೆ ಮಲ್ಲಿಗೆಯ ದಂಡೆ ಮುಡಿದು ನಳನಳಿಸಿದರು. ವರರೂ ಅಷ್ಟೇ; ಬಣ್ಣದ ಬ್ಲೆಜರ್‌ ತೊಟ್ಟು, ಮೈಸೂರು ಪೇಟಾ ಹೋಲುವ ಬಾಸಿಂಗ ಕಟ್ಟಿಕೊಂಡು ಹಿಗ್ಗಿನಿಂದಲೇ ನಿಂತರು. ಸರಿಯಾಗಿ 11.42ಕ್ಕೆ ಅರ್ಚಕರು ಅಕ್ಷತಾರೋಪಣ ಮಾಡಿಸಿದರು.

ನಂತರ ನಿಲಯದ ನಿವಾಸಿಗಳು, ವರರ ಕಡೆಯ ಬಂಧು– ಮಿತ್ರರೆಲ್ಲ ವೇದಿಕೆಗೆ ಬಂದು ಅಕ್ಷತೆ ಹಾಕಿ ಹರಸಿದರು. ಸೆಲ್ಫಿ ಕ್ಲಿಕ್ಕಿಸಿಕೊಂಡು ವಾಟ್ಸ್‌ಆ್ಯಪ್‌, ಫೇಸ್‌ಬುಕ್‌ಗಳಲ್ಲಿ ಶುಭ ಕೋರಿದರು.

ಅಂಬಿಕಾ (21) ಅವರ ಕೈ ಹಿಡಿದ ಗುಂಡುರಾವ (30) ಬಿ.ಎ ಪದವೀಧರ. ಯಾದಗಿರಿ ಜಿಲ್ಲೆಯ ಹೊಸಳ್ಳಿ ಕ್ರಾಸ್‌ ಬಳಿ ಕಬ್ಬಿಣ ಸಾಮಗ್ರಿಗಳ ವ್ಯಾಪಾರ ಮಾಡಿಕೊಂಡಿದ್ದಾರೆ. ಅಶ್ವಿನಿ (20) ಅವರ ಜೊತೆಯಾದ ಪವನಕುಮಾರ (34) ಕೂಡ ಬಿ.ಎ ಪದವೀಧರ. ಚಿತ್ತಾಪುರ ತಾಲ್ಲೂಕಿನ ಶಹಾಬಾದ್‌ನಲ್ಲಿ ಕಿರಾಣಿ ಅಂಗಡಿ ಇಟ್ಟುಕೊಂಡಿದ್ದಾರೆ.

ಮಹಿಳಾ ನಿಲಯದ ಅಧೀಕ್ಷಕಿ ಭಾಗ್ಯಲಕ್ಷ್ಮಿ, ಗ್ರಾಮೀಣಿ ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಸಿಡಬ್ಲ್ಯುಸಿ ಸಮಿತಿ ಅಧ್ಯಕ್ಷೆ ರೀನಾ ಡಿಸೋಜಾ, ಸಿ.ವಿ.ರಾಮನ್‌, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಉಪನಿರ್ದೇಶಕ ಮಲ್ಲಿಕಾರ್ಜುನ ರೆಡ್ಡಿ, ಡಾನ್‌ಬಾಸ್ಕೊ ನಿರ್ದೇಶಕ ಸಜಿ ಜಾರ್ಜ್‌, ಬಾಲಕಿಯರ ಬಾಲಮಂದಿರದ ಪ್ರಭಾರಿ ನಿರ್ದೇಶಕಿ ಶಿಲ್ಪಾ ಹಿರೇಮಠ, ಬಾಲಕರ ಬಾಲಮಂದಿರದ ಅಧೀಕ್ಷಕ ಭೀಮರಾಯ, ಬುದ್ಧಿಮಾಂದ್ಯ ಬಾಲಕಿಯರ ಬಾಲಮಂದಿರದ ಅಧೀಕ್ಷಕಿ ದೀಪಾಕ್ಷಿ, ಚೈಲ್ಡ್‌ಲೈನ್‌ ಸಂಯೋಜಕ ಬಸವರಾಜ ಹಾಜರಿದ್ದು ನವ ದಂಪತಿಗೆ ಶುಭ ಕೋರಿದರು.

ಸಂಭ್ರಮದಿಂದ ಓಡಾಡಿದ ಜೋಡಿಗಳು

ಕಳೆದ ವರ್ಷ ಇದೇ ರೀತಿ ಮದುವೆಯಾದ ಶಬಾನಾ– ವಿಕ್ರಮ್‌ ಅವರ ನೇತೃತ್ವದಲ್ಲಿ ವಿವಿಧ ಜೋಡಿಗಳು ತಮ್ಮ ಗೆಳತಿಯರ ಮದುವೆಯಲ್ಲಿ ಖುಷಿಯಿಂದ ಓಡಾಡಿದವು. ನಿಲಯದ ಹಿರಿಯರೇ ಮುಂದೆ ನಿಂತು ‘ತಮ್ಮ ಮಕ್ಕಳ’ ಲಗ್ನ ನೆವೇರಿಸಿದರು.

ವಿವಿಧೆಡೆ ದತ್ತು ಹೋದ ಮಕ್ಕಳು, ಇನ್ನೂ ನಿಲಯದಲ್ಲೇ ಇರುವ ತರಣಿಯರು, ಸಹಪಾಠಿಗಳೆಲ್ಲ ತಮ್ಮ ಗೆಳತಿಯ ಮದುವೆಗಾಗಿ ಲಗುಬಗೆಯಿಂದ ಓಡಾಡಿದರು. ಹೊಸ ಬಟ್ಟೆ ಧರಿಸಿ, ಹೂ ಮೂಡಿದು, ಆಭರಣ ತೊಟ್ಟು ಇನ್ನಿಲ್ಲದಂತೆ ಸಂಭ್ರಮಸಿದರು. ಗಂಡಿನ ಕಡೆಯಿಂದ ಪಾಲಕರು, ಬಂಧುಗಳು, ಸ್ನೇಹಿತರು ಸೇರಿದ್ದರು.

ಮದುವೆಗಾಗಿ ಮೂರು ತಿಂಗಳ ಮುಂಚೆ ತಯಾರಿ ಮಾಡಿಕೊಂಡಿದ್ದರು. ಶುಕ್ರವಾರ ನಸುಕಿನಿಂದಲೇ ಸಖಿಯರು ವಧುಗಳನ್ನು ಸಿಂಗಾರಗೊಳಿಸಿದರು. ರಂಗೋಲಿ ಬಿಡಿಸಿ, ತಳಿರು ಕಟ್ಟಿ, ಮದುವೆ ಶಾಮಿಯಾನದ ತುಂಬ ಕಳೆ ಚೆಲ್ಲಾಡಿದರು.

* ಕಲಬುರ್ಗಿ ಮಹಿಳಾ ನಿಲಯದಲ್ಲಿ ಈವರೆಗೆ 20 ಮದುವೆಗಳಾಗಿವೆ. ತರುಣಿಯರು ಕಲ್ಯಾಣಕ್ಕೆ ಇಷ್ಟಪಟ್ಟರೆ ಅವರ ಅಣತಿಯಂತೆ ವರನನ್ನು ತೋರಿಸಿ, ಕಾನೂನಾತ್ಮಕ ಪರಿಶೀಲನೆ ಬಳಿಕ ಮದುವೆ ಮಾಡುತ್ತೇವೆ

-ಭಾಗ್ಯಲಕ್ಷ್ಮಿ
ಅಧೀಕ್ಷಕಿ, ರಾಜ್ಯ ಮಹಿಳಾ ನಿಲಯ

* ಪರಿವೀಕ್ಷಣಾ ಅಧಿಕಾರಿಗಳು ಹಾಗೂ ಅಪರಾಧ ಪರವೀಕ್ಷಣಾ ಅಧಿನಿಯಮದಡಿ ಅಧಿಕಾರಿಗಳು ಪರಿಶೀಲನೆ ನಡೆಸಿದ ಬಳಿಕವೇ ಒಪ್ಪಿಗೆ ನೀಡುತ್ತಾರೆ. ಮದುವೆ ನಂತರ 3 ವರ್ಷ ಗೃಹ ತನಿಖೆಯೂ ಇರುತ್ತದೆ

-ಸಿ.ವಿ.ರಾಮನ್‌, ಗ್ರಾಮೀಣ ಶಿಶು ಅಭಿವೃದ್ಧಿ ಯೋಜನಾಧಿಕಾರಿ

* ಸಮಾಜಕ್ಕೆ ಹೊಸ ಸಂದೇಶ ನೀಡುತ್ತೇವೆ ಎನ್ನುವುದಕ್ಕಿಂತ ನಮ್ಮ ಜೀವನವನ್ನು ಖುಷಿಯಿಂದ ಕಟ್ಟಿಕೊಳ್ಳಬೇಕು ಎಂಬ ಆಸೆ ಇದೆ. ಕೊರತೆ ಎಲ್ಲರಲ್ಲೂ ಇರುತ್ತವೆ. ಹೊಂದಾಣಿಕೆಯೇ ಜೀವನ
-ಗುಂಡುರಾವ, ಅಂಬಿಕಾ ಅವರ ಪತಿ

* ಹಿಂದೂ ಬ್ರಾಹ್ಮಣ ಸಮಾಜದಲ್ಲಿ ವಧುಗಳ ಕೊರತೆ ಇದೆ. ಇದರಿಂದ ತಂದೆ– ತಾಯಿ, ಕಟುಂಬದ ಹಿರಿಯರು ಸೇರಿಕೊಂಡು ಒಮ್ಮತದಿಂದ ನಿರ್ಧಾರ ಮಾಡಿ ಈ ರೀತಿ ಮದುವೆ ಮಾಡಿಕೊಂಡಿದ್ದೇನೆ

-ಪವನಕುಮಾರ, ಅಶ್ವಿನಿ ಅವರ ಪತಿ

ಅಂಕಿ ಅಂಶ

* ₹ 20,000 ಮದುವೆಯಾಗುವ ಅನಾಥೆಯರಿಗೆ ಸಿಗುವ ಸಹಾಯಧನ

* ₹ 5,000 ಮದುವೆ ವಸ್ತ್ರ, ವಡವೆ ಕೊಳ್ಳಲು ಮಾಡುವ ಖರ್ಚು

* ₹ 15,000 ಹೆಣ್ಣುಮಗಳ ಹೆಸರಿನಲ್ಲಿ ಡೆಪಾಟಿಟ್‌

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !